‘ಬ್ರ್ಯಾಂಡ್‌’ ಛಾಯೆ, ಆದಾಯವೇ ಸವಾಲು

ಬೆಂಗಳೂರು: ಸ್ವಂತ ಸಂಪನ್ಮೂಲಗಳ ಕ್ರೋಡೀಕರಣದತ್ತ ಗುರಿ ನೆಟ್ಟಿರುವ ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ, ‘ಬ್ರ್ಯಾಂಡ್‌ ಬೆಂಗಳೂರು’ ಪರಿಕಲ್ಪನೆಯೇ ಬಜೆಟ್‌ನಲ್ಲಿ ಪ್ರತಿಫಲನವಾಗುವಂತೆ ನೋಡಿಕೊಂಡಿದೆ. ಆದರೆ, ಹೆಚ್ಚುವರಿಯಾಗಿ ನಿರೀಕ್ಷಿಸಿರುವ ಆದಾಯ ಖಜಾನೆ ತುಂಬದಿದ್ದರೆ ಕಾಮಗಾರಿಗಳ ಬೆನ್ನೆಲುಬೇ ಮುರಿದಂತಾಗುತ್ತದೆ.

ಬೃಹತ್‌ ಹಾಗೂ ಉತ್ತಮ ಯೋಜನೆಗಳ ಉದ್ದದ ಪಟ್ಟಿಯಂತಿರುವ ಬಜೆಟ್‌, ಮೇಲ್ನೋಟಕ್ಕೆ ಎಲ್ಲ ಸೌಲಭ್ಯಗಳೂ ಸಿಕ್ಕಂತಾಯಿತು ಎಂದು ಎನ್ನಿಸುತ್ತದೆ. ಆದರೆ, ಅವುಗಳ ಆರಂಭಕ್ಕಷ್ಟೇ ಬಜೆಟ್‌ನಲ್ಲಿ ಅನುದಾನವಿದ್ದು, ಎಲ್ಲ ಪೂರ್ಣಗೊಳ್ಳಲು ವರ್ಷಗಳೇ ಬೇಕಾಗುತ್ತವೆ ಎಂಬುದೂ ಸ್ಪಷ್ಟವಾಗಿದೆ.

ಅರ್ಥಶಾಸ್ತ್ರದಲ್ಲಿ ಚಾಣಕ್ಯ ಹೇಳಿರುವ ಮಾತುಗಳನ್ನು ಉಲ್ಲೇಖಿಸಿ ಖಜಾನೆ ತುಂಬಿಕೊಳ್ಳುವ ಮಾತನ್ನಾಡಿರುವ ಬಿಬಿಎಂಪಿ ಹಣಕಾಸು ವಿಭಾಗದ ವಿಶೇಷ ಆಯುಕ್ತ ಶಿವಾನಂದ ಎಚ್‌. ಕಲಕೇರಿ ಅವರು, ಸುಂಕ ವಂಚನೆ ಬಗೆಗಿನ ಬಸವಣ್ಣನವರ ವಚನವನ್ನೂ ಪ್ರಸ್ತಾಪಿಸಿದ್ದಾರೆ.

ಖಜಾನೆ ತುಂಬಬೇಕೆಂದರೆ ನಾಗರಿಕನಿಗೆ ಬೇಕಾದ ಸವಲತ್ತುಗಳು ಅವನ ಅಗತ್ಯಾನುಸಾರ ಸಿಗಬೇಕು. ಆಗ, ಪ್ರಸ್ತಾಪಿಸುವ ತೆರಿಗೆಗಳನ್ನು ಪಾವತಿಸಲು ಆತ ಸಿದ್ದನಿರುತ್ತಾನೆ. ರಸ್ತೆ, ಚರಂಡಿ, ಕುಡಿಯಲು ನೀರು ಕೊಡದೆ, ಸುರಕ್ಷಿತ ರಸ್ತೆ, ಸುಗಮ ಸಂಚಾರ, ಮಳೆಗಾಲದಲ್ಲಿ ಸಂಕಷ್ಟವಿಲ್ಲದ ಜೀವನ ನೀಡುವ ಭರವಸೆಗಳು ವರ್ಷಗಟ್ಟಲೆ ಕನಸಾಗಿಯೇ ಉಳಿದರೆ ‘ಹೈಟೆಕ್‌’ ತೆರಿಗೆಯನ್ನು ನಿರೀಕ್ಷಿಸುವುದು ತರವಲ್ಲ. ಆದರೂ, ತೆರಿಗೆ ನೀಡದವ ಭಂಡ/ ವಂಚಕ ಎಂದು ಪರೋಕ್ಷವಾಗಿ ಬಿಬಿಎಂಪಿ ಬಜೆಟ್‌ನಲ್ಲಿ ಜರಿಯಲಾಗಿದೆ.

