ಕೆಲವಡೆ ಮುಂಜಾನೆ 6ಕ್ಕೆ ಮಳೆ ಆರಂಭಗೊಂಡು ಒಂದು ಗಂಟೆ ಕಾಲ ಅಬ್ಬರಿಸಿದರೆ, ಮತ್ತೆ ಕೆಲವೆಡೆ ಬೆಳಿಗ್ಗೆ 9ಕ್ಕೆ ಆರಂಭಗೊಂಡು 11ರವರೆಗೂ ಹನಿಯಿತು. ಮಧ್ಯಾಹ್ನ ಒಂದಿಷ್ಟು ಹೊತ್ತು ಬಿಸಿಲು ಬಂತಾದರೂ ಸಂಜೆ 4ರ ಬಳಿಕ ಮತ್ತೆ ಕಪ್ಪನೆಯ ಮೋಡಗಳು ಕವಿದು ಆಗಾಗ್ಗೆ ವರ್ಷಧಾರೆ ಆಗುತ್ತಲೇ ಹೋಯಿತು. ಗುಡುಗು–ಸಿಡಿಲಿನ ಅಬ್ಬರವಿಲ್ಲದೆಯೇ ಸುರಿಯುತ್ತಿದ್ದ ಮಳೆಯಲ್ಲಿ ಜನ ಅತ್ತಿಂದಿತ್ತ ಓಡಾಡಲು ಪ್ರಯಾಸ ಪಟ್ಟರು. ರಜೆಯ ಮೋಜು ಸವಿಯಲು ಹೊರಗೆ ಹೋಗುವ ಯೋಜನೆ ಮಾಡಿಕೊಂಡಿದ್ದವರು ಮನೆಯಲ್ಲೇ ಬೆಚ್ಚಗೆ ಕುಳಿತು ಮಳೆ ಆಸ್ವಾದಿಸಿದರು.