ಕಡರನಾಯ್ಕನಹಳ್ಳಿ | ತಂಗುದಾಣದ ತುಂಬೆಲ್ಲಾ ಚಿತ್ತಾರ

ಇಲ್ಲಿಗೆ ಸಮೀಪದ ಡಾ.ವೈ.ನಾಗಪ್ಪ ಬಡಾವಣೆಯ ಶಾಂತಕುಮಾರ್ ಅವರು ಉತ್ತರ ಪ್ರದೇಶದಲ್ಲಿ ಸೈನಿಕರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ರಜೆಯ ಮೇಲೆ ಊರಿಗೆ ಬಂದ ಅವರು ತಂಗುದಾಣದ ದುಃಸ್ಥಿತಿ ಗಮನಿಸಿ, ಅದಕ್ಕೆ ಕಾಯಕಲ್ಪ ಕೊಡುವ ಸಂಕಲ್ಪ ಮಾಡಿದರು. ಬಡಾವಣೆಯ ನಿವಾಸಿ, ಚಿತ್ರಕಲಾವಿದ ಪಿ.ಟಿ. ಬಸವರಾಜ್ ಅವರು ಶಾಂತಕುಮಾರ್ ಅವರ ಕನಸಿಗೊಂದು ರೂಪು ನೀಡಿದರು.

ತಂಗುದಾಣದ ಒಂದು ಬದಿಯ ಗೋಡೆಗೆ ನೇಗಿಲು ಹೊತ್ತ ರೈತ ಮತ್ತು ಹೊಲ–ಗದ್ದೆಗಳ ಚಿತ್ರ, ಇನ್ನೊಂದು ಬದಿಯ ಗೋಡೆಗೆ ರಾಷ್ಟ್ರಧ್ವಜ ಮತ್ತು ಬಂದೂಕು ಹಿಡಿದ ಸೈನಿಕರ ಚಿತ್ರ, ಮತ್ತೊಂದು ಬದಿಯ ಗೋಡೆಗೆ ಕ್ರೀಡೆಗೆ ಸಂಬಂಧಿಸಿದ ಚಿತ್ರವನ್ನು ರಚಿಸಲಾಗಿದೆ. ಬಲಭಾಗದಲ್ಲಿ ಮದ್ಯ ನಿಷೇಧ ಬಿಂಬಿಸುವ ಚಿತ್ರ ಬಿಡಿಸಲಾಗಿದೆ. ಕಂಬಗಳಿಗೂ ಅತ್ಯಾಕರ್ಷಕ ಪೇಂಟಿಂಗ್ ಮಾಡಲಾಗಿದೆ. ಚಿತ್ತಾಕರ್ಷಕ ರಚನೆಯ ಬಳಿಕ ತಂಗುದಾಣದ ಮೂಲ ಸ್ವರೂಪವೇ ಬದಲಾಗಿ ಆಕರ್ಷಣೆ ಪಡೆದುಕೊಂಡಿತು.

ತಂಗುದಾಣದ ಗೋಡೆಗಳ ಮೇಲೆ ಯಾರೂ ಪೋಸ್ಟರ್ ಹಚ್ಚುವಂತಿಲ್ಲ ಮತ್ತು ಗಲೀಜು ಮಾಡಬಾರದು ಎಂದು ಬರೆಯಲಾಗಿದೆ. ಒಳಭಾಗದಲ್ಲಿ ಗೋಡೆಗಳ ಮೇಲೆ ನುಡಿಗಟ್ಟುಗಳನ್ನು ಬರೆಯಲಾಗಿದೆ. ‘ಶಾಲೆಯಲ್ಲಿ ಗುರುಗಳು ಹೊಡೆದು ಕಲಿಸುವುದು ಕಡಿಮೆ ಆಗಿದ್ದರಿಂದ ಪೊಲೀಸ್ ಠಾಣೆಗಳಲ್ಲಿ ಹೊಡೆಯುವುದು ಹೆಚ್ಚಾಗಿದೆ’ ಎಂಬುದು ಈ ಪೈಕಿ ಒಂದು. 

ತಂಗುದಾಣದೊಳಗೆ ವಾಹನಗಳು ಅಥವಾ ಜಾನುವಾರುಗಳು ಪ್ರವೇಶಿಸದಂತೆ ಕಬ್ಬಿಣದ ರಾಡುಗಳನ್ನು ಅಳವಡಿಸಲಾಗಿದೆ. ಬಸ್‌ಗಾಗಿ ಕಾಯುವ ಪ್ರಯಾಣಿಕರು ತಂಗುದಾಣದ ಅಂದ ಹೆಚ್ಚಿಸಿರುವ ಕೆಲಸವನ್ನು ಶ್ಲಾಘಿಸಿದ್ದಾರೆ. 

‘ನಾಗಪ್ಪ ಬಡಾವಣೆಯಲ್ಲಿ ಅಂಗನವಾಡಿ, ಪ್ರಾಥಮಿಕ, ಪ್ರೌಢಶಾಲೆಗಳಿವೆ. ನೂರಾರು ವಿದ್ಯಾರ್ಥಿಗಳು ಸೇರುವ ತಂಗುದಾಣವನ್ನು ಸ್ವಚ್ಛ ಮತ್ತು ಆಕರ್ಷವಾಗಿ ಇಟ್ಟುಕೊಳ್ಳಬೇಕು. ಮಕ್ಕಳು ಸೇರಿದಂತೆ ಎಲ್ಲರೂ ತುಸು ಹೊತ್ತು ಇರುವ ಈ ತಾಣ, ಮುಜುಗರ ತರಿಸುವಂತಿರಬಾರದು’ ಎಂದು ಸೈನಿಕ ಶಾಂತಕುಮಾರ್ ಅಭಿಪ್ರಾಯಪಟ್ಟಿದ್ದಾರೆ. 

‘ಈಗಾಗಲೇ ನಿರ್ಮಾಣವಾಗಿದ್ದ ತಂಗುದಾಣವನ್ನು ₹20,000 ವೆಚ್ಚದಲ್ಲಿ ಬಣ್ಣ ಹಾಗೂ ಚಿತ್ರಗಳಿಂದ ಸುಂದರಗೊಳಿಸಿದ್ದೇವೆ. ಯಾರಿಂದಲೂ ವಂತಿಗೆ ಪಡೆದಿಲ್ಲ. ನನ್ನ ಸ್ವಂತ ಖರ್ಚಿನಲ್ಲಿ ನವೀಕರಣ ಮಾಡಿದ್ದೇನೆ. ಕಲಾವಿದ ಪಿ.ಟಿ. ಬಸವರಾಜ್, ಸ್ನೇಹಿತರಾದ ರಂಗನಾಥ್, ಎಚ್.ಎಸ್.ಸುರೇಶ್, ಹೇಮಂತ್, ಉಪೇಂದ್ರ ಮತ್ತು ಬಳಗ ಈ ಕಾರ್ಯಕ್ಕೆ ನೆರವಾಗಿದೆ. ಪ್ರತಿ ಗ್ರಾಮದಲ್ಲೂ ಇಂತಹ ಕಾರ್ಯಗಳು ಆಗಬೇಕು’ ಎಂದು ಅವರು ಆಶಿಸಿದ್ದಾರೆ.