ಬಜೆಟ್‌ನಲ್ಲಿ ನಿರೀಕ್ಷಿಸಲಾಗಿರುವ ಒಟ್ಟು ಸಂಗ್ರಹದಲ್ಲಿ ಶೇ 50ರಷ್ಟು ಆಸ್ತಿ ತೆರಿಗೆ ಮೇಲೆಯೇ ಅವಲಂಬಿತವಾಗಿದೆ. ಕಳೆದ ವರ್ಷಕ್ಕಿಂತ ₹1,500 ಕೋಟಿ ಹೆಚ್ಚು ಆಸ್ತಿ ತೆರಿಗೆ ಸಂಗ್ರಹಿಸುವುದಾಗಿ ಹೇಳಿರುವುದು ಹೊಸ ಆಸ್ತಿ ತೆರಿಗೆಯಿಂದ ಜನರ ಮೇಲಾಗುವ ಹೊರೆಯನ್ನು ಸೂಚಿಸುತ್ತದೆ. 751 ಚದರ ಕಿ.ಮೀ. ವ್ಯಾಪ್ತಿಯ ಬಿಬಿಎಂಪಿ ಪ್ರದೇಶಗಳು ಒಂದಕ್ಕಿಂತ ಒಂದು ವಿಭಿನ್ನ. ಒಂದೆಡೆ ಬೇಕಾದ ಸೌಲಭ್ಯ, ಇನ್ನೊಂದುಕಡೆ ಅನಗತ್ಯ. ಆದರೂ, ಸೌಂದರ್ಯೀಕರಣ, ಪ್ರತಿಷ್ಠೆಗಳಿಗಾಗಿ ಕೇಂದ್ರೀಕೃತ ಯೋಜನೆಗಳನ್ನೇ ಬಜೆಟ್‌ನಲ್ಲಿ ಹೆಚ್ಚು ಪ್ರಸ್ತಾಪಿಸಲಾಗಿದೆ.

ಹೆಚ್ಚುವರಿಯಾಗಿ ಫ್ಲ್ಯಾಟ್‌ಗಳನ್ನು ನಿರ್ಮಿಸಿಕೊಳ್ಳಲು ಸರ್ಕಾರಿ ಬೆಲೆಯಲ್ಲಿ ಪ್ರೀಮಿಯಂ ಎಫ್‌ಎಆರ್‌ ‌ಮಾರಾಟದಿಂದ ₹1 ಸಾವಿರ ಕೋಟಿ ಸಂಗ್ರಹ ನಿರೀಕ್ಷಿಸಲಾಗಿದೆ. ನಗರದ ಸೌಂದರ್ಯ ಹಾಳು ಮಾಡುವ ಜಾಹೀರಾತುಗಳಿಗೆ ಮತ್ತಷ್ಟು ಅವಕಾಶ ನೀಡಿ ₹500 ಕೋಟಿ ಸಂಗ್ರಹಿಸುವ ಗುರಿಯೂ ಇದೆ. ಹೆಚ್ಚುವರಿಯಾಗಿ ಸುಮಾರು ₹3,750 ಕೋಟಿ ಸಂಗ್ರಹಿಸುವ ನಿರೀಕ್ಷೆ ಹೊಂದಲಾಗಿದೆ. 'ಬ್ರ್ಯಾಂಡ್‌ ಬೆಂಗಳೂರು’ ಪರಿಕಲ್ಪನೆಗೆ ನಾಗರಿಕರು 70 ಸಾವಿರ ಸಲಹೆಗಳನ್ನು ನೀಡಿದ್ದರು. ಬಿ.ಎಸ್‌. ಪಾಟೀಲ ಸಮಿತಿಯು ಈ ಪರಿಕಲ್ಪನೆಯನ್ನು ಪರಿಗಣಿಸಿ, ಪರಿಷ್ಕರಿಸಿ ನೀಡುವ ನಿರ್ದೇಶನದಂತೆ ಮುಂದಿನ ತೀರ್ಮಾನ ಕೈಗೊಳ್ಳಲಾಗುತ್ತದೆ’ ಎಂದು ಬಜೆಟ್‌ನಲ್ಲೇ ಹೇಳಲಾಗಿದೆ. ಆದರೂ, ‘ಬ್ರ್ಯಾಂಡ್‌ ಬೆಂಗಳೂರು’ ಪರಿಕಲ್ಪನೆಯಲ್ಲೇ ಶೇ 70ರಷ್ಟು ಯೋಜನೆಗಳನ್ನು ಪ್ರಕಟಿಸಲಾಗಿದೆ.

ಸುರಂಗ ಮಾರ್ಗ, ಸ್ಕೈ–ಡೆಕ್ಟ್‌, ಸಂಚಾರಯುಕ್ತ ರಸ್ತೆಗಳ ಸಾವಿರಾರು ಕೋಟಿ ವೆಚ್ಚದ ಯೋಜನೆಗಳನ್ನು ಪ್ರಕಟಿಸಿ, ಅವುಗಳಿಗೆ ಪ್ರಾರಂಭಿಕ ಹಂತದ ನೂರಾರು ಕೋಟಿಯನ್ನಷ್ಟೇ ‘ರೋಮಾಂಚನ ಬೆಂಗಳೂರು’ ಅಡಿಯಲ್ಲಿ ಪ್ರಕಟಿಸಲಾಗಿದೆ. ನಗರದಲ್ಲಿ ನಡೆಯುತ್ತಿರುವ ಐದು ಮೇಲ್ಸೇತುವೆಗಳಿಗೆ ಹಣ ಬಿಡುಗಡೆ ಮಾಡಲು ಸಾಧ್ಯವಾಗದೆ ಕಾಮಗಾರಿಗಳು ಸ್ಥಗಿತವಾಗಿರುವುದು ಈ ಬೃಹತ್‌ ಯೋಜನೆಗಳ ಭವಿಷ್ಯವನ್ನು ಪ್ರಶ್ನಿಸುವಂತಾಗಿದೆ.

‘ನಮ್ಮ ತೆರಿಗೆ ಬಿಬಿಎಂಪಿ ಹಕ್ಕು’ ಎಂಬುದು ಬಜೆಟ್‌ನಲ್ಲಿ ಸ್ಪಷ್ಟವಾಗಿದ್ದು, ನಾಗರಿಕರ ತೆರಿಗೆಯ ಮೇಲೆಯೇ ಎಲ್ಲವೂ ಅವಲಂಬಿತವಾಗಿದೆ. ಉಪ ಮುಖ್ಯಮಂತ್ರಿಯವರ ವಿವೇಚನಾ ಕೋಟಾದ ₹100 ಕೋಟಿಯೂ ಇದೇ ತೆರಿಗೆಯಿಂದಲೇ ಭರಿಸಬೇಕಾಗಿದೆ. ಹೀಗಾಗಿ, ನಾಗರಿಕರ ತೆರಿಗೆ, ವಾಣಿಜ್ಯ ಚಟುವಟಿಕೆಗಳ ಸುಂಕದಿಂದ ಬಿಬಿಎಂಪಿ ಖಜಾನೆ ನಿರೀಕ್ಷೆಯಂತೆ ಭರ್ತಿಯಾದರೆ ಮಾತ್ರ ಪ್ರಕಟಿಸಿರುವ ಯೋಜನೆಗಳು ಆರಂಭವಾಗುತ್ತವೆ.