ಕೈಕೊಟ್ಟ ಮುಂಗಾರು, ರೈತ ಕಂಗಾಲು

7
ಒಣಗುತ್ತಿರುವ ಬೆಳೆ, ಕೆಂಪು ಮಣ್ಣಿನ ಜಮೀನಿನಲ್ಲಿ ಹೆಚ್ಚಿನ ಹಾನಿ

ಕೈಕೊಟ್ಟ ಮುಂಗಾರು, ರೈತ ಕಂಗಾಲು

Published:
Updated:
Deccan Herald

ಬಸವಕಲ್ಯಾಣ: ತಾಲ್ಲೂಕಿನಲ್ಲಿ ಮೂರು ವಾರದಿಂದ ಮಳೆ ನಾಪತ್ತೆಯಾಗಿದೆ. ಮೊಣಕಾಲು ಎತ್ತರಕ್ಕೆ ಬೆಳೆದುನಿಂತ ಬೆಳೆ ಬಾಡುತ್ತಿದ್ದು, ರೈತರನ್ನು ಚಿಂತೆಗೀಡು ಮಾಡಿದೆ.

ತಾಲ್ಲೂಕಿನ ಎಲ್ಲೆಡೆ ಬರೀ ಮೋಡ ಕವಿದ ವಾತಾವರಣವೇ ಇದೆ. ಕೆಲವೆಡೆ ಆಗಾಗ ತುಂತುರು ಮಳೆ ಬರುತ್ತಿದೆ. ಆದರೆ, ಜಮೀನು ಹಸಿ ಆಗುವಷ್ಟು ಮಳೆ ಬಂದಿಲ್ಲ. ಮಂಠಾಳ, ಪ್ರತಾಪುರ, ನಾರಾಯಣಪುರ ಹೋಬಳಿ ಹಾಗೂ ಇತರೆ ಕೆಲ ಭಾಗಗಳಲ್ಲಿ ಕೆಂಪು ಮಣ್ಣು ಇರುವುದರಿಂದ ಇಲ್ಲಿ ಎರಡು ದಿನಕ್ಕೊಮ್ಮೆ ಮಳೆಯ ಅವಶ್ಯಕತೆ ಇದೆ. ಆದರೆ, ಬಹುದಿನಗಳಿಂದ ಮಳೆ ಹಾಜರಿ ಹಾಕದ ಕಾರಣ ಸೋಯಾ ಸೇರಿದಂತೆ ಎಲ್ಲ ಬೆಳೆಗಳೂ ಹಳದಿ ಬಣ್ಣಕ್ಕೆ ತಿರುಗುತ್ತಿವೆ.

‘ಸೋಯಾಬಿನ್, ಹೆಸರು, ಉದ್ದು, ತೊಗರಿ, ಸಜ್ಜೆ, ಹೈಬ್ರಿಡ್ ಜೋಳದ ಬಿತ್ತನೆ ಬಹಳಷ್ಟು ಕಡೆ ಸಕಾಲಕ್ಕೆ ಆಗಿದೆ. ಬೆಳೆ ಹುಲುಸಾಗಿ ಬಂದಿದೆ. ಹೀಗಾಗಿ ರೈತರು ಖುಷಿಯಲ್ಲಿದ್ದರು. ಈಗ ಭೂಮಿಯಲ್ಲಿನ ತೇವಾಂಶ ಕಡಿಮೆ ಆಗಿದ್ದರಿಂದ ನೀರು ಸಾಕಾಗದೆ ಹಳದಿ ಬಣ್ಣಕ್ಕೆ ತಿರುಗಿದ್ದರಿಂದ ಹೊಲಕ್ಕೆ ಹೋಗಿ ಅವುಗಳನ್ನು ನೋಡುವುದಕ್ಕೂ ಮನಸ್ಸಾಗುತ್ತಿಲ್ಲ’ ಎಂದು ಹುಲಸೂರ ರೈತ ರಾಮಪ್ಪ ಹಾಗೂ ಮಂಠಾಳದ ವೈಜನಾಥ ಬೇಸರ ತೋಡಿಕೊಂಡರು.

‘ಬಾವಿಯಲ್ಲಿ ಸ್ವಲ್ಪ ನೀರಿದೆ. ಸದ್ಯಕ್ಕೆ ಅದನ್ನು ಬೆಳೆಗಳಿಗೆ ಹರಿಸಿದ್ದೇನೆ. ಆದರೆ, ಬಾವಿಯ ಸೌಲಭ್ಯ ಇಲ್ಲದ ರೈತರ ಸ್ಥಿತಿ ಹೇಳತೀರದು. ಈಗ ಮಳೆ ಬಂದರೂ ಹಳೆಯ ಬೆಳೆ ಕಿತ್ತು, ಹೊಸದಾಗಿ ಬಿತ್ತುವ ಸ್ಥಿತಿಗೆ ಬಂದಿದ್ದೇನೆ’ ಎನ್ನುತ್ತಾರೆ ದೇವನಾಳದ ಭಾಗವತ.

‘ಮುಡಬಿ ಹೋಬಳಿ ಒಳಗೊಂಡು ತಾಲ್ಲೂಕಿನ ಇತರೆಡೆ ಮಳೆ ಕೊರತೆ ಕಂಡುಬಂದಿದೆ. ಸೋಯಾಬಿನ್‌ ಸೇರಿದಂತೆ ಇತರೆ ಬೆಳೆಗಳೂ ಬಾಡುತ್ತಿವೆ. ಸದ್ಯಕ್ಕೆ ಮಳೆಯಾಗುವ ಲಕ್ಷಣ ಇಲ್ಲ’ ಎನ್ನುವುದು ಕೃಷಿ ಅಧಿಕಾರಿ ಶತ್ರುಘ್ನ ಸದುವಾಲೆ ಅವರ ಹೇಳಿಕೆ.

Tags: 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !