ನ್ಯೂಯಾರ್ಕ್ (ಪಿಟಿಐ): ಅಮೆರಿಕದ ಬೃಹತ್ ಬ್ಯಾಂಕಿಂಗ್ ಸಮೂಹ ಸಂಸ್ಥೆ `ಸಿಟಿಗ್ರೂಪ್~ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಹುದ್ದೆಯಿಂದ ವಿಕ್ರಂ ಪಂಡಿತ್ (55) ಮಂಗಳವಾರ ನಿರ್ಗಮಿಸಿದರು. ಕಂಪೆನಿಯ ನಿರ್ದೇಶಕ ಮಂಡಳಿ ಸದಸ್ಯತ್ವಕ್ಕೂ ರಾಜೀನಾಮೆ ನೀಡಿದ್ದಾರೆ.
`ಸಿಟಿಗ್ರೂಪ್~ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕ ಫಲಿತಾಂಶವನ್ನು ಸೋಮವಾರ ಪ್ರಕಟಿಸಿದ್ದು, ನಿವ್ವಳ ಲಾಭ ಗಳಿಕೆಯಲ್ಲಿ ಶೇ 88ರಷ್ಟು ಕುಸಿತ ಕಂಡಿತ್ತು. ಅಂದರೆ ಲಾಭದ ಪ್ರಮಾಣ 46.80 ಕೋಟಿ ಡಾಲರ್ನಷ್ಟು (ರೂ.2480 ಕೋಟಿ) ಅಲ್ಪ ಪ್ರಮಾಣಕ್ಕೆ ಕುಸಿದಿದೆ. ಫಲಿತಾಂಶ ಪ್ರಕಟಣೆ ಮರುದಿನವೇ ವಿಕ್ರಂ ನಿರ್ಗಮನವಾಗಿದೆ.
ಈ ಮಧ್ಯೆ ಸಿಟಿಗ್ರೂಪ್ ನಿರ್ದೇಶಕ ಮಂಡಳಿ ಸಭೆ ಸೇರಿ, ಮೈಕೇಲ್ ಕೊರ್ಬ್ಯಾಟ್ ಅವರನ್ನು `ಸಿಇಒ~ ಮತ್ತು ನಿರ್ದೇಶಕ ಹುದ್ದೆಗೆ ಅವಿರೋಧವಾಗಿ ಆಯ್ಕೆ ಮಾಡಿದೆ.
`ಕೆಲವು ವರ್ಷಗಳಿಂದ ಕಂಪೆನಿ ಪ್ರಗತಿಗಾಗಿ ಸಾಕಷ್ಟು ಶ್ರಮಿಸಿದೆ. ನಿರ್ಗಮನಕ್ಕೆ ಇದು ಸಕಾಲ. ನನ್ನಿಂದ ತೆರವಾಗುತ್ತಿರುವ ಹುದ್ದೆಗೆ ಕೊರ್ಬ್ಯಾಟ್ ಉತ್ತಮ ಆಯ್ಕೆ~ ಎಂದು ವಿಕ್ರಂ ಪ್ರತಿಕ್ರಿಯಿಸಿದ್ದಾರೆ.