ಮುಂಬೈ: ಉದ್ಯಮಿಗಳು, ಉದ್ಯಮಿಗಳ ಕುಟುಂಬದ ಸದಸ್ಯರು ಜೊತೆಯಾಗಿ ಸಾಮಾಜಿಕ ಉದ್ದೇಶಗಳಿಗಾಗಿ 2030ರೊಳಗೆ ಒಟ್ಟು 1 ಬಿಲಿಯನ್ ಡಾಲರ್ (ಅಂದಾಜು ₹7,989 ಕೋಟಿ) ನಿಧಿ ಸಂಗ್ರಹಿಸುವುದಾಗಿ ಮಂಗಳವಾರ ಹೇಳಿದ್ದಾರೆ.
ನಿಸಾ ಗೋದ್ರೆಜ್, ರೋಹಿಣಿ ನಿಲೇಕಣಿ, ವಿಪ್ರೊ ಕಂಪನಿಯ ಪ್ರೇಮ್ಜಿ ಕುಟುಂಬದ ಸದಸ್ಯರು, ಜೆರೊದಾ ಕಂಪನಿಯ ನಿಖಿಲ್ ಕಾಮತ್ ಈ ಕಾರ್ಯದಲ್ಲಿ ಕೈಜೋಡಿಸಿದ್ದಾರೆ.
ಈ ವೇದಿಕೆಯಲ್ಲಿ ಒಗ್ಗೂಡಿರುವ ಪ್ರತಿಯೊಬ್ಬರೂ ಪ್ರತಿ ವರ್ಷ ಕನಿಷ್ಠ ₹ 50 ಲಕ್ಷ ದೇಣಿಗೆ ನೀಡಲಿದ್ದಾರೆ. ವೇದಿಕೆಯು 2030ರೊಳಗೆ ಐದು ಸಾವಿರ ಸದಸ್ಯರನ್ನು ಹೊಂದುವ ಗುರಿ ಇರಿಸಿಕೊಂಡಿದೆ.
ದೇಶವು ಸುಸ್ಥಿರ ಅಭಿವೃದ್ಧಿ ಗುರಿಗಳನ್ನು ತಲುಪಲು ನೆರವಾಗುವುದು ಇವರು ನಿಧಿ ಸಂಗ್ರಹಿಸುವುದರ ಹಿಂದಿರುವ ಉದ್ದೇಶ ಎಂದು ಪ್ರಕಟಣೆ ತಿಳಿಸಿದೆ.