ನವದೆಹಲಿ: 2020–21ರ ಮೊದಲ ತ್ರೈಮಾಸಿಕದಲ್ಲಿ ಚಿನ್ನದ ಆಮದು ಶೇಕಡ 94ರಷ್ಟು ಇಳಿಕೆ ಕಂಡಿದ್ದು, ಮೌಲ್ಯದ ಲೆಕ್ಕದಲ್ಲಿ ಅದು ₹ 5,160 ಕೋಟಿ ಎಂದು ಕೇಂದ್ರ ವಾಣಿಜ್ಯ ಸಚಿವಾಲಯ ತಿಳಿಸಿದೆ.
ಕೋವಿಡ್‌–19ನಿಂದಾಗಿ ಚಿನ್ನದ ಬೇಡಿಕೆ ಇಳಿಕೆ ಕಂಡಿದೆ. ಹೀಗಾಗಿ ಆಮದು ಸಹ ಕಡಿಮೆಯಾಗಿದೆ. 2019–20ರ ಮೊದಲ ತ್ರೈಮಾಸಿಕದಲ್ಲಿ ₹ 86,250 ಕೋಟಿ ಮೌಲ್ಯದ ಚಿನ್ನ ಆಮದಾಗಿತ್ತು ಎಂದು ಹೇಳಿದೆ. ಬೆಳ್ಳಿ ಆಮದು ಸಹ ಶೇಕಡ 45ರಷ್ಟು ಕಡಿಮೆಯಾಗಿದ್ದು ₹ 4,300 ಕೋಟಿಗಳಷ್ಟಾಗಿದೆ.
ಚಿನ್ನ, ಬೆಳ್ಳಿ ಆಮದಿನಲ್ಲಿ ಆಗಿರುವ ಇಳಿಕೆಯು, ಆಮದು ಮತ್ತು ರಫ್ತು ವಹಿವಾಟಿನ ಮಧ್ಯದ ಅಂತರವಾದ ವ್ಯಾಪಾರ ಕೊರತೆಯು ₹ 3.45 ಲಕ್ಷ ಕೋಟಿಗಳಿಂದ ₹ 68,400 ಕೋಟಿಗಳಿಗೆ ಇಳಿಕೆ ಕಾಣುವಲ್ಲಿ ನೆರವಾಗಿದೆ. ಚಿನ್ನಾಭರಣ ಆಮದು ಶೇಕಡ 72ರಷ್ಟು ಇಳಿಕೆ ಕಂಡಿದ್ದು, ಮೌಲ್ಯದ ಲೆಕ್ಕದಲ್ಲಿ ₹20,250 ಕೋಟಿಗಳಷ್ಟಾಗಿದೆ.
