ಯಾದಗಿರಿ: ಜಿಲ್ಲೆಯಲ್ಲಿ ಹಿಂಗಾರು, ಮುಂಗಾರು ಹಂಗಾಮಿನಲ್ಲಿ ಸಮರ್ಪಕ ಮಳೆಯಾಗದ ಕಾರಣ ಅಲ್ಪಸ್ವಲ್ಪ ಜೋಳದ ಬೆಳೆಯನ್ನು ಕಾಡು ಪ್ರಾಣಿ ಪಕ್ಷಿಗಳಿಂದ ರಕ್ಷಣೆ ಮಾಡಲು ರೈತರು ಹರಸಾಹಸ ಪಡುತ್ತಿದ್ದಾರೆ.
ಭೀಮಾ ನದಿ ಸಮೀಪ ಇರುವುದರಿಂದ ನರಿ, ತೋಳ, ಕಾಡುಹಂದಿಗಳು, ನವಿಲುಗಳಂತಹ ಪ್ರಾಣಿಗಳಿಂದ ಬೆಳೆ ರಕ್ಷಣೆ ಮಾಡಲು ಜಮೀನಿನ ಸುತ್ತಮುತ್ತಲೂ ಸೀರೆಗಳನ್ನು ಕಟ್ಟಿದ್ದಾರೆ. ಇದರಿಂದ ರಾತ್ರಿ ವೇಳೆ ಪ್ರಾಣಿಗಳು ಜಮೀನುಗಳತ್ತ ಬರದಂತೆ ರೈತರು ಸೀರೆಗಳಿಂದ ರಕ್ಷಣೆ ಮಾಡಲು ಮುಂದಾಗಿದ್ದಾರೆ. ಒಂದೆಡೆ ಮಳೆರಾಯನ ಅವಕೃಪೆಯಿಂದ ಬರದ ಛಾಯೆ, ಮತ್ತೊಂದಡೆ ಇರುವ ಬೆಳೆಗಳನ್ನು ರಕ್ಷಣೆ ಮಾಡಲು ರೈತರು ಹರಸಹಾಸ ಪಡುತ್ತಿದ್ದಾರೆ.
‘ಮುಂಗಾರು ಮತ್ತು ಹಿಂಗಾರು ಮಳೆ ಕೈ ಕೊಟ್ಟಿದ್ದರಿಂದ ಕೆಲ ರೈತರು ಮಾತ್ರ ಹಿಂಗಾರು ಜೋಳದ ಬೆಳೆ ಬಿತ್ತನೆ ಮಾಡಿದ್ದಾರೆ. ಈಗ ಇರುವ ಅಲ್ಪಸ್ವಲ್ಪ ಜೋಳದ ಬೆಳೆಗೆ ಪ್ರಾಣಿಗಳ ಉಪಟಳ ಹೆಚ್ಚಾಗಿದೆ. ರಾತ್ರಿ ವೇಳೆ ಬೆಳೆ ಹಾನಿ ಆತಂಕ ಎದುರಾಗಿದೆ’ ರೈತ ಸಿದ್ದಣ್ಣ ನಾಲ್ವಡಿಗಿ ಹೇಳುತ್ತಾರೆ.
