ರಂಗನಾಥಸ್ವಾಮಿಯ 93ನೇ ವರ್ಷದ ಜಾತ್ರೆ: ಪುಂಗನೂರು ರಾಸು ಜತೆ ರೈತರ ಸೆಲ್ಫಿ

ನಾಲ್ಕು ದಿನಗಳಿಂದ ರಾಸುಗಳ ಜಾತ್ರೆ ನಡೆಯುತ್ತಿದ್ದು, ಸಾವಿರಾರು ಎತ್ತುಗಳು ಸೇರಿವೆ. ಇದೇ ಮೊದಲ ಬಾರಿಗೆ ಪುಂಗನೂರು ತಳಿಯ ಎತ್ತುಗಳು ಪ್ರದರ್ಶನದಲ್ಲಿ ಭಾಗವಹಿಸಿವೆ.

ಹೊನ್ನಶೆಟ್ಟಿಹಳ್ಳಿಯ ಸಂದೀಪ್ ಈ ಎತ್ತುಗಳನ್ನು ಸಾಕಿ, ಜಾತ್ರೆಗೆ ತಂದಿದ್ದಾರೆ. ಅಗಲ ಹಣೆ, ಪುಟ್ಟ ಕಾಲುಗಳು, ಗಿಡ್ಡವಾಗಿದ್ದರೂ, ಮೈಕಟ್ಟಿನಿಂದ ತುಂಬಿಕೊಂಡಿವೆ. ಆಂಧ್ರಪ್ರದೇಶದ ಚಿತ್ತೂರು, ಮದನಪಲ್ಲಿ ಭಾಗದಲ್ಲಿ ಈ ತಳಿಯ ಎತ್ತುಗಳು ಇವೆ. ಈ ಭಾಗದಲ್ಲಿ ಮತ್ತು ಜಾತ್ರೆಯಲ್ಲಿ ಹಳ್ಳಿಕಾರ್‌ ಎತ್ತುಗಳನ್ನು ನೋಡಿರುವ ರೈತರಿಗೆ ಈ ರಾಸುಗಳು ವಿಶೇಷವಾಗಿ ಕಾಣಿಸುತ್ತಿವೆ. ಇವುಗಳ ಮುಂದೆ ಸೆಲ್ಫಿ ಹಾಗೂ ಫೋಟೊ ತೆಗೆದುಕೊಳ್ಳುವವರ ಸಂಖ್ಯೆಯೂ ಹೆಚ್ಚಾಗಿದೆ.

ಹಾಸನ, ತುಮಕೂರು, ಮಂಡ್ಯ, ಮೈಸೂರು ಜಿಲ್ಲೆಗಳ ರೈತರು ಜಾತ್ರೆಯಲ್ಲಿ ₹ 4 ಲಕ್ಷದಿಂದ ₹ 10 ಲಕ್ಷ ಬೆಲೆಬಾಳುವ ನೂರಾರು ಜೊತೆ ಎತ್ತುಗಳನ್ನು ಪ್ರದರ್ಶನ ಮಾಡಿದ್ದಾರೆ. ರಾಜ್ಯದ ನಾನಾ ಭಾಗಗಳಿಂದ ರೈತರು ಜಾತ್ರೆಗೆ ಬಂದು ರಾಸುಗಳನ್ನು ಕೊಂಡು ಹೋಗುತ್ತಿದ್ದಾರೆ.

‘ಮಂಗಳವಾರ, ಬುಧವಾರ ಒಳ್ಳೆಯ ವ್ಯಾಪಾರ ನಡೆಯಿತು. ಗುರುವಾರ ಮತ್ತು ಶುಕ್ರವಾರವೂ ವ್ಯಾಪಾರ ನಡೆಯುತ್ತದೆ. ಶನಿವಾರದ ನಂತರ ಜಾನುವಾರುಗಳ ಜಾತ್ರೆ ಮುಕ್ತಾಯವಾಗಲಿದೆ. ಕುಡಿಯುವ ನೀರು ಸೇರಿದಂತೆ ಎಲ್ಲ ಸೌಲಭ್ಯಗಳು ಉತ್ತಮವಾಗಿವೆ’ ಎನ್ನುತ್ತಾರೆ ರೈತರ ಹೊಸೂರು ಕುಮಾರ್.

ಕಳೆದ ವರ್ಷ ಚರ್ಮಗಂಟು ರೋಗದ ಸಮಸ್ಯೆಯಿಂದ ಜಾತ್ರೆ ನಡೆಸಲು ಸರ್ಕಾರ ಅನುಮತಿ ನೀಡದೆ, ರೈತರು ಜಾತ್ರೆ ಆವರಣದ ಹೊರಭಾಗದಲ್ಲಿ ರಾಸುಗಳ ಮಾರಾಟ ಮಾಡಿದ್ದರು.