ಫಸ್ಟ್‌ ನೈಟ್‌ ಬೆಡ್‌ರೂಂ ಫೋಟೊ ಹಾಕಿ ಟ್ರೋಲ್‌ಗೆ ತುತ್ತಾದ ನಟಿ ಸ್ವರಾ ಭಾಸ್ಕರ್
ಅಕ್ಷರ ಗಾತ್ರ :ಆ |ಆ |ಆ
ಮುಂಬೈ: ಬಾಲಿವುಡ್ ನಟಿ ಸ್ವರಾ ಭಾಸ್ಕರ್ ಅವರು ಸಮಾಜವಾದಿ ಪಕ್ಷದ ರಾಜಕಾರಣಿ, ಮಹಾರಾಷ್ಟ್ರದ ಫಹಾದ್ ಅಹ್ಮದ್ ಎಂಬುವವರನ್ನು ಇತ್ತೀಚೆಗೆ ವಿವಾಹವಾದರು.
ವಯಸ್ಸಿನ ಅಂತರ ಹಾಗೂ ರಿಜಿಸ್ಟರ್ ಮ್ಯಾರೇಜ್ ಆಗಿದ್ದಕ್ಕೆ ಟ್ರೋಲಿಗರ ಟೀಕೆಗೆ ಗುರಿಯಾಗಿದ್ದ ಈ ನಟಿ ಇದೀಗ ಮತ್ತೊಂದು ವಿಷಯದಲ್ಲಿ ಟ್ರೋಲಿಗರಿಗೆ ಆಹಾರವಾಗಿದ್ದಾರೆ.
ಮದುವೆ ನಂತರ ಇತ್ತೀಚಿಗೆ ತಮ್ಮ ಮಧುಚಂದ್ರ ಮುಗಿಸಿರುವ ಸ್ವರಾ, ಫಸ್ಟ್‌ ನೈಟ್‌ ಗೆ ಸಿದ್ದಪಡಿಸಿದ್ದ ಶೃಂಗರಿಸಿದ ಬೆಡ್‌ರೂಂ ಚಿತ್ರವನ್ನು ಹಂಚಿಕೊಂಡು ‘ಫಿಲ್ಮಿ ಸ್ಟೈಲ್‌ನಲ್ಲಿ ಅಮ್ಮ ನನಗೆ ಕರುಣಿಸಿದ ಸೌಭಾಗ್ಯದ ರಾತ್ರಿ’ ಎಂದು ತಮ್ಮ ಇನ್‌ಸ್ಟಾಗ್ರಾಂ ಸ್ಟೋರಿಯಲ್ಲಿ ಬರೆದುಕೊಂಡಿದ್ದರು.
ಅವರ ಬೆಡ್‌ರೂಂ ಫೋಟೊ ಬಹಿರಂಗವಾಗುತ್ತಿದ್ದಂತೆಯೇ ಅನೇಕರು ಸ್ವರಾ ಬಗ್ಗೆ ಆಡಿಕೊಂಡಿದ್ದರು. ಇದನ್ನೂ ಸಾಮಾಜಿಕ ಮಾಧ್ಯಮದಲ್ಲಿ ಹಾಕಬೇಕೆ? ಎಂದು ಆಕ್ರೋಶ ವ್ಯಕ್ತಪಡಿಸಿದ್ದರು. ಕೂಡಲೇ ಆ ಪೋಸ್ಟ್ ಅನ್ನು ಸ್ವರಾ ಅಳಿಸಿ ಹಾಕಿದ್ದರು.
ಈ ಹಿಂದೆಯೂ ಟ್ರೋಲ್
ಫಹಾದ್ ಅವರನ್ನು ಸ್ವರಾ, ‘ಸಹೋದರ’ ಎಂದು ಕರೆದ ವಿಷಯಕ್ಕೆ ಸಂಬಂಧಿಸಿದಂತೆ ಸ್ವರಾ ಭಾಸ್ಕರ್ ಮದುವೆ ಸಂಗತಿ ಸದ್ದು ಮಾಡುತ್ತಿದೆ. ಅಲ್ಲದೇ ಅದೇ ವಿಷಯಕ್ಕೆ ಸ್ವರಾ ಅವರನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೋಲ್ ಮಾಡಲಾಗುತ್ತಿದೆ.
ವಿಷಯ ಏನೆಂದರೆ ಫಹಾದ್ ಅಹ್ಮದ್ ಅವರನ್ನು ಪ್ರತಿಭಟನೆಯೊಂದರಲ್ಲಿ ಸ್ವರಾ ಭಾಸ್ಕರ್ ಭೇಟಿಯಾಗಿದ್ದರು. ಆ ನಂತರ ಇಬ್ಬರ ಸ್ನೇಹ ಮುಂದುವರೆದಿತ್ತು. ಇದೇ ವರ್ಷ ಫೆಬ್ರುವರಿ 2 ರಂದು ಟ್ವೀಟ್ ಮಾಡಿದ್ದ ಸ್ವರಾ ಭಾಸ್ಕರ್ ಫಹಾದ್ ಅವರಿಗೆ ಜನ್ಮದಿನದ ಶುಭಾಶಯ ಕೋರಿದ್ದರು.
