ಬೆಂಗಳೂರು: ರಾಜ್ಯ ಸರ್ಕಾರವು ತನ್ನದೇ ಅಧೀನದ ವಿವಿಧ ಇಲಾಖೆಗಳು ಮತ್ತು ಸಂಸ್ಥೆಗಳಿಗೆ ನೀಡಿರುವ ₹10,389.78 ಕೋಟಿ ಸಾಲ ದಶಕಗಳಿಂದಲೂ ವಸೂಲಾಗಿಲ್ಲ. ಬೆಂಗಳೂರು ಜಲಮಂಡಳಿ ಮತ್ತು ಕರ್ನಾಟಕ ಬೀಜ ನಿಗಮಕ್ಕೆ 47 ವರ್ಷಗಳ ಹಿಂದೆ ನೀಡಿದ್ದ ಸಾಲಗಳೂ ಈ ಪಟ್ಟಿಯಲ್ಲಿವೆ.
2022–23ನೇ ಆರ್ಥಿಕ ವರ್ಷಕ್ಕೆ ಸಂಬಂಧಿಸಿದಂತೆ ರಾಜ್ಯ ಹಣಕಾಸು ಲೆಕ್ಕಪತ್ರಗಳ ಕುರಿತ ಪ್ರಧಾನ ಮಹಾಲೇಖಪಾಲರ (ಸಿಎಜಿ) ವರದಿಯನ್ನು ವಿಧಾನಸಭೆಯಲ್ಲಿ ಮಂಗಳವಾರ ಮಂಡಿಸಲಾಯಿತು. ಎಂಟು ಇಲಾಖೆಗಳ 21 ಸಂಸ್ಥೆಗಳಿಗೆ ನೀಡಿರುವ ಸಾಲವು ದಶಕಗಳು ಕಳೆದರೂ ಬಾಕಿ ಇದೆ ಎಂಬುದು ವರದಿಯಲ್ಲಿ ಬಹಿರಂಗವಾಗಿದೆ.
‘ಎಂಟು ಇಲಾಖೆಗಳಿಗೆ ಸಂಬಂಧಿಸಿದ 21 ಸಂಸ್ಥೆಗಳು ಸರ್ಕಾರದಿಂದ ಪಡೆದಿದ್ದ ಸಾಲದ ಅಸಲನ್ನು ಕೂಡ ದಶಕಗಳಿಂದ ಮರುಪಾವತಿ ಮಾಡಿಲ್ಲ. ಸಾಲ ಮಂಜೂರಾತಿಯ ಸಂದರ್ಭದಲ್ಲಿ ಮರುಪಾವತಿ ಕುರಿತು ವಿಧಿಸಿದ್ದ ಷರತ್ತುಗಳನ್ನು ಪಾಲಿಸುವಲ್ಲಿ ಈ ಸಾಲಗಾರ ಸಂಸ್ಥೆಗಳು ವಿಫಲವಾಗಿವೆ’ ಎಂದು ಸಿಎಜಿ ಹೇಳಿದೆ.
ಈ ಸಾಲಗಾರ ಸಂಸ್ಥೆಗಳಿಂದ ಸರ್ಕಾರಕ್ಕೆ ₹9,380 ಕೋಟಿ ಅಸಲು ಬಾಕಿ ಇದೆ. ಚಕ್ರಬಡ್ಡಿಯೂ ಸೇರಿದರೆ ಬಾಕಿ ಮೊತ್ತವು ₹15,856 ಕೋಟಿಯಷ್ಟಾಗುತ್ತದೆ ಎಂಬ ಉಲ್ಲೇಖ ವರದಿಯಲ್ಲಿದೆ.
