ವಾರದಲ್ಲೇ ತಿಂಗಳ ಮಳೆ: ರಾಜಧಾನಿಯಲ್ಲಿ ಕರಾವಳಿ ಹವೆ

ಬೆಂಗಳೂರು: ರಾಜ್ಯದ ರಾಜಧಾನಿಗೆ ಕರಾವಳಿಯ ಹವೆ ಬೀಸಿದೆ. ಕಳೆದ  ಹತ್ತು ದಿನದಿಂದ   ಸುರಿಯುತ್ತಿರುವ ಮಳೆಯೇ ಇದಕ್ಕೆ ಸಾಕ್ಷಿ.
ಸಾಮಾನ್ಯವಾಗಿ ತಿಂಗಳಿಗೆ ಇಷ್ಟು ಪ್ರಮಾಣದಲ್ಲಿ ಮಳೆ ಸುರಿಯಲಿದೆ ಎಂದು ಹವಾಮಾನ ಇಲಾಖೆ ಅಂದಾಜಿಸಿದೆ. ಆದರೆ, ಸೆಪ್ಟೆಂಬರ್ ತಿಂಗಳ ಪೂರ್ತಿ ಅಂದಾಜಿಸಿದ್ದ ವಾಡಿಕೆ ಮಳೆಯ ಪ್ರಮಾಣಕ್ಕಿಂತಲೂ ಹೆಚ್ಚಿನ ಪ್ರಮಾಣದ ಮಳೆ ಮೊದಲ ಹತ್ತು  ದಿನಗಳಲ್ಲಿಯೇ ಆಗಿದೆ.

‘ನಗರದಲ್ಲಿ ಸೆಪ್ಟೆಂಬರ್ ತಿಂಗಳೊಂದ­ರಲ್ಲೇ ಸುಮಾರು 200.2 ಮಿ.ಮೀ ವಾಡಿಕೆ ಮಳೆಯಾಗಬಹುದೆಂದು ಅಂದಾಜಿಸಲಾಗಿತ್ತು. ಆದರೆ, ಈ ಹತ್ತುದಿನದಲ್ಲಿ ( ಸೆ. 2 ರಿಂದ 12) 200.50 ಮಿ.ಮೀ ಮಳೆ ಸುರಿದಿದೆ. ಸಾಮಾನ್ಯವಾಗಿ ಕರಾವಳಿಯಲ್ಲಿ ಮಾತ್ರ ತಿಂಗಳೆಲ್ಲಾ ಸುರಿಯಬೇಕಾಗಿರುವ ಮಳೆ ಒಂದೆರಡು ದಿನಗಳಲ್ಲಿ ಸುರಿದ ನಿದರ್ಶನವಿದೆ.

ಈ ಬಾರಿ ನಗರದಲ್ಲಿ ಕರಾವಳಿಯ ಮಳೆಯ ಲಕ್ಷಣಗಳು ಕಂಡುಬಂದಿರು ವುದು ವಿಶೇಷ’  ಎಂದು ಬೆಂಗಳೂರು ಕೃಷಿ ವಿವಿಯ ಕೃಷಿ ಹವಾಮಾನ ವಿಭಾಗದ ಪ್ರಾಧ್ಯಾಪಕ ಡಾ.ಎಂ.ಬಿ.ರಾಜೇಗೌಡ ‘ಪ್ರಜಾವಾಣಿ’ ಗೆ ಮಾಹಿತಿ  ನೀಡಿದರು.

‘ಒಂದು ತಿಂಗಳಲ್ಲಿ ಬರುವ ಮಳೆಯೆಲ್ಲಾ ಒಂದು ವಾರದಲ್ಲೇ ಸುರಿದಿದೆ. ಈ ರೀತಿ ಕೇವಲ ಬೆಂಗಳೂರು ನಗರ ಜಿಲ್ಲೆ ಮಾತ್ರವಲ್ಲದೇ, ಮಂಡ್ಯ,  ಮೈಸೂರು, ಕೋಲಾರ, ಚಿಕ್ಕಬಳ್ಳಾ­ಪುರ, ದಾವಣಗೆರೆ ಜಿಲ್ಲೆಗಳಲ್ಲಿ  ಮಳೆ­ಯಾಗಿದೆ. ವಾಡಿಕೆ ಮಳೆಗಿಂತ ಶೇ 25ರಷ್ಟು ಹೆಚ್ಚಿನ ಪ್ರಮಾಣದಲ್ಲಿ ಮಳೆ ಸುರಿದರೆ ಅತಿ ಹೆಚ್ಚಿನ ಮಳೆ ಎಂದು ಪರಿಗಣಿಸಲಾಗುತ್ತದೆ’ ಎಂದು ಹೇಳಿದರು.