ತೀರ್ಥಹಳ್ಳಿ: ಆಸ್ಪತ್ರೆ ರಸ್ತೆ ತುಂಬ ಗುಂಡಿ!

ತೀರ್ಥಹಳ್ಳಿ: ನಿತ್ಯ ಸಾವಿರಾರು ಜನ ಓಡಾಡುವ ಜೆ.ಸಿ. ಆಸ್ಪತ್ರೆ ರಸ್ತೆಯಲ್ಲಿ ಹೊಂಡ, ಗುಂಡಿ ಬಿದ್ದಿವೆ. ತುರ್ತು ಚಿಕಿತ್ಸೆಗೆಂದು ಧಾವಿಸಿ ಬರುವ ರೋಗಿಗಳು ಪರದಾಡುವ ಸ್ಥಿತಿ ಇದೆ.

ರಾಷ್ಟ್ರೀಯ ಹೆದ್ದಾರಿ– 169ಗೆ ಹೊಂದಿಕೊಂಡಂತೆ ಇರುವ ಜಯಚಾಮರಾಜೇಂದ್ರ ತಾಲ್ಲೂಕು ಆಸ್ಪತ್ರೆಯ ಸಂಪರ್ಕದ ಡಾಂಬಾರು ರಸ್ತೆ ಕಿತ್ತು ಹೋಗಿ ವರ್ಷಗಳೇ ಕಳೆದಿದ್ದರೂ, ದುರಸ್ತಿಯಾಗಿಲ್ಲ. ಹಿರಿಯ ನಾಗರಿಕರು, ರೋಗಿಗಳು, ಮಹಿಳೆಯರು ದ್ವಿಚಕ್ರ ವಾಹನ ಚಲಾಯಿಸುವಾಗ ಅಪಘಾತ ಸಂಭವಿಸುವ ಸಾಧ್ಯತೆ ಹೆಚ್ಚಿದೆ.

ರಸ್ತೆಗೆ ಅಳವಡಿಸಿದ ಜಲ್ಲಿಗಳು ಕಿತ್ತು ಹೋಗಿದ್ದು ಹೆದ್ದಾರಿಯಲ್ಲಿ ಚಲಿಸುವ ಸವಾರರಿಗೂ ತೊಂದರೆಯಾಗುತ್ತಿದೆ. ಜಲ್ಲಿಗಳು ಅಲ್ಲಲ್ಲಿ ರಸ್ತೆಗೆ ಸೇರುತ್ತಿದ್ದು ಅಪಾಯಕ್ಕೆ ಆಹ್ವಾನ ನೀಡುವಂತಿದೆ. ಮಳೆಗಾಲದಲ್ಲಿ ಆಸ್ಪತ್ರೆಯ ಮೇಲ್ಭಾಗದಲ್ಲಿರುವ ಗುಡ್ಡದಿಂದ ಹರಿಯುವ ನೀರು ಹೆದ್ದಾರಿಗೆ ನೇರವಾಗಿ ಹರಿಯುತ್ತದೆ. ಇಲ್ಲಿ ಚರಂಡಿ ಇದ್ದರೂ ಇಲ್ಲದಂತಿದೆ. ಮಣ್ಣಿನಿಂದ ಚರಂಡಿ ಮುಚ್ಚಿ ಹೋಗಿರುವುದಲ್ಲದೇ, ಅದಕ್ಕೆ ಅಳವಡಿಸಿರುವ ಗ್ರಿಲ್‌ಗಳು ತುಕ್ಕು ಹಿಡಿದಿದೆ. ಚರಂಡಿ ಸರಿಪಡಿಸದ ಹೊರತು ಈ ಸಮಸ್ಯೆಗೆ ಪರಿಹಾರ ಇಲ್ಲ ಎನ್ನುತ್ತಾರೆ ಸ್ಥಳೀಯರು.