ಕಲಬುರಗಿ ‌| ಮಳೆ ಕೊರತೆ, ಕೆರೆಗಳಲ್ಲಿ ನೀರಿನ ಮಟ್ಟ ಕುಸಿತ: ಆತಂಕ

ಅಫಜಲಪುರ, ಶಹಾಬಾದ್, ಕಮಲಾಪುರ, ಆಳಂದ, ಜೇವರ್ಗಿ, ಯಡ್ರಾಮಿ ತಾಲ್ಲೂಕುಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಮಳೆಯಾಗಿಲ್ಲ. ಹೀಗಾಗಿ ಇಲ್ಲಿನ ಕೆರೆಗಳಿಗೆ ಹರಿದು ಬರುವ ನೀರಿನ ಪ್ರಮಾಣವೂ ಕಡಿಮೆಯಾಗಿದೆ.

ಕಲಬುರಗಿ ನಗರದ ಅಪ್ಪನ ಕೆರೆ, ದುಬೈ ಕಾಲೊನಿಯಲ್ಲಿರುವ ಕೆರೆಗಳಲ್ಲಿ ಕಳೆದ ಬಾರಿಯಷ್ಟು ನೀರು ಈ ಬಾರಿ ಸಂಗ್ರಹವಾಗಿಲ್ಲ. ಇದರಿಂದ ಬೇಸಿಗೆ ವೇಳೆಗೆ ನಗರದಲ್ಲಿಯೂ ಸಹ ಅಂತರ್ಜಲ ಮಟ್ಟ ಕುಸಿತದಿಂದ ಬೊರವೆಲ್‌ಗಳ ನೀರಿನ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.

ದೊಡ್ಡ ಪ್ರಮಾಣದ ಕೆರೆಗಳಲ್ಲಿ ಸಂಗ್ರಹ ಸಾಮರ್ಥ್ಯವಿದ್ದರೂ ಮಳೆಯಾಗದ ಕಾರಣ ನೀರಿನ ಮಟ್ಟ ಕುಸಿತ ಕಂಡಿದೆ. ಕೆಲ ತಾಲ್ಲೂಕು ವ್ಯಾಪ್ತಿಯಲ್ಲಿ ಮಳೆಯಾದರೂ ಬೆಳೆಗಳಿಗೆ ಮಾತ್ರ ಅನುಕೂಲವಾಗಿದೆ. ಕೆರೆ ಕಟ್ಟೆಗಳಿಗೆ ನೀರು ಹರಿದು ಬಂದಿಲ್ಲ. ಇದರಿಂದ ಕೆರೆ ಹಾಗೂ ಹಳ್ಳಗಳಿಗೆ ನೀರು ಹರಿದು ಸಂಗ್ರಹವಾಗಿಲ್ಲ.

ಕೆರೆಗಳ ಜಲಮೂಲವನ್ನು ನಂಬಿರುವ ಗ್ರಾಮಗಳು ಹಾಗೂ ಅಚ್ಚುಕಟ್ಟು ಪ್ರದೇಶದಲ್ಲಿ ಅಂತರ್ಜಲ ಮಟ್ಟ ಕಡಿಮೆಯಾಗಿ ಕೃಷಿಕರ ಮೇಲೆ ಪರಿಣಾಮ ಬೀರಿದೆ. ಈ ಮೊದಲು ಬಾವಿಗೆ ಮೋಟಾರ್‌ ಅಳವಡಿಸಿ ಜಮೀನುಗಳಿಗೆ ನೀರುಣಿಸಲಾಗುತ್ತಿತ್ತು. ಈಗ ಅಂತರ್ಜಲ ಮಟ್ಟ ಕುಸಿದಿದ್ದರಿಂದ ಬಾವಿಗಳಲ್ಲಿ ಸಹ ನೀರಿನ ಪ್ರಮಾಣ ಕಡಿಮೆಯಾಗಿದೆ. ಹೀಗಾಗಿ ಕೃಷಿ ಉತ್ಪಾದನೆಯಲ್ಲಿ ಕೊರತೆ ಕಂಡು ಬರುವ ಸಾಧ್ಯತೆ ಇದೆ ಎನ್ನುತ್ತಾರೆ ರೈತ ಶರಣಪ್ಪ.

