ಭಾನುವಾರ, ಜೂನ್ 7, 2020
22 °C

ಪ್ರಶ್ನೋತ್ತರ | ಎಲ್‌ಐಸಿ ಪಾಲಿಸಿ ಉತ್ತಮ ಹೂಡಿಕೆಯೇ?

ಯು ಪಿ ಪುರಾಣಿಕ್ Updated:

ಅಕ್ಷರ ಗಾತ್ರ : | |

ಶಾಂತಾಕುಮಾರಿ, ಬೈಲಹೊಂಗಲ

ನಾನು ಹೈಸ್ಕೂಲ್‌ ಟೀಚರ್‌. ವಯಸ್ಸು 41. ಪತಿ ಸಣ್ಣ ವ್ಯವಹಾರದ ಅಂಗಡಿ ಇಟ್ಟಿದ್ದಾರೆ. ನನಗೆ 7 ವರ್ಷದ ಹೆಣ್ಣು ಮಗು ಹಗೂ 5 ವರ್ಷದ ಗಂಡು ಮಗು ಇದೆ. ನನ್ನ ಹೆಸರಿನಲ್ಲಿ ನಿವೇಶನ ಹಾಗೂ ಬಹಳ ಹಳೆಯದಾದ ಮನೆ ಇದೆ. ಇದನ್ನು ಕೆಡವಿ ₹ 30 ಲಕ್ಷ ಗೃಹ ಸಾಲ ಪಡೆದು ಮನೆಕಟ್ಟಿಸಬೇಕೆಂದಿರುವೆ. ನನ್ನ ಒಟ್ಟು ಸಂಬಳ ₹ 60 ಸಾವಿರ. ಕಡಿತದ ನಂತರ ₹53,000 ಕೈಗೆ ಬರುತ್ತದೆ. ಮಕ್ಕಳ ವಿದ್ಯಾಭ್ಯಾಸ ಹಾಗೂ ಮುಂದಿನ ಜೀವನ ಗಮನದಲ್ಲಿ ಇಟ್ಟುಕೊಂಡು ನಾನು ಮನೆ ಕಟ್ಟಿಸುವುದು ಸೂಕ್ತವೇ ತಿಳಿಸಿ.

ಉತ್ತರ: ನೀವು ವಾಸವಾಗಿರುವ ಮನೆ ದುರಸ್ತಿ ಮಾಡಿಸಿದರೆ ವಾಸಕ್ಕೆ ಯೋಗ್ಯವಾದರೆ, ಹೊಸ ಮನೆ ಕಟ್ಟಿಸುವ ಅವಶ್ಯವಿಲ್ಲ. ಇದೇ ವೇಳೆ, ದುರಸ್ತಿಗೆಂದು ಪ್ರಾರಂಭಿಸಿ ಬಹಳಷ್ಟು ಖರ್ಚು ಬರುವುದಾದರೆ ಹೊಸ ಮನೆ ಕಟ್ಟಿಸುವುದೇ ಲೇಸು. ನಿಮ್ಮ ಪತಿ ಮನೆ ಖರ್ಚು ನೋಡಿಕೊಳ್ಳಲಿ. ನೀವು ಈಗಲೇ ಗೃಹ ಸಾಲ ಪಡೆಯಿರಿ. ನಿಮಗೆ 19 ವರ್ಷ ಸೇವಾವಧಿ ಇರುವುದರಿಂದ ₹ 30 ಲಕ್ಷ ಗೃಹ ಸಾಲಕ್ಕೆ ಸಮೀಪದಲ್ಲಿ ಮಾಸಿಕ ಸಮಾನ ಕಂತು ₹30 ಸಾವಿರ ಬರಬಹುದು. ಇಎಂಐ ತುಂಬಿದ ನಂತರವೂ ನಿಮ್ಮೊಡನೆ ₹ 23,000 ಉಳಿಯುತ್ತದೆ. ಸಾಧ್ಯವಾದರೆ ಪಿಪಿಎಫ್‌ ಖಾತೆ ತೆರೆದು ಮಾಸಿಕ ₹ 5 ಸಾವಿರ, ಹೆಣ್ಣು ಮಗುವಿನ ಸಲುವಾಗಿ ಸುಕನ್ಯಾ ಸಮೃದ್ಧಿಯಲ್ಲಿ ಮಾಸಿಕ ₹ 5 ಸಾವಿರ ಹಾಗೂ ಗಂಡು ಮಗುವಿನ ಸಲುವಾಗಿ ಮಾಸಿಕ ₹ 5 ಸಾವಿರ ಆರ್‌.ಡಿ ಮಾಡಿ. ಎರಡೂ ಮಕ್ಕಳ ಸಲುವಾಗಿ ವಾರ್ಷಿಕ ತಲಾ ₹ 10ಗ್ರಾಂ ಬಂಗಾರ ಕೊಳ್ಳಿ.

