ಕೆರೆತೊಣ್ಣೂರು ಗ್ರಾಮದ ಲೇಟ್ ಕೃಷ್ಣೇಗೌಡ ಅವರ ಮಗ ಟಿ.ಕೆ.ಅನಂತ (42) ಮೃತಪಟ್ಟ ರೈತ. ಅನಂತ ಅವರು ಶಂಕನಹಳ್ಳಿ ಗ್ರಾಮದ ಬಳಿ ಇರುವ ತಮ್ಮ ಜಮೀನಿನಲ್ಲಿ ಪರಂಗಿ ಹಣ್ಣು ಬೆಳೆದಿದ್ದು, ಬುಧವಾರ ಮಧ್ಯಾಹ್ನ ತೋಟಕ್ಕೆ ನೀರು ಹಾಯಿಲು ಮೋಟರ್ ಸ್ವಿಚ್‌ ಆನ್ ಮಾಡುವ ವೇಳೆ ವಿದ್ಯುತ್ ಪ್ರವಹಿಸಿದಾಗ ಈ ಘಟನೆ ನಡೆದಿದೆ. ಅನಂತ ಅವರ ತೋಟದ ಅಕ್ಕಪಕ್ಕದಲ್ಲಿದ್ದ ರೈತರು ಪಟ್ಟಣದ ಸರ್ಕಾರಿ ಆಸ್ಪತ್ರೆಗೆ ಕರೆತಂದರಾದರೂ ಅವರು ಈಗಾಗಲೇ ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದರು. ಮೃತ ಅನಂತ ಅವರಿಗೆ ಪತ್ನಿ ಹಾಗೂ ಇಬ್ಬರು ಮ‌ಕ್ಕಳಿದ್ದಾರೆ.
