ಹುಬ್ಬಳ್ಳಿ: ಅವಳಿನಗರದ ಜನಸಂಖ್ಯೆ 12ಲಕ್ಷ. ನಿತ್ಯ ನಗರಕ್ಕೆ ಬಂದು ಹೋಗುವ ಜನರನ್ನೂ ಸೇರಿಸಿದರೆ ಈ ಸಂಖ್ಯೆ 13 ಲಕ್ಷ ದಾಟುತ್ತದೆ. ಆದರೆ, ಅವಳಿನಗರದಲ್ಲಿರುವ ಸಾರ್ವಜನಿಕ ಶೌಚಾಲಯಗಳ ಸಂಖ್ಯೆ ಮಾತ್ರ 47!
ಇದು ಅಚ್ಚರಿ ಎನಿಸಿದರೂ ಅವಳಿನಗರದಲ್ಲಿನ ಮೂಲಸೌಲಭ್ಯಗಳ ಕೊರತೆಗೆ ಹಿಡಿದ ಕೈಗನ್ನಡಿ. ಆದರೆ, ಈ 47ರಲ್ಲಿ ಸರಿಯಾಗಿ ನಿರ್ವಹಣೆಯಾಗುತ್ತಿರುವ ಶೌಚಾಲಯಗಳ ಸಂಖ್ಯೆ ಕೈಬೆರಳೆಣಿಕೆಯಷ್ಟು ಮಾತ್ರ.
ನಗರದ ಪ್ರಧಾನ ಅಂಚೆ ಕಚೇರಿಯಿಂದ ಧಾರವಾಡದ ವರೆಗೆ ಸಂಚರಿಸಿದರೆ ರಸ್ತೆ ಅಕ್ಕಪಕ್ಕ ಒಂದೇ ಒಂದು ಸಾರ್ವಜನಿಕ ಶೌಚಾಲಯ ಸಿಗುವುದಿಲ್ಲ. ಕರ್ನಾಟಕ ವಾಣಿಜ್ಯೋದ್ಯಮ ಸಂಸ್ಥೆ, ಕಿತ್ತೂರ ಚೆನ್ನಮ್ಮ ವೃತ್ತದಿಂದ ಕೋರ್ಟ್ ವೃತ್ತಕ್ಕೆ ಹೋಗುವ ಮಾರ್ಗದಲ್ಲಿ ಶೌಚಾಲಯಗಳು ಇವೆಯಾದರೂ ಅವುಗಳನ್ನು ಹುಡುಕಬೇಕು. ಅಲ್ಲದೇ, ಅವುಗಳ ಉಪಯೋಗಕ್ಕೆ ಹಣ ನೀಡಬೇಕು.
ಅದರಲ್ಲೂ, ಬೇರೆ ಊರುಗಳಿಂದ ಬರುವವರ ಪಾಡು ಹೇಳತೀರದು. ಶೌಚಾಲಯ ಸಿಗದೇ ಖಾಲಿ ಬಿದ್ದ ಜಾಗ ಇಲ್ಲವೇ ರಸ್ತೆ ಪಕ್ಕದಲ್ಲಿಯೇ ಮೂತ್ರ ವಿಸರ್ಜನೆ ಮಾಡುವ ದೃಶ್ಯ ಇಲ್ಲಿ ಸಾಮಾನ್ಯ ಎನ್ನುತ್ತಾರೆ ಖಾಸಗಿ ಕಂಪೆನಿ ಉದ್ಯೋಗಿ ವಿಜಯಕುಮಾರ ಕವಲೂರು.
‘ಮಹಿಳೆಯರು ಹೋಟೆಲ್ ಇಲ್ಲವೇ ಖಾಸಗಿ ಸಂಸ್ಥೆಗಳಲ್ಲಿರುವ ಶೌಚಾಲಯಗಳ ಮೊರೆ ಹೋಗಬೇಕು. ಇದು ಬಹಳ ಮುಜುಗರದ ವಿಷಯ. ಈ ಬಗ್ಗೆ ಮಹಾನಗರ ಪಾಲಿಕೆ ಇನ್ನಾದರೂ ಎಚ್ಚೆತ್ತುಕೊಂಡು ಕ್ರಮ ಕೈಗೊಳ್ಳದಿದ್ದರೆ ಹೇಗೆ’ ಎಂದೂ ಪ್ರಶ್ನಿಸುತ್ತಾರೆ.
