ನವದೆಹಲಿ: ಟಾಟಾ ಟೆಕ್ನಾಲಜೀಸ್ ಕಂಪನಿಯು ತನ್ನ ಷೇರುಗಳನ್ನು ಸಾರ್ವಜನಿಕ ಖರೀದಿಗೆ ಮುಕ್ತಗೊಳಿಸುವ (ಆರಂಭಿಕ ಷೇರು ಮಾರಾಟ– ಐಪಿಒ) ಮೂಲಕ ನವೆಂಬರ್ 22ರಂದು ಷೇರುಪೇಟೆ ಪ್ರವೇಶಿಸಲಿದೆ.
ನವೆಂಬರ್ 22 ರಿಂದ 24ರವರೆಗೆ ಷೇರುಗಳನ್ನು ಖರೀದಿಸಲು ಅವಕಾಶ ಇರಲಿದೆ. ಐಪಿಒ ಮೂಲಕ 6 ಕೋಟಿ ಷೇರುಗಳನ್ನು ಮಾರಾಟ ಮಾಡಲಾಗುವುದು ಎಂದು ಟಾಟಾ ಮೋಟರ್ಸ್ ಕಂಪನಿಯು ಷೇರುಪೇಟೆಗೆ ತಿಳಿಸಿದೆ.
ಈ ಪ್ರಕ್ರಿಯೆಯ ಭಾಗವಾಗಿ, ಟಾಟಾ ಮೋಟರ್ಸ್ ಕಂಪನಿಯು ಶೇ 11.4ರಷ್ಟು ಷೇರುಗಳನ್ನು, ಆಲ್ಫಾ ಟಿಸಿ ಹೋಲ್ಡಿಂಗ್ಸ್ ಶೇ 2.4ರಷ್ಟು ಷೇರುಗಳನ್ನು ಮತ್ತು ಟಾಟಾ ಕ್ಯಾಪಿಟಲ್ ಗ್ರೋತ್ ಫಂಡ್ 1 ಶೇ 1.2ರಷ್ಟು ಷೇರುಗಳನ್ನು ಮಾರಾಟ ಮಾಡಲಿವೆ.
ಟಾಟಾ ಟೆಕ್ನಾಲಜೀಸ್ನಲ್ಲಿ ಇರುವ ಶೇ 9.9ರಷ್ಟು ಷೇರುಗಳನ್ನು ಟಿಪಿಜಿ ರೈಸ್ ಕ್ಲೈಮೇಟ್ ಕಂಪನಿಗೆ ₹1,613 ಕೋಟಿಗೆ ಮಾರಾಟ ಮಾಡುವುದಾಗಿ ಕಳೆದ ತಿಂಗಳು ಟಾಟಾ ಮೋಟರ್ಸ್ ಹೇಳಿತ್ತು.