ಎವರೆಸ್ಟ್‌ ಶಿಖರವೇರಿದ ಚೀನಿ ‘ವಿಶೇಷ’ ವ್ಯಕ್ತಿ
ಕಠ್ಮಂಡು: ಅಂಗವೈಕಲ್ಯ ಸಾಧನೆಗೆ ಅಡ್ಡಿಯಲ್ಲ ಎಂಬುದಕ್ಕೆ ಚೀನಾದ ಪರ್ವತಾರೋಹಿ ಕ್ಸಿಯಾ ಬೊಯು ಸಾಕ್ಷಿ. ವಿಶ್ವದ ಅತಿ ಎತ್ತರದ ಶಿಖರ ಎವರೆಸ್ಟ್‌ ಅನ್ನು ಸೋಮವಾರ ಏರಿದ ಕ್ಸಿಯಾ ‘ವಿಶೇಷ’ ಸಾಧನೆಗೆ ಪಾತ್ರರಾಗಿದ್ದಾರೆ. ವಿಶೇಷ ಏಕೆಂದರೆ, ಕ್ಸಿಯಾಗೆ ಎರಡೂ ಕಾಲುಗಳಿಲ್ಲ!
ತೀವ್ರ ಶೈತ್ಯದ ಕಾರಣ ಚರ್ಮದಲ್ಲಿ ಹುಣ್ಣಾಗಿ ಕ್ಸಿಯಾ ಎರಡೂ ಕಾಲುಗಳನ್ನು ನಾಲ್ಕು ದಶಕಗಳ ಹಿಂದೆಯೇ ಕಳೆದುಕೊಂಡಿದ್ದಾರೆ. ಶಿಖರವೇರುವ ಪ್ರಯತ್ನದಲ್ಲಿದ್ದಾಗಲೇ ಅವರು ಹಿಮ ಹುಣ್ಣಿಗೆ ತುತ್ತಾಗಿದ್ದರು. ಛಲ ಬಿಡದ ಕ್ಸಿಯಾ, ಐದನೇ ಪ್ರಯತ್ನದಲ್ಲಿ 29,029 ಅಡಿ (8,848 ಮೀಟರ್) ಎತ್ತರದ ಈ ಶಿಖರ ಏರಿದ್ದಾರೆ. ಇವರೊಂದಿಗೆ ಇತರೆ ಏಳು ಜನರ ತಂಡವೂ ಶಿಖರ ಏರುವಲ್ಲಿ ಯಶಸ್ವಿಯಾಗಿದೆ.
ಎರಡೂ ಕಾಲುಗಳಿಲ್ಲದವರು ಹಾಗೂ ಅಂಧರು ಎವರೆಸ್ಟ್‌ ಶಿಖರ ಏರುವುದನ್ನು ನೇಪಾಳ ಸರ್ಕಾರ ಕಳೆದ ವರ್ಷ ನಿಷೇಧ ಮಾಡಿತ್ತು. ಈ ಆದೇಶ ರದ್ದುಗೊಳಿಸಿದ ನೇಪಾಳದ ಸುಪ್ರೀಂಕೋರ್ಟ್‌, ಈ ನಿರ್ಧಾರ ಅಂಗವಿಕಲರ ವಿರುದ್ಧದ ತಾರತಮ್ಯ ನೀತಿಯಂತಿದೆ ಎಂದು ಅಭಿಪ್ರಾಯಪಟ್ಟಿತ್ತು. ನಂತರ ಸರ್ಕಾರ ತನ್ನ ಆದೇಶ ಹಿಂತೆಗೆದುಕೊಂಡಿತ್ತು.
‘ಎವರೆಸ್ಟ್‌ ಶಿಖರ ಏರುವುದು ನನ್ನ ಕನಸಾಗಿತ್ತು. ಅದನ್ನು ಈಗ ನನಸು ಮಾಡಿಕೊಂಡಿದ್ದೇನೆ. ನನಗೆ ಇದೊಂದು ಸವಾಲಾಗಿತ್ತು. ಅದೂ ಹಣೆಬರಹದ ಸವಾಲು. ಅದನ್ನು ನಾನು ಮೆಟ್ಟಿ ನಿಂತಿದ್ದೇನೆ’ ಎಂದು ಕ್ಸಿಯಾ ಸಂತಸ ಹಂಚಿಕೊಂಡಿದ್ದಾರೆ.
ಎರಡೂ ಕಾಲುಗಳಿಲ್ಲದೆ ಶಿಖರವೇರಿದ ಎರಡನೇ ಪರ್ವತಾರೋಹಿ ಕ್ಸಿಯಾ ಅಬು. 2006ರಲ್ಲಿ ನ್ಯೂಜಿಲೆಂಡ್‌ನ ಮಾರ್ಕ್‌ ಐಂಗ್ಲಿಸ್ ಈ ಸಾಧನೆ ಮಾಡಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.