ಮಳೆಯ ನಿರೀಕ್ಷೆಯಲ್ಲಿ ರೈತರು ನೀರಾವರಿ ಆಶ್ರಿತ ಬೆಳೆಗಳನ್ನು ಬೆಳೆಯಲು ಮುಂದಾಗಿ ಬಿತ್ತನೆ ಮಾಡಿದ್ದಾರೆ. ಆದರೆ, ಅಂತರ್ಜಲ ಮಟ್ಟ ಕಡಿಮೆಯಾಗಿ ಮಡ್ಡಿ ಮಿಶ್ರಿತ ಜಮೀನಿನಲ್ಲಿ ಬಿತ್ತನೆ ಮಾಡಲಾದ ಹತ್ತಿ, ತೊಗರಿ ಇತರೆ ಬೆಳೆಗಳು ಈಗಲೇ ತೇವಾಂಶ ಕೊರತೆಯಿಂದ ನೆಲ ಕಚ್ಚುತ್ತಿವೆ.

ಬಹುತೇಕ ಕೆರೆಗಳಲ್ಲಿ ನೀರಿಲ್ಲ: ಜಿಲ್ಲಾ ಪಂಚಾಯಿತಿ, ಸಣ್ಣ ನೀರಾವರಿ ಇಲಾಖೆ, ಮಹಾನಗರ ಪಾಲಿಕೆ ಹಾಗೂ ವಿವಿಧ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಕೆರೆಗಳಿವೆ. ಸಣ್ಣ ನೀರಾವರಿ ಇಲಾಖೆ ವ್ಯಾಪ್ತಿಯಲ್ಲಿ 167 ಕೆರೆಗಳು, ಜಿಲ್ಲಾ ಪಂಚಾಯಿತಿ ವ್ಯಾಪ್ತಿಯಲ್ಲಿ ಸುಮಾರು 32, ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ 500ಕ್ಕೂ ಹೆಚ್ಚು ಜಿನುಗು ಕೆರೆಗಳು ಇವೆ.

ಸೇಡಂ, ಚಿಂಚೋಳಿ, ಕಾಳಗಿ, ಚಿತ್ತಾಪುರ ತಾಲ್ಲೂಕಿನ ಕೆಲ ಭಾಗದಲ್ಲಿ ಮಳೆಯಾಗಿ ಕೆರೆಗಳಲ್ಲಿ ಒಂದು ಹಂತದಲ್ಲಿ ನೀರು ಸಂಗ್ರಹವಿದೆ. ಆದರೆ ಅಫಜಲಪುರ, ಆಳಂದ, ಜೇವರ್ಗಿ, ಶಹಾಬಾದ್‌ನಲ್ಲಿ ಶೇ 50ಕ್ಕೂ ಹೆಚ್ಚು ಕೆರೆಗಳಲ್ಲಿ ಶೇ 30ಕ್ಕಿಂತ ಕಡಿಮೆ ನೀರು ಇದೆ.

ಜಿಲ್ಲಾ ಪಂಚಾಯಿತಿ ವ್ಯಾಪ್ತಿಯ ನಂದರಗಾ ಕೆರೆಯಲ್ಲಿ ಶೇ 20, ಆಳಂದ ತಾಲ್ಲೂಕಿನ ಕವಲಗಾ ಕೆರೆಯಲ್ಲಿ ಶೇ 10, ಲಿಂಗದಳ್ಳಿ ಶೇ 30, ಮಲ್ಲಯ್ಯನ ತಾಂಡಾ ಶೇ 45, ಗೋಗಿ ತಾಂಡಾ ಶೇ 50. ಸಣ್ಣ ನೀರಾವರಿ ಇಲಾಖೆಯ ಕೆರೆಗಳಲ್ಲಿ ಅಫಜಲಪುರ ತಾಲ್ಲೂಕಿನ 12 ಕೆರೆಗಳು ಇವೆ. 8 ಕೆರೆಗಳಲ್ಲಿ 30ರಷ್ಟು ಮಾತ್ರ ನೀರಿದೆ.

ಆಳಂದ ತಾಲ್ಲೂಕಿನಲ್ಲಿ ಇರುವ 35 ಕೆರೆಗಳಲ್ಲಿ, 28 ಕೆರೆಗಳಲ್ಲಿ ಶೇ 30 ರಷ್ಟು ನೀರಿದೆ. 7 ಕೆರೆಯಲ್ಲಿ ಶೇ 31ರಿಂದ ಶೇ 50ರಷ್ಟು ನೀರಿದೆ. ಕಲಬುರಗಿ ತಾಲ್ಲೂಕಿನಲ್ಲಿ 12 ಕೆರೆಗಳ ಪೈಕಿ 3ರಲ್ಲಿ ಶೇ 30, 4 ಕೆರೆಗಳಲ್ಲಿ ಶೇ 31 ರಿಂದ ಶೇ 50 ರಷ್ಟು ನೀರಿದೆ. ಮೂರು ಕೆರೆಗಳು ಭರ್ತಿಯಾಗಿವೆ.

