ನವದೆಹಲಿ: ಸಾಮೂಹಿಕ ಅತ್ಯಾಚಾರ, ಅತ್ಯಾಚಾರ ಮತ್ತು ಹತ್ಯೆಯಂತಹ ಗಂಭೀರ ಪ್ರಕರಣಗಳ ತಪ್ಪಿತಸ್ಥರ ವಿವರಗಳು ಪ್ರಸ್ತಾವಿತ ರಾಷ್ಟ್ರೀಯ ದತ್ತಾಂಶ ಪಟ್ಟಿಯಲ್ಲಿ ಶಾಶ್ವತವಾಗಿ ಇರಲಿವೆ ಎಂದು ಗೃಹ ವ್ಯವಹಾರಗಳ ಸಚಿವಾಲಯದ ಹೇಳಿಕೆ ತಿಳಿಸಿದೆ.
ಅಪರಾಧಗಳ ತೀವ್ರತೆ ಆಧರಿಸಿ ಮೂರು ವರ್ಗಗಳಲ್ಲಿ ತಪ್ಪಿತಸ್ಥರ ವಿವರ ವಿಂಗಡಿಸಲಾಗುತ್ತದೆ. ಉಪ ಪೊಲೀಸ್ ವರಿಷ್ಠಾಧಿಕಾರಿ ಅಥವಾ ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಮಟ್ಟದ ಅಧಿಕಾರಿಗಳು ಈ ವಿಂಗಡಣೆ ಮಾಡುತ್ತಾರೆ.
ಲೈಂಗಿಕ ದೌರ್ಜನ್ಯ ಪ್ರಕರಣಗಳಲ್ಲಿ ಶಿಕ್ಷೆಗೊಳಗಾದವರು ಎಸಗಿದ ಇತರೆ ಅಪರಾಧ ಕೃತ್ಯಗಳ ವಿವರಗಳನ್ನು ಸಹ ದತ್ತಾಂಶದಲ್ಲಿ ಉಲ್ಲೇಖಿಸಲಾಗುತ್ತದೆ.
ದತ್ತಾಂಶದಲ್ಲಿ ಏನಿರಲಿವೆ?:
ದೇಶದಾದ್ಯಂತ ಲೈಂಗಿಕ ದೌರ್ಜನ್ಯ ಪ್ರಕರಣಗಳಲ್ಲಿ ಬಂಧಿತರಾದವರು, ಆರೋಪಪಟ್ಟಿಯಲ್ಲಿ ಹೆಸರು ಇರುವವರು ಹಾಗೂ ಶಿಕ್ಷೆ ಅನುಭವಿಸಿದವರ ಭಾವಚಿತ್ರ, ಬೆರಳಚ್ಚು ಸಹಿತ ಎಲ್ಲ ಮಾಹಿತಿಗಳು ದತ್ತಾಂಶದಲ್ಲಿ ಇರಲಿವೆ.
ಅಸಹಜ ಲೈಂಗಿಕ ದೌರ್ಜನ್ಯ
ಮಹಿಳೆಯರ ಘನತೆಗೆ ಧಕ್ಕೆ ತಂದವರು, ಅಸಹಜ ಲೈಂಗಿಕ ದೌರ್ಜನ್ಯ ಪ್ರಕರಣಗಳಲ್ಲಿ ಶಿಕ್ಷೆಗೆ ಗುರಿಯಾದವರನ್ನು ಮೊದಲ ವರ್ಗಕ್ಕೆ ಸೇರಿಸಲಾಗುತ್ತದೆ. ಮೊದಲ ಬಾರಿಗೆ ತಪ್ಪೆಸಗಿದ್ದರೆ ಪಟ್ಟಿಯಲ್ಲಿ 15 ವರ್ಷದವರೆಗೆ ಹಾಗೂ ತಪ್ಪು ಪುನರಾವರ್ತನೆಯಾದಲ್ಲಿ 25 ವರ್ಷದವರೆಗೂ ವಿವರ ಇರಲಿದೆ.
ಗಣನೀಯ ಅಪಾಯ
ಸಮಾಜಕ್ಕೆ ಗಣನೀಯ ಪ್ರಮಾಣದಲ್ಲಿ ಅಪಾಯ ಉಂಟು ಮಾಡುವ ಹಾಗೂ ನಿರಂತರವಾಗಿ ಲೈಂಗಿಕ ದೌರ್ಜನ್ಯ ಎಸಗುವವರ ವಿವರ ಎರಡನೇ ಹಂತದಲ್ಲಿ ಇರಲಿದೆ. ಪರಿಚಿತರು, ಕುಟುಂಬ ಸದಸ್ಯರ ಮೇಲೆ ಅತ್ಯಾಚಾರ ಎಸಗಿದವರು ಈ ವರ್ಗಕ್ಕೆ ಸೇರುತ್ತಾರೆ. ಮೊದಲ ಬಾರಿ ತಪ್ಪೆಸಗಿದರೆ 25 ವರ್ಷದವರೆಗೆ, ಪುನರಾವರ್ತನೆಯಾದರೆ ಜೀವಿತ ಅವಧಿವರೆಗೆ ವಿವರ ಉಲ್ಲೇಖ ಇರಲಿದೆ.
ಸಮಾಜಕ್ಕೆ ಗಂಭೀರ ಆಪತ್ತು
ಸಮಾಜಕ್ಕೆ ಗಂಭೀರ ಆಪತ್ತು ಉಂಟುಮಾಡುವ ಪ್ರಕರಣಗಳಲ್ಲಿ ಶಿಕ್ಷೆಗೊಳಗಾದವರು, ಸಾಮೂಹಿಕ ಅತ್ಯಾಚಾರ ಎಸಗಿದವರು, ಅತ್ಯಾಚಾರ ಮತ್ತು ಹತ್ಯೆ, ಅತ್ಯಾಚಾರದ ಜತೆಗೆ ಅಮಾನವೀಯ ಕೃತ್ಯ ಎಸಗಿದವರನ್ನು ಮೂರನೆ ವರ್ಗಕ್ಕೆ ಸೇರಿಸಲಾಗುತ್ತದೆ.
‘ಅಪರಾಧಿಗಳು ಜೀವಿಸಿರುವವರೆಗೆ ಈ ವರ್ಗದಲ್ಲಿ ಅವರ ವಿವರಗಳು ಇರಲಿದ್ದು, ಅವರ ಸಾವಿನ ನಂತರವಷ್ಟೆ ವಿವರ ತೆಗೆದುಹಾಕಲಾಗುತ್ತದೆ’ ಎಂದು ಹೇಳಿಕೆಯಲ್ಲಿ ಉಲ್ಲೇಖಿಸಲಾಗಿದೆ.
