ಕಕ್ಕೇರಾ: ಶಿಕ್ಷಣದ ಸಿಹಿ ಹಂಚಿದ ಸಕ್ರೆಪ್ಪ

22 ವರ್ಷಗಳ ಹಿಂದೆ ಪುರಸಭೆ ವ್ಯಾಪ್ತಿಯ ಅಬ್ಲೇರದೊಡ್ಡಿಯ ಮಕ್ಕಳು ಶಾಲೆಗೆ ಹೋಗದೆ ಜಮೀನು ಕೆಲಸ, ದನ ಕಾಯುವುದು ಮಾಡುತ್ತಿದ್ದರು. ಇದನ್ನು ಗಮನಿಸಿದ ವೃದ್ಧ ಸಕ್ರೆಪ್ಪ ಅಬ್ಲೇರ್ ತನ್ನ ಗ್ರಾಮದ ಮಕ್ಕಳ ಭವಿಷ್ಯಕ್ಕೆ ಏನಾದರೂ ಮಾಡಬೇಕು ಎಂದು ಯೋಚಿಸಿ 2002ರಲ್ಲಿ ಸರ್ಕಾರಿ ಜಮೀನಿನಲ್ಲಿ ಚಿಕ್ಕ ಗುಡಿಸಲು ಹಾಕಿ ಅದರಲ್ಲೇ ಶಾಲೆ ಆರಂಭಿಸುತ್ತಾರೆ. ಸಕ್ರೆಪ್ಪ ಅಬ್ಲೇರ್ ಅಬ್ಲೇರದೊಡ್ಡಿ ಗ್ರಾಮದಲ್ಲಿ ಶಾಲೆ ಆರಂಭಿಸಿದಾಗ ಸರಿಯಾಗಿ ರಸ್ತೆ, ಸೌಲಭ್ಯಗಳು ಇರಲಿಲ್ಲ.

ವೃದ್ಧ ಸಕ್ರೆಪ್ಪ 2002ರಿಂದ 2008ರವರೆಗೆ ಉಚಿತವಾಗಿ ಪಾಠ ಹೇಳಿದ್ದಾರೆ. ಚಿಣ್ಣರ ಅಂಗಳ, ಪರಿಹಾರ ಬೋಧನೆಯಂತಹ ಕಾರ್ಯಕ್ರಮಗಳನ್ನು 3 ವರ್ಷ ಕಲಿಸಿದ್ದಾರೆ. ಆಗ ₹20 ಕೊಡುತ್ತಿದ್ದರು. ಅದನ್ನೂ ತಾವು ಇಟ್ಟುಕೊಳ್ಳದೆ ಮಕ್ಕಳಿಗೆ ಪೆಪ್ಪರ್‌ಮೆಂಟ್‌ ತಂದು ಕೊಡುತ್ತಿದ್ದರು.

‘ಶಿಕ್ಷಣ ಪ್ರೇಮಿ ಸಕ್ರೆಪ್ಪ ಅವರ ನಿಸ್ವಾರ್ಥ ಸೇವೆ ಅಪಾರವಾದುದ್ದು. ಈಗಲೂ ಅವರು ಬೇಸಿಗೆ ಕಾಲದಲ್ಲಿ ಪ್ರಾಣಿ, ಪಕ್ಷಿಗಳಿಗಳಿಗೆ ನೀರಿನ ವ್ಯವಸ್ಥೆ ಮಾಡುತ್ತಾರೆ. ಅವರಿಗೆ ಸರ್ಕಾರದ ನೆರವು ಬೇಕಿದೆ’ ಎನ್ನುತ್ತಾರೆ ಗ್ರಾಮಸ್ಥರು.

ಗುಡಿಸಲಿನಲ್ಲಿ ಆರಂಭವಾದ ಶಾಲೆ ಈಗ ಹಿರಿಯ ಪ್ರಾಥಮಿಕ ಶಾಲೆ: 2002ರಲ್ಲಿ ಸರ್ಕಾರದ ಯಾವುದೇ ನೆರವು ಇಲ್ಲದೆ ಪುಟ್ಟ ಗುಡಿಸಲಿನಲ್ಲಿ ಕೇವಲ 5 ವಿದ್ಯಾರ್ಥಿಗಳೊಂದಿಗೆ ಆರಂಭವಾದ ಶಾಲೆ 2008ರಲ್ಲಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಾಗಿದೆ. 1ರಿಂದ 7ನೇ ತರಗತಿ ವರೆಗೆ ಇದ್ದು ಅಬ್ಲೇರದೊಡ್ಡಿ, ಜಂಗಣ್ಣರದೊಡ್ಡಿ, ಡೊಳ್ಳಿನರದೊಡ್ಡಿಯ ಒಟ್ಟು 120 ವಿದ್ಯಾರ್ಥಿಗಳ ದಾಖಲಾತಿ ಇದೆ. ಇಬ್ಬರು ಕಾಯಂ, ಇಬ್ಬರು ಅಥಿತಿ ಶಿಕ್ಷರು ಇದ್ದಾರೆ.