ಮಹಾಂತೇಶ, ಗುಳೇದಗುಡ್ಡ

ನಾನು ಪ್ರಾಥಮಿಕ ಶಾಲಾ ಶಿಕ್ಷಕ. ವಯಸ್ಸು 32. ತಿಂಗಳ ಸಂಬಳ ₹ 32,700. ಎಲ್‌ಐಸಿಯವರ ಮೂರು ಪಾಲಿಸಿ ಮಾಡಿಸಿ ಮಾಸಿಕ ಕಂತು ₹ 12 ಸಾವಿರ ತುಂಬುತ್ತಿದ್ದೇನೆ. ಪಾಲಿಸಿ ಅವಧಿ 10–12 ವರ್ಷಗಳು. ಇದು ಉತ್ತಮ ಹೂಡಿಕೆಯೇ. ಬೇರಾವುದೇ ಉಳಿತಾಯ ಮಾಡಿಲ್ಲ. 

ಉತ್ತರ: ಪ್ರತಿಯೊಬ್ಬ ವ್ಯಕ್ತಿಗೂ ಜೀವ ವಿಮೆ ಅಗತ್ಯವಿದೆ. ಆದರೆ, ಇಲ್ಲಿ ಓರ್ವ ವ್ಯಕ್ತಿ ತನ್ನ ಒಟ್ಟು ಆದಾಯದ ಶೇ 10–15ರಷ್ಟು ಮಾತ್ರ ಹೂಡಿಕೆ ಮಾಡುವುದು ಸೂಕ್ತ. ಜೀವ ವಿಮೆಯಲ್ಲಿ ವಿಮೆಗೆ ಪ್ರಾಧಾನ್ಯ ಹೊರತು ಉಳಿತಾಯಕ್ಕಲ್ಲ. ಇದೇ ವೇಳೆ ಹೆಚ್ಚಿನ ಮೊತ್ತದ ವಿಮೆ ಪಾಲಿಸಿ ಬೇಕೆಂದಾದರೆ ಎಲ್‌ಐಸಿ–ಟರ್ಮ್‌ ಇನ್ಶುರೆನ್ಸ್‌ ಪಾಲಿಸಿ ಮಾಡುವುದು ಸರಿ ಇರುತ್ತದೆ. ಇಲ್ಲಿ ಅವಧಿ ಮುಗಿದು ಹಣ ಪಡೆಯುವಂತಿಲ್ಲವಾದರೂ ಪಾಲಿಸಿ ಮೊತ್ತ ವ್ಯಕ್ತಿಯ ಮರಣದ ಸಂದರ್ಭದಲ್ಲಿ ನಾಮ ನಿರ್ದೇಶಕರು ಪಡೆಯಬಹುದು. ದೊಡ್ಡ ಮೊತ್ತದ ಪಾಲಿಸಿಯ ಪ್ರೀಮಿಯಂ ಹಣ ಬಹಳ ಕಡಿಮೆ ಇರುತ್ತದೆ.  ಪಡೆದಿರುವ ಪಾಲಿಸಿ ಎಂದಿಗೂ ನಿಲ್ಲಿಸಬೇಡಿ. ಮಧ್ಯದಲ್ಲಿ ನಿಲ್ಲಿಸಿದರೆ ಕಟ್ಟಿದ ಹಣ ಕೂಡಾ ಸಿಗುವುದಿಲ್ಲ. ಮುಂದೆ ಎಷ್ಟಾದರೂ ಆರ್‌.ಡಿ ಮಾಡಿ. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು