ಹಳೇಬೀಡು | ನಿರಂತರ ಮಳೆಗೆ ಬೆಳೆಗಳು ಜಲಾವೃತ: ಸಂಕಷ್ಟದಲ್ಲಿ ರೈತರು

‘ಪಂಪ್‌ಸೆಟ್‌ನಿಂದ ನೀರುಣಿಸಿ ಬೆಳೆದಿದ್ದ ತರಕಾರಿ ಬೆಳೆಗಳಿಗೆ ತೇವಾಂಶ ಹೆಚ್ಚಾಗಿದೆ. ಮೋಡದ ವಾತಾವರಣದಿಂದ ಜಮೀನಿನಲ್ಲಿ ನಿಂತ ನೀರು ಒಣಗುತ್ತಿಲ್ಲ. ನೀರಿನಲ್ಲಿ ಮುಳುಗಿರುವ ಬೆಳೆಗಳು ಕೊಳೆಯುವ ಸ್ಥಿತಿಗೆ ತಲುಪಿದೆ. ಮುಳುಗಿದ ಬೆಳೆ ತೆಗೆದು, ಬೇರೆ ಬೆಳೆ ಮಾಡುವುದಕ್ಕೂ ಅವಕಾಶ ಇಲ್ಲದಂತಾಗಿದೆ’ ಎಂದು ರೈತ ಯತೀಶ್ ಅಳಲು ತೋಡಿಕೊಂಡರು.

‘ಮೆಣಸು, ಟೊಮೆಟೊ, ಬದನೆ, ಬೀನ್ಸ್, ಸೌತೆ ಬೆಳೆಗಳಿಗೆ ನೀರುಣಿಸಲು ರೈತರು ಪಡಬಾರದ ಕಷ್ಟ ಅನುಭವಿಸುತ್ತಿದ್ದರು. ಅಧಿಕ ಉಷ್ಣಾಂಶದಿಂದ ಅಂತರ್ಜಲ ಕಡಿಮೆಯಾಗಿದ್ದಲ್ಲದೇ, ವಿದ್ಯುತ್ ಸಮಸ್ಯೆಯಿಂದ ಬೆಳೆ ಸೊರಗಿದ್ದವು. 15 ದಿನದ ಹಿಂದೆ ಮಳೆ ಆರಂಭವಾದಾಗ ಬೆಳೆ ಚೇತರಿಸಿಕೊಳ್ಳಲು ಆರಂಭಿಸಿದವು. ಒಂದು ವಾರದಿಂದ ಗಾಳಿಯೊಂದಿಗೆ ರಭಸದ ಮಳೆ ಬಿದ್ದಿದ್ದರಿಂದ ಗದ್ದೆ ಹಾಗೂ ತೆಗ್ಗು ಪ್ರದೇಶದ ಹೊಲದಲ್ಲಿ ನೀರು ನಿಲ್ಲುತ್ತಿದೆ. ಹಳ್ಳದ ಪಕ್ಕದ ಜಮೀನುಗಳಿಗೆ ನೀರು ನುಗ್ಗುತ್ತಿದೆ’ ಎಂದು ರೈತರು ಹೇಳುತ್ತಿದ್ದಾರೆ.

ಜಮೀನಿನಲ್ಲಿ ನಿಂತ ನೀರನ್ನು ಹೊರ ಹಾಕುವ ಕೆಲಸ ಎಲ್ಲ ರೈತರಿಗೂ ಸಾಧ್ಯವಾಗುತ್ತಿಲ್ಲ. ಕೆಲವರು ಜಮೀನಿನ ಸುತ್ತ ಕಾಲುವೆ ತೆಗೆದು ನೀರು ಇಂಗುವ ವ್ಯವಸ್ಥೆ ಮಾಡುತ್ತಿದ್ದಾರೆ. ತೇವಾಂಶ ಅಧಿಕವಾದ ಸ್ಥಳದಲ್ಲಿ ಕಾಲುವೆಯಲ್ಲಿ ನೀರು ಇಂಗಿಸುವುದು ಸುಲಭ ಸಾಧ್ಯವಾಗಿಲ್ಲ. ಎತ್ತರ ಪ್ರದೇಶದ ಜಮೀನುಗಳಲ್ಲಿ ಮಾತ್ರ ಬೆಳೆಗಳು ಹಸಿರಿನಿಂದ ಕಂಗೊಳಿಸುತ್ತಿವೆ.

‘ಜೋಳ, ಹತ್ತಿ, ಸೂರ್ಯಕಾಂತಿ, ಅಲಸಂದೆ ಮೊದಲಾದ ಮಳೆ ಆಶ್ರಿತ ಬೆಳೆಗಳಿಗೆ ಅನುಕೂಲವಾಗಿದೆ. ವಾರಕ್ಕೊಮ್ಮೆ ಸಾಧಾರಣ ಮಳೆ ಬಿದ್ದರೂ ಬೆಳೆ ಉಳಿಯುತ್ತದೆ ಎಂಬ ವಿಶ್ವಾಸ ರೈತರಲ್ಲಿ ಮೂಡಿದೆ. ಶುಕ್ರವಾರ ಗಾಳಿಯೊಂದಿಗೆ ಸುರಿದ ರಭಸದ ಮಳೆ ಮುಂದುವರಿದರೆ, ಮಳೆ ಆಶ್ರಿತ ಬೆಳೆಗಳು ಹಾಳಾಗುತ್ತವೆ’ ಎಂದು ರೈತ ಹಳೇಬೀಡಿನ ಜಗದೀಶ ಹೇಳಿದರು.

‘ಸೇವಂತಿಗೆ ಹೂವಿನ ಬೆಳೆಗೂ ಮಳೆ ಅಧಿಕವಾಗಿದೆ. ಮಳೆಯ ಹೊಡೆತಕ್ಕೆ ಸೇವಂತಿಗೆ ಹೂವಿನ ಎಸಳು ಉದುರುತ್ತಿದೆ. ಭೂಮಿಯಲ್ಲಿ ನೀರು ಇಂಗುವಂತಹ ಮಳೆ ಬಿದ್ದರೆ ಬೆಳೆಗೆ ಸಮಸ್ಯೆ ಆಗುವುದಿಲ್ಲ. ಹೂವಿನ ಹೊಲದಲ್ಲಿ ನೀರು ನಿಂತರೆ ಬೆಳೆ ಕೊಳೆಯುತ್ತದೆ. ಮಳೆ ಆಗಾಗ್ಗೆ ಬಿಡುವು ಕೊಟ್ಟು ಬರಬೇಕು. ವಾರಕ್ಕೆ ಒಂದೆರೆಡು ದಿನ ಬಿಸಿಲು ಬಂದು ಮಳೆ ಸುರಿದರೆ ಬೆಳೆಗಳಿಗೆ ತೊಂದರೆ ಆಗುವುದಿಲ್ಲ. ನಿರಂತರ ಮೋಡದ ವಾತಾವರಣ ಇದ್ದರೂ ಬೆಳೆಗಳು ಮುರುಟುತ್ತವೆ’ ಎಂದು ಬಸ್ತಿಹಳ್ಳಿ ದೇವರಾಜು ತಿಳಿಸಿದರು.

ಫಸಲು ಬಿಡುತ್ತಿದ್ದ ಬಾಳೆ, ಗಾಳಿಗೆ ನೆಲಕ್ಕೆ ಬಿದ್ದಿದೆ. ಕೊಯ್ಲು ಮಾಡುವ ಸಮಯಕ್ಕೂ ಮೊದಲು ಬಾಳೆ ಬೆಳೆಗೆ ಹಾನಿಯಾಗಿದ್ದು, ಕೈಯಿಗೆ ಬಂದ ತುತ್ತು ಬಾಯಿಗೆ ಇಲ್ಲ ಎನ್ನುವಂತಾಗಿದೆ. ಹೆಚ್ಚಿನ ತಾಪಮಾನ ಅನುಭವಿಸಿದ ಸಾಕಷ್ಟು ಮಂದಿಗೆ ಭೂಮಿ ತಂಪಾಗಿರುವುದು ಸಂತಸವಾಗಿದೆ. ಕೆರೆ ಕಟ್ಟೆಯ ಗುಂಡಿಗೆ ಮಾತ್ರ ನೀರು ಬಂದಿದೆ. ಕೆರೆಗಳು ಭರ್ತಿಯಾಗುವಂತಹ ಮಳೆ ಬಂದು ಅಂತರ್ಜಲ ವೃದ್ಧಿಸಲಿ ಎಂಬ ಮಾತು ರೈತರಿಂದ ಕೇಳಿ ಬರುತ್ತಿದೆ.