ಕೆಲಸ ವಿಳಂಬ; ಅಧಿಕಾರಿಗಳ ವಿರುದ್ಧ ಎಸಿಬಿಗೆ ದೂರು ನೀಡಬಹುದು!

7
ಭ್ರಷ್ಟಾಚಾರ ನಿಗ್ರಹಕ್ಕೆ ಕೇಂದ್ರದ ಹೊಸ ಕಾನೂನಿನಿಂದ ಇನ್ನಷ್ಟು ಬಲ

ಕೆಲಸ ವಿಳಂಬ; ಅಧಿಕಾರಿಗಳ ವಿರುದ್ಧ ಎಸಿಬಿಗೆ ದೂರು ನೀಡಬಹುದು!

Published:
Updated:
Deccan Herald

ಬೆಳಗಾವಿ: ನಿಗದಿತ ಸಮಯದೊಳಗೆ ಸರ್ಕಾರಿ ಸೇವೆಗಳನ್ನು ಜನರಿಗೆ ಒದಗಿಸದ ಅಧಿಕಾರಿಗಳ ವಿರುದ್ಧ ಇನ್ನು ಮುಂದೆ ಭ್ರಷ್ಟಾಚಾರ ನಿರ್ಮೂಲನಾ ಕಾಯ್ದೆ– 2018 ಅಡಿ ಕ್ರಮ ಜರುಗಿಸಬಹುದಾಗಿದೆ. ಅನಾವಶ್ಯಕವಾಗಿ ಅಥವಾ ‘ಏನನ್ನೋ ನಿರೀಕ್ಷೆ’ ಮಾಡುವುದಕ್ಕಾಗಿ ವಿಳಂಬ ಮಾಡಿರುವುದು ಸಾಬೀತಾದರೆ, ಅಧಿಕಾರಿಗೆ 3ರಿಂದ 7 ವರ್ಷದವರೆಗೆ ಜೈಲು ಶಿಕ್ಷೆ ವಿಧಿಸಲು ಈ ಕಾಯ್ದೆಯಲ್ಲಿ ಅವಕಾಶವಿದೆ.

‘ಭ್ರಷ್ಟಾಚಾರ ನಿರ್ಮೂಲನೆಗೊಳಿಸಲು ಹೊರಟಿರುವ ಕೇಂದ್ರ ಸರ್ಕಾರ, ಇದೇ ವರ್ಷದ ಜುಲೈ 26ರಂದು ಇಂತಹದೊಂದು ಕಾನೂನನ್ನು ಜಾರಿಗೊಳಿಸಿದೆ. ಸರ್ಕಾರಿ ಸೇವೆ ಪಡೆಯ‌ಲು ತೊಂದರೆಗೆ ಒಳಗಾದ ಜನರು ತಮ್ಮ ಸಮೀಪದ ಭ್ರಷ್ಟಾಚಾರ ನಿಗ್ರಹ ದಳ (ಎಸಿಬಿ) ಅಧಿಕಾರಿಗಳಿಗೆ ದೂರು ನೀಡಿದರೆ ಸಾಕು, ತೊಂದರೆ ನೀಡಿದ ಅಧಿಕಾರಿಗಳ ವಿರುದ್ಧ ಖಂಡಿತವಾಗಿಯೂ ಕ್ರಮ ಕೈಗೊಳ್ಳುತ್ತೇವೆ’ ಎಂದು ಎಸಿಬಿ ಬೆಳಗಾವಿ ಉತ್ತರ ವಲಯದ ಎಸ್ಪಿ ಅಮರನಾಥ ರೆಡ್ಡಿ ‘ಪ್ರಜಾವಾಣಿ’ಗೆ ತಿಳಿಸಿದರು.

ಸಾಕಷ್ಟು ಸಹಾಯ:

ಪ್ರತಿಯೊಂದು ಸೇವೆ ನೀಡಲು ಸರ್ಕಾರವು ‘ಸಕಾಲ’ ಯೋಜನೆಯಡಿ ಸಮಯ ನಿಗದಿಪಡಿಸಿದೆ. ಈ ಅವಧಿಯೊಳಗೆ ಅರ್ಜಿದಾರರು ಬಯಸಿದ ಸೇವೆಯನ್ನು ನೀಡಬೇಕು. ಇಲ್ಲದಿದ್ದರೆ, ಯಾವ ಕಾರಣಕ್ಕಾಗಿ ನೀಡಲಾಗುತ್ತಿಲ್ಲ ಅಥವಾ ಏನಾದರೂ ಸಮಸ್ಯೆ ಇದೆಯೇ ಎನ್ನುವುದನ್ನು ಅರ್ಜಿದಾರರ ಗಮನಕ್ಕೆ ತಂದಿರಬೇಕು. ಇದಕ್ಕೆ ಸಂಬಂಧಿಸಿದಂತೆ ಪತ್ರ ವ್ಯವಹಾರ ಅಥವಾ ಹಿಂಬರಹ ನೀಡಿರಬೇಕು.

ಇದ್ಯಾವುದನ್ನೂ ಮಾಡದೇ ಸುಖಾಸುಮ್ಮನೇ ಅರ್ಜಿಗಳನ್ನು ಇಟ್ಟುಕೊಂಡಿದ್ದರೆ ಅದು ಕೂಡ ಭ್ರಷ್ಟಾಚಾರಕ್ಕೆ ಇಂಬು ಕೊಟ್ಟಂತಾಗುತ್ತದೆ. ಈ ನಿಟ್ಟಿನಲ್ಲಿ ಅಂತಹ ಅಧಿಕಾರಿಗಳ ವಿರುದ್ಧ ಭ್ರಷ್ಟಾಚಾರ ನಿರ್ಮೂಲನಾ ಕಾಯ್ದೆಯಡಿ ಪ್ರಕರಣ ದಾಖಲಿಸಲು ಸಾಧ್ಯ ಎಂದು ಹೇಳಿದರು.

