ನವದೆಹಲಿ (ಪಿಟಿಐ): ಇಲಾಖೆಯ ಅಧಿಕಾರಿಗಳ ವಿರುದ್ಧ ಇರುವ ಭ್ರಷ್ಟಾಚಾರ ಪ್ರಕರಣಗಳು ಹಾಗೂ ಸಂಸ್ಥೆಯ ಮಹಿಳಾ ಅಧಿಕಾರಿಗಳ ಮೇಲೆ ನಡೆದಿರುವ ಲೈಂಗಿಕ ಕಿರುಕುಳಗಳ ಕುರಿತು ಮಾಹಿತಿ ನೀಡಲು ಒಪ್ಪದ ಗುಪ್ತಚರ ಸಂಸ್ಥೆಯಿಂದ ಕೇಂದ್ರ ಮಾಹಿತಿ ಆಯೋಗವು (ಸಿಐಸಿ) ಅದಕ್ಕಾಗಿ ವಿವರಣೆ ಕೇಳಿದೆ.
ಈ ಸಂಬಂಧ 10 ದಿನಗಳೊಳಗೆ ಸಮರ್ಥನೆ ನೀಡುವಂತೆ ಕೇಂದ್ರ ಗೃಹ ಸಚಿವಾಲಯಕ್ಕೆ ಮಾಹಿತಿ ಆಯೋಗವು ನಿರ್ದೇಶಿಸಿದೆ.
ಕಳೆದ 10 ವರ್ಷಗಳಲ್ಲಿ ಇಲಾಖೆಯ ಅಧಿಕಾರಿಗಳಿಂದ ನಡೆದಿರುವ ನಡೆದ ಮಾನವ ಹಕ್ಕು ಉಲ್ಲಂಘನೆ ಪ್ರಕರಣಗಳ ಬಗ್ಗೆಯೂ ಅರ್ಜಿದಾರರು ಇದೇ ವೇಳೆ ಮಾಹಿತಿ ಕೋರಿದ್ದರು. ಆದರೆ, ಅರ್ಜಿದಾರರ ಕೋರಿರುವ ಮಾಹಿತಿಗಳು ಮಾಹಿತಿ ಹಕ್ಕು ಕಾಯ್ದೆ ಚೌಕಟ್ಟಿಗೆ ಒಳಪಡುವುದಿಲ್ಲ ಎಂದು ಗುಪ್ತದಳ ಸಂಸ್ಥೆಯ ಸಾರ್ವಜನಿಕ ಮಾಹಿತಿ ಅಧಿಕಾರಿ ಹೇಳಿದ್ದರು.
ನಂತರ ಅರ್ಜಿದಾರರು ಇದರ ವಿರುದ್ಧ ಪ್ರಥಮ ಮೇಲ್ಮನವಿ ಪ್ರಾಧಿಕಾರದ ಮೊರೆ ಹೋಗಿದ್ದರು. ಪ್ರಾಧಿಕಾರ ಗುಪ್ತಚರ ಸಂಸ್ಥೆಯ ವಾದ ಎತ್ತಿಹಿಡಿದಿತ್ತು. ಇದಾದ ಮೇಲೆ ಅರ್ಜಿದಾರರು ಸಂಸ್ಥೆಯ ಧೋರಣೆಯನ್ನು ಕೇಂದ್ರ ಮಾಹಿತಿ ಆಯೋಗದಲ್ಲಿ (ಸಿಐಸಿ) ಪ್ರಶ್ನಿಸಿದ್ದರು.