ಪಿಎಂಸಿ ಬ್ಯಾಂಕ್‌ನ ಸಣ್ಣ ಠೇವಣಿದಾರರಿಗೆ, ಆ ಬ್ಯಾಂಕ್‌ಯುಎಸ್‌ಎಫ್‌ಬಿ ತೆಕ್ಕೆಗೆ ಸೇರಿದ ನಂತರ ಅಲ್ಲಿ ಹಣ ಇರಿಸಲು ಮನಸ್ಸಿಲ್ಲದಿದ್ದರೆ ಹಣವನ್ನು ಹಂತ ಹಂತವಾಗಿ ಹಿಂದಕ್ಕೆ ಪಡೆದುಕೊಳ್ಳಬಹುದು. ಆರಂಭದಲ್ಲಿ, ಠೇವಣಿ ವಿಮೆ ಮತ್ತು ಸಾಲ ಖಾತರಿ ನಿಗಮದ ಕಡೆಯಿಂದ ಸಿಗುವ ₹ 5 ಲಕ್ಷದವರೆಗಿನ ಮೊತ್ತವನ್ನು ಠೇವಣಿದಾರರಿಗೆ ನೀಡಲಾಗುತ್ತದೆ. ಅದಾದ ಎರಡು ವರ್ಷಗಳ ನಂತರದಲ್ಲಿ ₹ 50 ಸಾವಿರ, ಮೂರು ವರ್ಷಗಳ ನಂತರ ₹ 1 ಲಕ್ಷ, ನಾಲ್ಕು ವರ್ಷಗಳ ನಂತರ ₹ 3 ಲಕ್ಷ, ಐದು ವರ್ಷಗಳ ನಂತರ ₹ 5.5 ಲಕ್ಷವನ್ನು ಹಿಂದಕ್ಕೆ ಪಡೆಯಬಹುದು. 10 ವರ್ಷಗಳು ಪೂರ್ಣಗೊಂಡ ನಂತರ ಅವರು ತಮ್ಮ ಅಷ್ಟೂ ಠೇವಣಿಯನ್ನು ಹಿಂದಕ್ಕೆ ಪಡೆಯಬಹುದು ಎಂದು ಸೋಮವಾರ ಪ್ರಕಟಿಸಲಾಗಿರುವ ಕರಡು ನಿಯಮಗಳಲ್ಲಿ ಹೇಳಲಾಗಿದೆ.