ರಾಜ್ಯದಲ್ಲಿಯೇ ಹೆಚ್ಚು:

ಸರ್ಕಾರಿ ವ್ಯವಸ್ಥೆಯಲ್ಲಿರುವ ಭ್ರಷ್ಟಾಚಾರವನ್ನು ನಿರ್ಮೂಲನಗೊಳಿಸಬೇಕೆನ್ನುವ ಉದ್ದೇಶದಿಂದ ಅಸ್ತಿತ್ವಕ್ಕೆ ಬಂದಿರುವ ಭ್ರಷ್ಟಾಚಾರ ನಿಗ್ರಹ ದಳಕ್ಕೆ (ಎಸಿಬಿ) ದೂರುಗಳ ಮಹಾಪೂರ ಹರಿದುಬರುತ್ತಿದ್ದು, ಬೆಳಗಾವಿ ಉತ್ತರ ವಲಯದಲ್ಲಿ ಈ ವರ್ಷ 56 ಪ್ರಕರಣಗಳು ದಾಖಲಾಗಿವೆ. ಅಥಣಿಯಲ್ಲಿನ ವಾಣಿಜ್ಯ ತೆರಿಗೆ ಇಲಾಖೆಯ ಕಚೇರಿಯ ಮೇಲೆ ಒಂದು ಸಲ ಹಾಗೂ ವಿಜಯಪುರದ ಝಳಕಿ ಆರ್‌ಟಿಒ ಚೆಕ್‌ಪೋಸ್ಟ್‌ ಮೇಲೆ ಎರಡು ಸಲ ಸ್ವಯಂ ಪ್ರೇರೀತ ದಾಳಿಯೂ ಇದರಲ್ಲಿ ಸೇರಿದೆ.

ಜನಸ್ಪಂದನ ಸಭೆ:

ದೂರುಗಳನ್ನು ಪಡೆಯಲು ಎಸಿಬಿ ತಂಡವು ಪ್ರತಿ ತಿಂಗಳು ವಿವಿಧ ಸ್ಥಳಗಳಲ್ಲಿ ಜನಸ್ಪಂದನ ಸಭೆ ಆಯೋಜಿಸುತ್ತಿದೆ. ಇದೇ 25ರಂದು ಗೋಕಾಕ ನಗರಸಭೆ, ರಾಯಬಾಗ ತಾಲ್ಲೂಕು ಪಂಚಾಯ್ತಿ ಕಚೇರಿ, 26ರಂದು ಸಂಕೇಶ್ವರ ಪುರಸಭೆ ಕಚೇರಿ, ಚಿಕ್ಕೋಡಿ ಪುರಸಭೆ ಕಚೇರಿ, 27ರಂದು ಖಾನಾಪುರ ನಿರೀಕ್ಷಣಾ ಮಂದಿರ, ಅಥಣಿ ಪುರಸಭೆ, 29ರಂದು ರಾಮದುರ್ಗ ನಿರೀಕ್ಷಣಾ ಮಂದಿರ, ಸವದತ್ತಿ ನಿರೀಕ್ಷಣಾ ಮಂದಿರ, 30ರಂದು ಬೈಲಹೊಂಗಲ ನಿರೀಕ್ಷಣಾ ಮಂದಿರ ಹಾಗೂ ಕಿತ್ತೂರು ನಿರೀಕ್ಷಣಾ ಮಂದಿರದಲ್ಲಿ ಸಭೆ ಆಯೋಜಿಸಿದೆ.

ಕಾನೂನುಬದ್ಧವಾದ ಸರ್ಕಾರಿ ಕೆಲಸಗಳನ್ನು ಮಾಡಿಕೊಡಲು ಅಧಿಕಾರಿಗಳು ಮಾಡಿಕೊಡದಿದ್ದರೆ, ಕಿರಿಕಿರಿ ಮಾಡುತ್ತಿದ್ದರೆ ಅಥವಾ ಲಂಚಕ್ಕಾಗಿ ಬೇಡಿಕೆಯಿಟ್ಟಿದ್ದರೆ ಸಾರ್ವಜನಿಕರು ಸಭೆಯಲ್ಲಿ ಹಾಜರಾಗಿ ದೂರು ನೀಡಬಹುದು. ದೂರುದಾರರ ಹೆಸರನ್ನು ಗೋಪ್ಯವಾಗಿಡಲಾಗುವುದು ಎಂದು ಎಸ್ಪಿ ಅಮರನಾಥ ರೆಡ್ಡಿ ತಿಳಿಸಿದರು.

ಸಹಾಯವಾಣಿ:

ದೂರವಾಣಿ ಸಂಖ್ಯೆ 080 22342100, ಮೊಬೈಲ್‌ ಸಂಖ್ಯೆ 9480806300, ಫೇಸ್‌ಬುಕ್‌– anticorruptionbureau.karnataka2016  ಟ್ವಿಟ್ಟರ್‌– @acbkarnataka ಮೂಲಕ ದೂರು ನೀಡಬಹುದು. 

 

 

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !