ಚಿಂಚೋಳಿ: ಮರಳು ದರ ದುಬಾರಿ, ನಿಂತ ಕಾಮಗಾರಿ

ಮನೆಗಳ ಕಾಲಂ ಮತ್ತು (ಆರ್‌ಸಿಸಿ) ಛತ್ತು ಹಾಕಲು ಸ್ವಲ್ಪ ದಪ್ಪವಿರುವ ಮರಳು ಬೇಕು. ಈ ಮರಳು ಸಾಧ್ಯವಿಲ್ಲದ ಕಾರಣ ಚಿಂಚೋಳಿ, ಸುಲೇಪೇಟ ಮೊದಲಾದ ಕಡೆಗಳಲ್ಲಿ ಕಟ್ಟಡ ನಿರ್ಮಾಣ ಸ್ಥಗಿತಗೊಳಿಸಲಾಗಿದೆ.

ಕೆಲವು ಮನೆಗಳ ಕಾಲಂ ಹಾಕಿ ಗೋಡೆ ನಿರ್ಮಿಸಿದ್ದು ಛತ್ತು ಹಾಕಲು ರಾಡ್ ಬಿಗಿದು ತಿಂಗಳು ಗತಿಸಿದರೂ ಮರಳು ಸಿಗದೇ ಛತ್ತು ಹಾಕಲಾಗಿಲ್ಲ ಇದರಿಂದ ಕಾರ್ಮಿಕರಿಗೆ ಕೆಲಸವಿಲ್ಲದಂತಾಗಿದೆ ಎನ್ನುತ್ತಾರೆ ಸೆಂಟ್ರಿಂಗ್ ಕೆಲಸದ ಇಸ್ಮಾಯಿಲ್.

3 ಕಟ್ಟಡಗಳಿಗೆ ನಾನು ರಾಡ್ (ಕಬ್ಬಿಣದ ಸರಳು) ಬಿಗಿದಿದ್ದೇನೆ. ಮರಳು ಲಭಿಸಿದರೆ ನಾಳೇಯೇ ಲಿಫ್ಟ್‌ ತಂದು ಛತ್ತು ಹಾಕುತ್ತೇವೆ. ಆದರೆ ಮರಳೇ ಸಿಗುತ್ತಿಲ್ಲ. ತುಂಬಾ ಜರೂರು ಇರುವವರು ಒಂದು ಟೌರಸ್ ಲಾರಿಗೆ ₹90 ಸಾವಿರ ಹಣ ನೀಡಿ ಬೇರೆ ರಾಜ್ಯದಿಂದ ಮರಳು ತಂದು ಮನೆಯ ಛತ್ತು ಹಾಕಿಸಿಕೊಂಡಿದ್ದಾರೆ.

ವ್ಯಕ್ತಿಯೊಬ್ಬರು 6 ಬ್ರಾಸ್‌ನ ಟಿಪ್ಪರ್ ಸುಮಾರು 30 ರಿಂದ 32 ಟನ್ ಮರಳಿಗೆ ₹42 ಸಾವಿರ ಕೊಟ್ಟು ತರುತ್ತಿದ್ದಾರೆ. ಇದರಿಂದ ಸ್ವಂತ ಮನೆ ಕನಸು ಹೊತ್ತು ಮನೆ ನಿರ್ಮಾಣಕ್ಕೆ ಮುಂದಾದವರು ಸರ್ಕಾರಕ್ಕೆ ಹಿಡಿ ಶಾಪ ಹಾಕುತ್ತಿದ್ದಾರೆ.

ಲೋಕೋಪಯೋಗಿ ಉಪ ವಿಭಾಗದ ಕಚೇರಿಯಲ್ಲಿ ಮರಳು ಬ್ಯಾಂಕ್ ಸ್ಥಾಪಿಸಿ ಮನೆ ನಿರ್ಮಾಣಕ್ಕೆ ರಿಯಾಯಿತಿ ದರದಲ್ಲಿ ಮರಳು ಪೂರೈಕೆಗೆ ಕ್ರಮ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.

ಚುನಾವಣೆಯ ನಂತರ ಮರಳು ದಂಧೆಗೆ ಬ್ರೇಕ್‌ ಬಿದ್ದಿದೆ ಆದರೆ ಇದರ ಪರಿಣಾಮ ಕಟ್ಟಡ ಮನೆ ಸ್ವಂತ ಸೂರು ಹೊಂದುವ ಕನಸಿನ ವ್ಯಕ್ತಿಗಳಿಗೆ ಬರೆ ಹಾಕಿದರೆ, ಸರ್ಕಾರಿ ಕೆಲಸಗಳಿಗೂ ಸಿಗದಂತಾಗಿದೆ.

ಸರ್ಕಾರದಿಂದ ವಿವಿಧ ಬಿಲ್ಲು ಪಾವತಿ ತಡೆ ಹಿಡಿದಿದ್ದರಿಂದ ಮರಳಿನ ಕೊರತೆಯಿಂದ ಗುತ್ತಿಗೆದಾರರು ತಲೆ ಕೆಡಿಸಿಕೊಳ್ಳದೇ ಕೆಲಸ ನಿಲ್ಲಿಸಿ ಕೈತೊಳೆದುಕೊಂಡಿದ್ದಾರೆ. ಆದರೆ ಸ್ವಂತ ಮನೆ ನಿರ್ಮಿಸಿ ಕೊಳ್ಳಬೇಕು ಎಂಬುವವರಿಗೆ ತೊಂದರೆಯಾಗಿದೆ.