ಕೃಷಿ ಸಾಲದ ಮೇಲಿನ ಬಡ್ಡಿ ಮನ್ನಾ ಹಣ ಸೈನಿಕ ಕಲ್ಯಾಣ ಖಾತೆಗೆ ನೀಡಿದ ರೈತ

ವಿಶ್ವ ಕಲ್ಯಾಣ ಚಾರಿಟಬಲ್ ಟ್ರಸ್ಟ್ ಮೂಲಕ ಜನ ಕಲ್ಯಾಣ ಕಾರ್ಯದಲ್ಲಿ ತೊಡಗಿಸಿಕೊಂಡ ಅಡಿವೆಪ್ಪ ಪಟ್ನೆ ಅವರು ಡಿಸಿಸಿ ಬ್ಯಾಂಕ್‍ನಿಂದ ₹1 ಲಕ್ಷ ಕೃಷಿ ಸಾಲ ಪಡೆದಿದ್ದರು. ಈ ಸಾಲದ ಮೇಲಿನ ₹3000 ಬಡ್ಡಿ ಮನ್ನಾ ಆಗಿದೆ. ಈ ಮನ್ನಾ ಮಾಡಿದ ಹಣವನ್ನು ಡಿಡಿ ಮೂಲಕ ಸೈನಿಕ ಕಲ್ಯಾಣ ನಿಧಿಗೆ ಕಳುಹಿಸಿಕೊಟ್ಟಿದ್ದಾರೆ.

ಸ್ಥಳೀಯ ಅಮರೇಶ್ವರ ಕಾಲೇಜಿನಲ್ಲಿ ಗುಮಾಸ್ತರಾಗಿದ್ದ ಆಡಿವೆಪ್ಪ ಪಟ್ನೆ ಅವರು 2014ರಲ್ಲಿ ನಿವೃತ್ತರಾಗಿದ್ದಾರೆ. ಅಲ್ಲಿಂದ ಪ್ರತಿ ವರ್ಷ ಸೈನಿಕ ಕಲ್ಯಾಣ ಖಾತೆಗೆ ₹1,100 ಜಮಾ ಮಾಡುತ್ತಾ ಬಂದಿದ್ದಾರೆ. ಬಸವತತ್ವ ಅನುಯಾಯಿಯಾದ ಅವರು ಬಿಡುವಿನ ವೇಳೆಯಲ್ಲಿ ಕೃಷಿ ಕಾಯಕದ ಜತೆಗೆ ಹಳ್ಳಿ ಹಳ್ಳಿಗೆ ಹೋಗಿ ಬಸವತತ್ವ ಪ್ರಚಾರ ಮಾಡುತ್ತಾರೆ.