ಭಾನುವಾರ, ಏಪ್ರಿಲ್ 11, 2021
32 °C

ಓಂಬುಡ್ಸ್‌ಮನ್ ವ್ಯಾಪ್ತಿಗೆ ವಿಮಾ ದಲ್ಲಾಳಿಗಳು

ಪಿಟಿಐ Updated:

ಅಕ್ಷರ ಗಾತ್ರ : | |

ನವದೆಹಲಿ: ಕೇಂದ್ರ ಸರ್ಕಾರವು ವಿಮಾ ಓಂಬುಡ್ಸ್‌ಮನ್‌ ನಿಯಮದಲ್ಲಿ ತಿದ್ದುಪಡಿ ತಂದು ವಿಮಾ ದಲ್ಲಾಳಿಗಳನ್ನು ಓಂಬುಡ್ಸ್‌ಮನ್‌ ವ್ಯಾಪ್ತಿಗೆ ಸೇರಿಸಿದೆ. ಅಲ್ಲದೆ, ಪಾಲಿಸಿದಾರರಿಗೆ ಆನ್‌ಲೈನ್ ಮೂಲಕ ದೂರು ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಬುಧವಾರ ತಿಳಿಸಿದೆ.

ಈ ಮೊದಲು ವ್ಯಾಜ್ಯಗಳಿಗೆ ಸಂಬಂಧಿಸಿದಂತೆ ಮಾತ್ರವೇ ಓಂಬುಡ್ಸ್‌ಮನ್‌ಗೆ ದೂರು ನೀಡಲು ಅವಕಾಶ ಇತ್ತು. ಆದರೆ, ತಿದ್ದುಪಡಿ ನಿಯಮದಲ್ಲಿ ವಿಮೆಗಾರ, ಏಜೆಂಟ್‌, ದಲ್ಲಾಳಿ ಮತ್ತು ಇತರೆ ಮಧ್ಯವರ್ತಿಗಳ ಕಡೆಯಿಂದ ಸೇವೆಯಲ್ಲಿ ಕೊರತೆ ಉಂಟಾದರೂ ದೂರು ನೀಡಲು ಅವಕಾಶ ನೀಡಲಾಗಿದೆ.

2017ರ ವಿಮಾ ಓಂಬುಡ್ಸ್‌ಮನ್‌ ನಿಯಮಗಳಿಗೆ ಸಮಗ್ರ ತಿದ್ದುಪಡಿಗಳನ್ನು ಕೇಂದ್ರ ಸರ್ಕಾರವು ಮಾರ್ಚ್ 2ರಂದು ಪ್ರಕಟಿಸಿದೆ. ವಿಮಾ ಸೇವೆಗಳಲ್ಲಿನ ನ್ಯೂನತೆಗಳ ಕುರಿತಾದ ದೂರುಗಳನ್ನು ಸಮಯಕ್ಕೆ ಸರಿಯಾಗಿ, ನಿಷ್ಪಕ್ಷಪಾತ ರೀತಿಯಲ್ಲಿ ಪರಿಹರಿಸಲು ಅನುಕೂಲ ಆಗುವಂತೆ ವಿಮಾ ಓಂಬುಡ್ಸ್‌ಮನ್‌ ವ್ಯವಸ್ಥೆಯ ಕಾರ್ಯವಿಧಾನದಲ್ಲಿ ಸುಧಾರಣೆ ತರುವ ಉದ್ದೇಶದಿಂದ ತಿದ್ದುಪಡಿ ಮಾಡಲಾಗಿದೆ.

ಓಂಬುಡ್ಸ್‌ಮನ್‌ಗೆ ಆನ್‌ಲೈನ್‌ ಮೂಲಕ ದೂರು ನೀಡಲು ಪಾಲಿಸಿದಾರರಿಗೆ ಅವಕಾಶ ಇರಲಿದೆ. ಪಾಲಿಸಿದಾರರು ತಮ್ಮ ದೂರುಗಳ ಸ್ಥಿತಿ ಏನಿದೆ ಎಂಬುದನ್ನು ಆನ್‌ಲೈನ್‌ ಮೂಲಕ ಗಮನಿಸಲು ಅನುಕೂಲ ಆಗುವಂತೆ ದೂರು ನಿರ್ವಹಣಾ ವ್ಯವಸ್ಥೆಯನ್ನು ರೂಪಿಸಲಾಗುತ್ತದೆ. ಅಲ್ಲದೆ, ವಿಚಾರಣೆಗೆ ವಿಡಿಯೊ ಕಾನ್ಫರೆನ್ಸ್‌ ವ್ಯವಸ್ಥೆಯನ್ನು ಸಹ ಓಂಬುಡ್ಸ್‌ಮನ್‌ ಬಳಸಬಹುದಾಗಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು