Technology in Teaching | ತಂತ್ರಜ್ಞಾನದ ಮೋಹ: ಆಧುನಿಕ ಮೂಢನಂಬಿಕೆ?!

ಈಗಂತೂ ಸ್ಮಾರ್ಟ್ ಬೋರ್ಡನ್ನು ಯಾರು ಹೆಚ್ಚು ಉಪಯೋಗಿಸುತ್ತಾರೋ ಅವರಿಗೇ ಹೆಚ್ಚು ಆದ್ಯತೆ ಇದೆ. ಬೋಧಕರಿಗೆ ವಿದ್ಯಾರ್ಥಿಗಳು ಅಂಕ ನೀಡುವಾಗ ಈ ನಿಯಮವನ್ನು ಆಧರಿಸಿದ ಒಂದು ಪ್ರಶ್ನೆಯನ್ನು ವಿದ್ಯಾರ್ಥಿಗಳಿಗೆ ಕೇಳಲಾಗುತ್ತದೆ. ತರಗತಿಯನ್ನು ಆಸಕ್ತಿದಾಯಕ ಆಗಿಸುವುದಕ್ಕೆ ಶಿಕ್ಷಕರು ತಾಂತ್ರಿಕತೆಯನ್ನು ಸಮರ್ಪಕವಾಗಿ ಬಳಸಿಕೊಳ್ಳುತ್ತಿರುವುದನ್ನು ದೃಢೀಕರಿಸುವ ಸಲುವಾಗಿ ಈ ನಿಯಮವನ್ನು ರೂಪಿಸಲಾಗಿದೆ. ಆದರೆ ಇದು ಬಹುತೇಕ ಬೋಧಕರು ಮತ್ತು ವಿದ್ಯಾರ್ಥಿಗಳಿಗೆ ತಿರುಗುಬಾಣವಾಗುತ್ತಿದೆ. ಕಲಿಕೆಯ ಕುರಿತು ಗಂಭೀರವಾಗಿರುವ, ತಿಳಿದುಕೊಳ್ಳುವ ಹಂಬಲವುಳ್ಳ ವಿದ್ಯಾರ್ಥಿಗಳು ಮಾತ್ರ ತರಗತಿಯಲ್ಲಿ ಚರ್ಚೆಗೆ ಒಳಪಡುವ ವಿಷಯಗಳ ಆಧಾರದ ಮೇಲೆ ಹೊಸದಾಗಿ ಯೋಚಿಸುವ ಪ್ರಯತ್ನ ಮಾಡುತ್ತಾರೆ. ಹಾಗಾಗಿಯೇ ಒಂದು ತರಗತಿಯ ಕೆಲವೇ ಕೆಲವು ವಿದ್ಯಾರ್ಥಿಗಳ ಉತ್ತರಪತ್ರಿಕೆಗಳು ಭಿನ್ನವಾಗಿ ಇರುತ್ತವೆ. ಇನ್ನುಳಿದವರ ಅರಿವು, ಯಾಂತ್ರಿಕ ಅವಲಂಬನೆಯ ಮಿತಿಯೊಂದಿಗೆ ಮೊಟಕುಗೊಳ್ಳುತ್ತದೆ.

ತಂತ್ರಜ್ಞಾನವನ್ನು ಬಳಸಿ ತರಗತಿಯನ್ನು ನಿರ್ವಹಿಸುವಾಗ ಬೋಧಕರಿಗೆ ಇರುವಷ್ಟೇ ಎಚ್ಚರದ ಪ್ರಜ್ಞೆ ವಿದ್ಯಾರ್ಥಿಗಳಲ್ಲೂ ಇರಬೇಕು. ಹಾಗಿದ್ದಾಗ ಪ್ರಶ್ನೆಗಳು ಹುಟ್ಟುತ್ತವೆ. ಪ್ರಶ್ನೆಗಳನ್ನು ಕೇಳುತ್ತಾ ರಚನಾತ್ಮಕ ಚಿಂತನೆಯ ಶಕ್ತಿಯನ್ನು ರೂಪಿಸಿಕೊಳ್ಳಬೇಕು. ವಿದ್ಯಾರ್ಥಿಗಳು ಪ್ರಶ್ನೆಗಳನ್ನು ಕೇಳಬೇಕು ಎಂಬ ‘ಶೈಕ್ಷಣಿಕ ಹಸಿವು’ ಶಿಕ್ಷಕರಲ್ಲೂ ಇರಬೇಕು. ಆಗ ಮಾತ್ರ ತಂತ್ರಜ್ಞಾನ ಆಧಾರಿತ ತರಗತಿಗಳು ಅತಿಹೆಚ್ಚು ಪರಿಣಾಮಕಾರಿ ಆಗಲು ಸಾಧ್ಯ.