ಅಫಜಲಪುರ ತಾಲ್ಲೂಕಿನ ಕರಜಗಿ, ಮಾಶಾಳ ಭಾಗದಲ್ಲಿ ಕೆರೆ ಇದ್ದರೂ ಸಹ ನೀರು ಮಾತ್ರ ಇಲ್ಲ. ಆದರೆ ಕೆರೆಯ ಅಂತರ್ಜಲದ ಮೇಲೆ ಅವಲಂಬಿತವಾದ ಬೊರವೆಲ್‌ಗಳು ಈಗಲೇ ನಿಂತು ಹೋಗಿವೆ. ಇದರಿಂದ ಕುಡಿಯುವ ನೀರಿನ ಸಮಸ್ಯೆಯೂ ಉದ್ಭವಿಸಿದೆ. ಬೇಸಿಗೆಯಲ್ಲಿ ಹೇಗೆ ಎಂಬ ಚಿಂತೆ ಕಾಡುತ್ತಿದೆ ಎನ್ನುತ್ತಾರೆ ಗ್ರಾಮಸ್ಥರು.

ಯಡ್ರಾಮಿ ತಾಲ್ಲೂಕಿನ ಇಜೇರಿ ಗ್ರಾಮದಲ್ಲಿ ದೊಡ್ಡ ಪ್ರಮಾಣದ ಕೆರೆ ಇದೆ. ಮಳೆ ಬರದೆ ಇರುವುದಿಂದ ಶೇ 10 ರಷ್ಟು ಮಾತ್ರ ನೀರು ಉಳಿದಿದೆ. ಇನ್ನೂ ತಾಲ್ಲೂಕಿನ ಸಣ್ಣ-ಪುಟ್ಟ ಕೆರೆಗಳಲ್ಲಿ ನೀರೇ ಇಲ್ಲ. ಇದು ರೈತರಿಗೆ ಸಂಕಷ್ಟ ತಂದೊಡ್ಡಿದೆ. ಮುಂದಿನ ದಿನಗಳಲ್ಲಿ ಜನ-ಜಾನುವಾರುಗಳಿಗೆ ನೀರು ಸಿಗುವುದು ಕಷ್ಟವಿದೆ ಎನ್ನುತ್ತಾರೆ ರೈತರು.

ಜೇವರ್ಗಿ ತಾಲ್ಲೂಕಿನ ಹಾಲಗಡ್ಲಾ, ಹೆಗ್ಗನಾಳ, ಸೈದಾಪುರ, ಯಡ್ರಾಮಿ, ಆಂದೋಲಾ, ಅವರಾದ, ಬುಟ್ನಾಳ, ತಾಲ್ಲೂಕಿನಲ್ಲಿ 7 ಕೆರೆಗಳಿವೆ. ಆದರೆ 3 ಮಾತ್ರ ತುಂಬಿವೆ. ನಾಲ್ಕು ಕೆರೆಗಳು ಖಾಲಿ ಇವೆ. ಪ್ರಸಕ್ತ ವರ್ಷದ ತಾಲ್ಲೂಕಿನಲ್ಲಿ ಸಮರ್ಪಕವಾಗಿ ಮಳೆಯಾಗದ ಕಾರಣ ಮೀನುಗಾರಿಕೆ ಸಾಧ್ಯವಾಗುತ್ತಿಲ್ಲ ಎಂದು ಗ್ರೇಡ್‌–2 ತಹಶೀಲ್ದಾರ್ ಪ್ರಸನ್ನಕುಮಾರ ಮೋಗೆಕರ ತಿಳಿಸಿದರು.

ಪೂರಕ ಮಾಹಿತಿ: ಶಿವಾನಂದ ಹಸರಗುಂಡಗಿ, ವೆಂಕಟೇಶ ಹರವಾಳ, ರಘುವೀರಸಿಂಗ್ ಠಾಕೂರ್‌, ಮಂಜುನಾಥ್ ದೊಡ್ಡಮನಿ.