ಆ ಟ್ವೀಟ್‌ನಲ್ಲಿ ಸ್ವರಾ, ‘ಜನ್ಮದಿನದ ಶುಭಾಶಯಗಳು ಮಿಯಾನ್, ನಿಮ್ಮ ವಿಶ್ವಾಸವನ್ನು ಉಳಿಸಿಕೊಳ್ಳಿ ಸಹೋದರ. ನೀವು ಯಾವಾಗಲು ಸಂತೋಷವಾಗಿರಿ. ಹಾ.. ನಿಮಗೆ ವಯಸ್ಸಾಗುತ್ತಿದೆ ಈಗಲೇ ಮದುವೆಯಾಗಿ’ ಎಂದು ಹೇಳಿದ್ದರು. ಈ ವಿಷಯವನ್ನಿಟ್ಟುಕೊಂಡು ಇದೀಗ ಸ್ವರಾ ಅವರ ಕಾಲೆಳೆಯಲಾಗುತ್ತಿದೆ. ಅಂದಹಾಗೇ ಫಹಾದ್ ಅವರು ಸ್ವರಾ ಅವರಿಗಿಂತ 4 ವರ್ಷ ಚಿಕ್ಕವರು.
ಸಮಾಜವಾದಿ ಪಕ್ಷದ ಯುವ ಘಟಕ ‘ಸಮಾಜವಾದಿ ಯುವಜನ ಸಭಾ’ದ ಮಹಾರಾಷ್ಟ್ರ ರಾಜ್ಯ ಘಟಕದ ಅಧ್ಯಕ್ಷ ಫಹಾದ್ ಅಹ್ಮದ್ ಅವರನ್ನು ವಿವಾಹವಾಗಿರುವ ವಿಷಯವನ್ನು ಸ್ವರಾ ಗುರುವಾರ ಸಾಮಾಜಿಕ ಮಾಧ್ಯಮದಲ್ಲಿ ಬಹಿರಂಗಪಡಿಸಿದ್ದರು.
ವಿಡಿಯೊವೊಂದನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿರುವ ಸ್ವರಾ ಅದಕ್ಕೆ ಒಂದು ಒಕ್ಕಣೆಯನ್ನೂ ಬರೆದಿದ್ದಾರೆ. 'ನಮಗೆ ಬೇಕಾದ ಕೆಲವನ್ನು ನಮ್ಮ ಪಕ್ಕದಲ್ಲೇ ಇಟ್ಟುಕೊಂಡು ಎಲೆಲ್ಲೋ ಹುಡುಕುತ್ತಿರುತ್ತೇವೆ. ನಾವು ಪ್ರೀತಿಯನ್ನು ಹುಡುಕುತ್ತಿದ್ದೆವು. ನಾವು ಮೊದಲು ಸ್ನೇಹವನ್ನು ಕಂಡುಕೊಂಡೆವು. ತದನಂತರ ನಾವು ಒಬ್ಬರನ್ನೊಬ್ಬರು ಕಂಡುಕೊಂಡೆವು! ನನ್ನ ಹೃದಯಕ್ಕೆ ಸುಸ್ವಾಗತ ಫಹಾದ್ ಅಹ್ಮದ್. ಹೃದಯ ಗಲಿಬಿಲಿಗೊಂಡಿದೆ, ಆದರೆ ಅದು ನಿನ್ನದೇ!’ ಎಂದು ಸ್ವರಾ ಬರೆದಿದ್ದರು.
ಈ ಟ್ವೀಟ್ ಅನ್ನು ರೀಟ್ವೀಟ್‌ ಮಾಡಿಕೊಂಡಿರುವ ಫಹಾದ್ ಅಹ್ಮದ್, ‘ಈ ಗಲಿಬಿಲಿಯೂ ಇಷ್ಟು ಸುಂದರವಾಗಿರುತ್ತದೆ ಎಂದು ನನಗೆ ತಿಳಿದಿರಲಿಲ್ಲ. ನನ್ನ ಕೈ ಹಿಡಿದಿದ್ದಕ್ಕಾಗಿ ನಿನಗೆ ಧನ್ಯವಾದಗಳು’ ಎಂದು ಬರೆದುಕೊಂಡಿದ್ದರು.
ಸ್ವರಾ ಭಾಸ್ಕರ್ ಕೊನೆಯ ಬಾರಿಗೆ ‘ಜಹಾನ್ ಚಾರ್ ಯಾರ್’ (2022) ಎಂಬ ಚಲನಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. 'ಅನಾರ್ಕಲಿ ಆಫ್ ಆರಾಹ್', 'ವೀರೆ ದಿ ವೆಡ್ಡಿಂಗ್', 'ನಿಲ್ ಬತ್ತೆ ಸನ್ನತಾ' ಮತ್ತು 'ರಾಂಜನಾ' ಸೇರಿದಂತೆ ಹಲವು ಚಿತ್ರಗಳಲ್ಲಿ ಸ್ವರಾ ಭಾಸ್ಕರ್ ಅಭಿನಯಿಸಿದ್ದಾರೆ.
ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
