ವಿಮಾ ವಲಯ: ₹54 ಸಾವಿರ ಕೋಟಿ ಎಫ್‌ಡಿಐ

ಸರ್ಕಾರವು ಸಾಗರೋತ್ತರ ಬಂಡವಾಳ ಹರಿವಿನ ನಿಯಮಾವಳಿಗಳನ್ನು ಮತ್ತಷ್ಟು ಉದಾರೀಕರಣ ಮಾಡಿದ್ದರಿಂದ ವಿಮಾ ವಲಯದಲ್ಲಿ ಈ ಬಂಡವಾಳದ ಒಳಹರಿವು ಆಗಿದೆ ಎಂದು ಹಣಕಾಸು ಸೇವೆಗಳ ಕಾರ್ಯದರ್ಶಿ ವಿವೇಕ್‌ ಜೋಶಿ ಪಿಟಿಐಗೆ ತಿಳಿಸಿದ್ದಾರೆ.

2014ರ ಡಿಸೆಂಬರ್‌ನಿಂದ 2024ರ ಜನವರಿ ನಡುವೆ ₹53,900 ಕೋಟಿಯಷ್ಟು ಎಫ್‌ಡಿಐನ್ನು ವಿಮಾ ಕಂಪನಿಗಳು ಸ್ವೀಕರಿಸಿವೆ. ಇದೇ ಅವಧಿಯಲ್ಲಿ ವಿಮಾ ಕಂಪನಿಗಳ ಸಂಖ್ಯೆಯು 53ರಿಂದ 70ಕ್ಕೆ ಹೆಚ್ಚಳವಾಗಿದೆ.

2013–14ರಲ್ಲಿ ₹21 ಲಕ್ಷ ಕೋಟಿಯಿದ್ದ ನಿರ್ವಹಣಾ ಸಂಪತ್ತಿನ ಮೌಲ್ಯವು (ಎಯುಎಂ) ಪ್ರಸ್ತುತ ₹60 ಲಕ್ಷ ಕೋಟಿಗೆ ಏರಿಕೆ ಆಗಿದೆ. ವಿಮಾ ಪ್ರೀಮಿಯಂ ₹3.94 ಲಕ್ಷ ಕೋಟಿಯಿಂದ ₹10.4 ಲಕ್ಷ ಕೋಟಿಗೆ ಹೆಚ್ಚಳವಾಗಿದೆ ಎಂದು ತಿಳಿಸಿದ್ದಾರೆ.