ಮಡಿಕೇರಿ: ಕೊಡಗು ಜಿಲ್ಲೆಯ ಬಹುದೂರದ ಮತಗಟ್ಟೆಗಳಾದ ಮುಂಡ್ರೋಟ್ ಹಾಗೂ ಕಡಮಕಲ್ಲು ಮತಗಟ್ಟೆಗಳಲ್ಲಿ ಶಾಂತಿಯುತವಾಗಿ ಮತದಾನ ನಡೆದಿದೆ.
ಇಲ್ಲಿಂದ ಸುಮಾರು 120 ಕಿ.ಮೀ ದೂರದಲ್ಲಿರುವ ಕೇರಳದ ರಾಜ್ಯ ಪ್ರವೇಶಿಸಿ ತಲುಪಬೇಕಾಗಿರುವ ಮುಂಡ್ರೋಟ್ ಮತಗಟ್ಟೆಯಲ್ಲಿ 42 ಮತದಾರರು ಇದ್ದರು. ಅವರ ಪೈಕಿ 22 ಮತದಾರರು ಮತದಾನ ಮಾಡಿದರು. ಅವರಲ್ಲಿ 17 ಮಂದಿ ಪುರುಷರು ಮತ್ತು ಐವರು ಮಹಿಳೆಯರು ಇದ್ದರು.
ವಲಯ ಅರಣ್ಯಾಧಿಕಾರಿ ಕೊಟ್ರೇಶ್‌ ಮತ್ತು ಅವರ ತಂಡದ ನೇತೃತ್ವದಲ್ಲಿ ಮತದಾನ ಇಲ್ಲಿ ಯಶಸ್ವಿಯಾಗಿ ನಡೆಯಿತು.
ಈಚೆಗಷ್ಟೇ ನಕ್ಸಲರ ಚಲನವಲನಗಳು ಕಂಡು ಬಂದಿದ್ದ ದಕ್ಷಿಣ ಕನ್ನಡ ಜಿಲ್ಲೆಯ ಮೂಲಕ ತಲುಪಬೇಕಿರುವ ಕಡಮಕಲ್ಲು ಮತಗಟ್ಟೆಯಲ್ಲಿಯೂ ಬಿರುಸಿನ ಮತದಾನ ನಡೆದಿದೆ. ಒಟ್ಟು 188 ಮತದಾರರು ಪೈಕಿ 112 ಮಂದಿ ಮತದಾನ ಮಾಡಿದ್ದಾರೆ. ಶೇ 59.57ರಷ್ಟು ಮತದಾನ ನಡೆದಿದೆ.
ಇಲ್ಲಿ ಮಡಿಕೇರಿ ಕ್ಷೇತ್ರ ಶಿಕ್ಷಣಾಧಿಕಾರಿ ದೊಡ್ಡೇಗೌಡ ಮತ್ತು ಅವರ ತಂಡದ ನೇತೃತ್ವದಲ್ಲಿ ಮತದಾನ ನಡೆಯಿತು.
