ಹೊನ್ನೇನಹಳ್ಳಿ ಗ್ರಾ.ಪಂ ಅಧ್ಯಕ್ಷಗಾದಿ ಕಾಂಗ್ರೆಸ್‌ ತೆಕ್ಕೆಗೆ

ಗ್ರಾ.ಪಂನಲ್ಲಿ 17 ಸದಸ್ಯರಿದ್ದು, ಈ ಪೈಕಿ 12 ಮಂದಿಯು ಶಾಸಕ ವರ್ತೂರು ಪ್ರಕಾಶ್‌ ಬಣದವರು. ಉಳಿದ 4 ಮಂದಿ ಕಾಂಗ್ರೆಸ್‌ ಹಾಗೂ ಒಬ್ಬರು ಜೆಡಿಎಸ್‌ ಬೆಂಬಲಿತ ಸದಸ್ಯರು. ಶಾಸಕರ ಬಣದ 5 ಸದಸ್ಯರು ಇತ್ತೀಚೆಗೆ ಕಾಂಗ್ರೆಸ್‌ ಪಾಳಯದಲ್ಲಿ ಗುರುತಿಸಿಕೊಂಡಿದ್ದರು.

ಕಾಂಗ್ರೆಸ್‌ ಪಾಳಯದಿಂದ ಅಧ್ಯಕ್ಷ ಸ್ಥಾನಕ್ಕೆ ಸೌಂದರ್ಯ ಮತ್ತು ಶಾಸಕರ ಬಣದಿಂದ ಮಲ್ಲಿಗಮ್ಮ ನಾಮಪತ್ರ ಸಲ್ಲಿಸಿದರು. ಅಂತಿಮವಾಗಿ ಚುನಾವಣೆ ನಡೆದು ಸೌಂದರ್ಯ ಪರ 9 ಸದಸ್ಯರು ಮತ ಚಲಾಯಿಸಿದರು. ಮಲ್ಲಿಗಮ್ಮ ಪರ 7 ಸದಸ್ಯರು ಮತ ಚಲಾಯಿಸಿದರು. ಜೆಡಿಎಸ್‌ ಬೆಂಬಲಿತ ಸದಸ್ಯ ಮಲ್ಲೇಶ್‌ಬಾಬು ಗೈರಾದರು. ಸೌಂದರ್ಯ 2 ಮತಗಳ ಅಂತರದಿಂದ ಜಯ ಗಳಿಸಿ ಅಧ್ಯಕ್ಷಗಾದಿ ಏರಿದರು.

ಮೊದಲ ಆದ್ಯತೆ: ನೂತನ ಅಧ್ಯಕ್ಷೆ ಸೌಂದರ್ಯ ಮಾತನಾಡಿ, ‘ಪಂಚಾಯಿತಿ ವ್ಯಾಪ್ತಿಯ ಗ್ರಾಮಗಳಲ್ಲಿನ ಕುಡಿಯುವ ನೀರಿನ ಸಮಸ್ಯೆ ನಿವಾರಣೆಗೆ ಮೊದಲ ಆದ್ಯತೆ ನೀಡುತ್ತೇನೆ. ಗ್ರಾಮಗಳಲ್ಲಿ ಸ್ವಚ್ಛತೆ ಕಾಪಾಡುವುದು ಪ್ರತಿಯೊಬ್ಬರ ಜವಾಬ್ದಾರಿ. ಈ ಸಂಗತಿ ಅರಿತು ಸಾರ್ವಜನಿಕರು ತಮ್ಮ ಮನೆ ಹಾಗೂ ಸುತ್ತಮುತ್ತಲಿನ ಪರಿಸರವನ್ನು ಸ್ವಚ್ಛವಾಗಿ ಇಟ್ಟುಕೊಳ್ಳಬೇಕು. ನೀರನ್ನು ಮಿತವಾಗಿ ಬಳಸಬೇಕು’ ಎಂದು ಹೇಳಿದರು.

ತಮ್ಮ ಗೆಲುವಿಗೆ ಕಾರಣರಾದ ಕಾಂಗ್ರೆಸ್ ಮುಖಂಡ ಚಿಕ್ಕರಾಯಪ್ಪ ಅವರಿಗೆ ಸೌಂದರ್ಯ ಕೃತಜ್ಞತೆ ಸಲ್ಲಿಸಿದರು. ಸದಸ್ಯರಾದ ಶ್ರೀನಾಥ್, ಮಂಜುನಾಥ್, ನಾಗರಾಜು ಇದ್ದರು.