ದುರ್ಗದ ಬೈಲ್, ಸ್ಟೇಷನ್ ರಸ್ತೆ, ದಾಜಿಬಾನಪೇಟೆ, ಎಂ.ಜಿ.ಮಾರ್ಕೆಟ್ಗಳು ಪ್ರಮುಖ ವಾಣಿಜ್ಯ ಪ್ರದೇಶಗಳು. ಇಲ್ಲಿ ನಗರದ ಜನತೆಯಲ್ಲದೇ ವ್ಯಾಪಾರಕ್ಕಾಗಿ ಬೇರೆ ಊರುಗಳಿಂದಲೂ ಜನರು ಬರುತ್ತಾರೆ. ಆದರೆ, ನಿಸರ್ಗದ ಕರೆ ತೀರಿಸಲು ಸೂಕ್ತ ಸ್ಥಳಕ್ಕೆ ಅವರಿಗೆ ಸ್ವರ್ಗ ಮೂರೇ ಗೇಣು ಎಂಬಂತಹ ಸ್ಥಿತಿ ಇದೆ ಎಂದು ದಾಜಿಬಾನಪೇಟೆಯಲ್ಲಿರುವ ವರ್ತಕ ಜಗದೀಶ ಮಿಸ್ಕಿನ್ ಹೇಳುತ್ತಾರೆ.
ನಗರದ ಕೆಲವೆಡೆ ಮಹಾನಗರ ಪಾಲಿಕೆ ಸಂಚಾರಿ ಶೌಚಾಲಯಗಳನ್ನು ಅಳವಡಿಸಿದೆ. ಒಂದಕ್ಕೆ ₨ 1.15 ಲಕ್ಷದಂತೆ ಒಟ್ಟು 15 ಸಂಚಾರಿ ಶೌಚಾಲಯಗಳನ್ನು ಖರೀದಿಸಲಾಗಿದೆ ಎಂದು ಪಾಲಿಕೆಯ ಅಧಿಕಾರಿಯೊಬ್ಬರು ಹೇಳುತ್ತಾರೆ.
ಆದರೆ, ಅವುಗಳ ಹತ್ತಿರ ಹೋಗುವುದೇ ದುಸ್ತರ. ನಿಯಮಿತವಾಗಿ ನೀರನ್ನು ಹಾಕಿ ಅವುಗಳ ನಿರ್ವಹಣೆ ಮಾಡಿ ಯಾವ ವರ್ಷವಾಯಿತೋ ಗೊತ್ತಿಲ್ಲ. ಕೊಚ್ಚೆ ನೀರಿನಿಂದ, ಒಳಚರಂಡಿ ತ್ಯಾಜ್ಯದಿಂದ ದ್ವೀಪದಂತ ಸ್ಥಿತಿ ನಿರ್ಮಾಣವಾಗಿದ್ದು, ನಡುವೆ ಈ ಸಂಚಾರಿ ಶೌಚಾಲಯಗಳಿರುವುದು ಪಾಲಿಕೆಯ ನಿರ್ಲಕ್ಷ್ಯವನ್ನು ತೋರುತ್ತದೆ ಎಂದೂ ಅಸಮಾಧಾನ ವ್ಯಕ್ತಪಡಿಸಿದರು.
ಅನುದಾನ ಇದೆ: ‘ನಗರದಲ್ಲಿ ಸಾರ್ವಜನಿಕ ಶೌಚಾಲಯಗಳನ್ನು ನಿರ್ಮಿಸಲು ಹಣಕಾಸಿನ ತೊಂದರೆ ಇಲ್ಲ. ಶೌಚಾಲಯಗಳು ಅಗತ್ಯವಿರುವಂತಹ ಪ್ರದೇಶಗಳಲ್ಲಿ ಜಾಗ ಗುರುತಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ಶೀಘ್ರವೇ ನಿರ್ಮಾಣ ಕಾರ್ಯಕ್ಕೆ ಚಾಲನೆ ನೀಡಲಾಗುವುದು’ ಎಂದು ಮೇಯರ್ ಶಿವು ಹಿರೇಮಠ ಹೇಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.