ಬಿಇಎಂಎಲ್: ಎಲೆಕ್ಟ್ರಿಕ್‌ ಡಂಪರ್‌ ಲೋಕಾರ್ಪಣೆ

ಮೈಸೂರು: ಭಾರತ್ ಅರ್ತ್‌ ಮೂವರ್ಸ್‌ ಲಿಮಿಟೆಡ್ (ಬಿಇಎಂಎಲ್‌) ವತಿಯಿಂದ ‘ಬಿಎಚ್‌205ಇ’ ಎಲೆಕ್ಟ್ರಿಕ್‌ ಡಂಪರ್‌ ಅನ್ನು ಸೋಮವಾರ ಇಲ್ಲಿ ಅನಾವರಣಗೊಳಿಸಲಾಯಿತು.

ಬಿಇಎಂಎಲ್‌ ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ದೀಪಕ್ ಕುಮಾರ್ ಹೋಟಾ ಅವರು ವಾಹನವನ್ನು ಲೋಕಾರ್ಪಣೆಗೊಳಿಸಿದರು. ‘ಎನ್‌ಸಿಎಲ್‌’ ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ಪಿ.ಕೆ.ಸಿನ್ಹಾ  ಭಾಗವಹಿಸಿದ್ದರು.

‘ಬಿಎಚ್‌205ಇ’ ಎಲೆಕ್ಟ್ರಿಕ್‌ ಡಂಪರ್‌ ಸಂಪೂರ್ಣ ದೇಶೀಯ ತಂತ್ರಜ್ಞಾನವನ್ನು ಬಳಸಿಕೊಂಡು ನಿರ್ಮಾಣವಾಗಿರುವ ವಿದ್ಯುತ್‌ ಚಾಲಿತ ವಾಹನವಾಗಿದೆ. 2,300 ಎಚ್‌ಪಿ ಸಾಮರ್ಥ್ಯ ಹೊಂದಿದ್ದು, ಸಂಪೂರ್ಣ ಪರಿಸರ ಸ್ನೇಹಿ ಗುಣ ಲಕ್ಷಣಗಳನ್ನು ಹೊಂದಿದೆ. ಇದರಲ್ಲಿ ಸಾಂಪ್ರದಾಯಿಕ ಇಂಧನ ಬಳಸದ ಕಾರಣ, ಯಾವುದೇ ಹಾನಿಕಾರಕ ಅನಿಲ ಹಾಗೂ ತ್ಯಾಜ್ಯ ತೈಲಗಳನ್ನು ಹೊರಹಾಕುವುದಿಲ್ಲ.

ಒಟ್ಟು 335 ಟನ್‌ ತೂಕವಿರುವ ಈ ವಾಹನದಲ್ಲಿ ಪವರ್ ಸ್ಟೀರಿಂಗ್‌ ಹಾಗೂ ಆಧುನಿಕ ಕ್ಯಾಬಿನ್‌ ಇದೆ. ಸುಲಭವಾಗಿ ವಾಹನವನ್ನು ನಿರ್ವಹಣೆ ಮಾಡುವ ಅವಕಾಶ ಇದೆ.