ಮುಂಬೈ: ಆ್ಯನಿಮೇಷನ್ ಚಲನಚಿತ್ರ ‘ಹನುಮಾನ್ ದಾ ದಮ್ದಾರ್’ನಲ್ಲಿ ಯುವ ಹನುಮನಿಗೆ ಧ್ವನಿಯಾಗಿದ್ದಾರೆ ಖ್ಯಾತ ಬಾಲಿವುಡ್ ನಟ ಸಲ್ಮಾನ್ ಖಾನ್.
ಹನುಮಜಯಂತಿಯ ದಿನವಾದ ಮಂಗಳವಾರ ಚಲನಚಿತ್ರದ ಮೋಷನ್ ಪೋಸ್ಟರ್ ಬಿಡುಗಡೆಯಾಗಿದೆ.
ರಾಮನನ್ನು ಭೇಟಿಯಾದ ಸಂದರ್ಭದ ಯುವ ಹನುಮನ ಕತೆಯನ್ನೊಳಗೊಂಡಿರುವ, ರುಚಿ ನಾರಾಯಣ್ ನಿರ್ದೇಶನದ ಈ ಚಲನಚಿತ್ರ ಮೇ 19ರಂದು ಬಿಡುಗಡೆಯಾಗಲಿದೆ. ಹನುಮನಿಗೆ ತನ್ನ ಶಕ್ತಿಯ ಬಗ್ಗೆ ಅರಿವಿಲ್ಲದೆ ಇದ್ದದ್ದು, ರಾಮನನ್ನು ಭೇಟಿಯಾದ ಮೇಲೆ ಸ್ಫೂರ್ತಿ ಪಡೆದದ್ದು, ತನ್ನ ಯೋಗ್ಯತೆ ಏನೆಂಬುದನ್ನು ಅರಿತದ್ದು ಮತ್ತಿತರ ಅಂಶಗಳು ಚಲನಚಿತ್ರದಲ್ಲಿ ಅಡಕವಾಗಿರಲಿವೆ ಎನ್ನಲಾಗಿದೆ.
ರವೀನಾ ಟಂಡನ್, ಸೌರಭ್ ಶುಕ್ಲಾ, ಜಾವೇದ್ ಅಖ್ತರ್, ಕುನಾಲ್ ಖೇಮು, ಮಕರಂದ್ ದೇಶಪಾಂಡೆ, ವಿನಯ್ ಪಾಠಕ್ ಮತ್ತು ಚಂಕಿ ಪಾಂಡೆ ಸಹ ಚಲನಚಿತ್ರಕ್ಕೆ ಧ್ವನಿ ನೀಡಿದ್ದಾರೆ.