ನವದೆಹಲಿ: ಮೊಬೈಲ್‌ ಮೂಲ ಸಂಖ್ಯೆಯನ್ನು ಉಳಿಸಿಕೊಂಡು ಸೇವಾಸಂಸ್ಥೆಯನ್ನು ಮಾತ್ರ ಬದಲಾಯಿಸಿಕೊಳ್ಳುವ (ಮೊಬೈಲ್‌ ನಂಬರ್‌ ಪೊರ್ಟೆಬಿಲಿಟಿ– ಎಂಎನ್‌ಪಿ) ಗ್ರಾಹಕರಿಗೆ ವಿಧಿಸಲಾಗುತ್ತಿದ್ದ ಶುಲ್ಕವನ್ನು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಶೇ 79ರಷ್ಟು ಕಡಿತಗೊಳಿಸಿದೆ.
ಇಲ್ಲಿಯವರೆಗೆ ಈ ಪ್ರಕ್ರಿಯೆಗೆ ಗ್ರಾಹಕರಿಗೆ ₹19 ಶುಲ್ಕ ವಿಧಿಸಲಾಗುತಿತ್ತು. ಇನ್ನು ಮುಂದೆ ಮೊಬೈಲ್‌ ಸೇವಾ ಸಂಸ್ಥೆ ಬದಲಾಯಿಸುವ ಗ್ರಾಹಕರಿಂದ ₹4ಕ್ಕಿಂತ ಹೆಚ್ಚಿನ ಶುಲ್ಕ ವಸೂಲಿ ಮಾಡುವಂತಿಲ್ಲ.
ಗ್ರಾಹಕರು ಹೊಸದಾಗಿ ಆಯ್ಕೆ ಮಾಡಿಕೊಂಡ ದೂರಸಂಪರ್ಕ ಸೇವಾದಾತ ಕಂಪೆನಿಗಳು ಕಡಿಮೆ ಮೊತ್ತದ ಸೇವಾಶುಲ್ಕ ವಿಧಿಸಲು ಟ್ರಾಯ್ ಒಪ್ಪಿಗೆ ನೀಡಿದೆ.
ಮೊಬೈಲ್‌ ಸೇವಾಸಂಸ್ಥೆ ಬದಲಾವಣೆಗೆ ಹೆಚ್ಚುತ್ತಿರುವ ಬೇಡಿಕೆ ಗಮನದಲ್ಲಿಟ್ಟುಕೊಂಡು ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಟ್ರಾಯ್ ಹೇಳಿದೆ.
