ಬೆಂಗಳೂರು: ಮಾಹಿತಿ ತಂತ್ರಜ್ಞಾನ, ಸಮಾಲೋಚನೆ ಹಾಗೂ ಹೊರಗುತ್ತಿಗೆ ಕ್ಷೇತ್ರಗಳಲ್ಲಿ ಮಂಚೂಣಿಯಲ್ಲಿರುವ ವಿಪ್ರೊ ಸಂಸ್ಥೆ ತನ್ನ ವಾರ್ಷಿಕ ಚಟುವಟಿಕೆಯ ಭಾಗವಾಗಿ ಎಂಟನೆಯ ಆವೃತ್ತಿಯ ‘ಸ್ಪಿರಿಟ್ ಆಫ್ ರನ್’ ಕಾರ್ಯಕ್ರಮ ನಗರದಲ್ಲಿ ಭಾನುವಾರ ನಡೆಯಿತು.
ಏಕಕಾಲಕ್ಕೆ 97 ನಗರಗಳಲ್ಲಿ ಓಟ ಆಯೋಜಿಸಲಾಗಿತ್ತು. ನಗರದಲ್ಲಿ ನಡೆದ ಓಟದಲ್ಲಿ 14,000ಕ್ಕೂ ಅಧಿಕ ವಿಪ್ರೊ ಉದ್ಯೋಗಿಗಳು, ಅವರ ಕುಟುಂಬ ವರ್ಗ, ಸ್ನೇಹಿತರು, ಗ್ರಾಹಕರು, ವಿಶ್ಲೇಷಕರು ಹಾಗೂ ವಿತರಕರು ಪಾಲ್ಗೊಂಡಿದ್ದರು.
‘ಬಲು ದೂರದ ಓಟಕ್ಕಾಗಿ’ ಅಥವಾ ‘ಬಹುಕಾಲದ ಬಾಳ್ವಿಕೆಗಾಗಿ’ ಎಂಬ ಕಲ್ಪನೆ ಈ ವರ್ಷದ ಓಟದ ಮುಖ್ಯ ವಿಷಯ. ಓಟಕ್ಕೆ ಸಂಸ್ಥೆಯ ಮುಖ್ಯಸ್ಥ ಅಜೀಂ ಪ್ರೇಮ್ಜಿ ಚಾಲನೆ ನೀಡಿದರು.
ಸಂಸ್ಥೆಯ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಟಿ.ಕೆ.ಕುರಿಯನ್ ಮಾತನಾಡಿ, ‘ವೈಯಕ್ತಿಕ ಹಾಗೂ ಕಾರ್ಪೊರೇಟ್ ಬದುಕಿನಲ್ಲಿ ಸಹಿಷ್ಣುತೆಯ ಮಹತ್ವವನ್ನು ‘ಸ್ಪಿರಿಟ್ ಆಫ್ ವಿಪ್ರೊ ಓಟ’ ಸಾರಿ ಹೇಳುತ್ತದೆ. ಬೆಂಗಳೂರು ಸೇರಿ 97 ನಗರಗಳಲ್ಲಿ ಈ ಓಟ ನಡೆಯುತ್ತಿದೆ. 50 ಸಾವಿರಕ್ಕೂ ಅಧಿಕ ಮಂದಿ ಭಾಗಿಗಳಾಗಿದ್ದಾರೆ‘’ ಎಂದರು.
‘ಮೊದಲ ಬಾರಿಗೆ, ಜಗತ್ತಿನ ನಾಲ್ಕು ನಗರಗಳಲ್ಲಿ ಓಟ ಪೂರ್ಣಗೊಳಿಸಲು ಬೇಕಾಗುವ ಅವಧಿಯನ್ನು ಅಧಿಕೃತವಾಗಿ ದಾಖಲುಗೊಳಿಸಲಾಗುವುದು. ಅಂತೆಯೇ, ಓಟವನ್ನು ಐದು ಬೇರೆ ಬೇರೆ ಭಾಗಗಳಲ್ಲಿ ಸಂಘಟಿಸಲಾಗುವುದು. ಬೆಂಗಳೂರಿನಲ್ಲಿ ಮೊದಲ ಬಾರಿಗೆ ಎಲಿವೇಟೆಡ್ ಹೆದ್ದಾರಿಯ ಮೇಲೆ ಈ ಓಟವನ್ನು ಏರ್ಪಡಿಸಲಾಗಿದೆ’ ಎಂದರು.
ಓಟದಿಂದ ಸಂಗ್ರಹಿಸಲಾಗುವ ಆದಾಯವನ್ನು ವಿಪ್ರೊ ಸಮುದಾಯ ಯೋಜನೆಗಳ ಅಂಗವಾದ ವಿಪ್ರೊ ಕೇರ್ ಗುರುತಿಸುವ ಸ್ಥಳಿಯ ಕಾರ್ಯಗಳ ಅಭಿವೃದ್ಧಿಯನ್ನು ಬೆಂಬಲಿಸಲು ವಿನಿಯೋಗಿಸಲಾಗುವುದು.