‘ಕನಸನ್ನು ಬಚ್ಚಿಡಬೇಡಿ....’

7
ಚೆಲುವಿನ ಚಿತ್ತಾರ

‘ಕನಸನ್ನು ಬಚ್ಚಿಡಬೇಡಿ....’

Published:
Updated:

‘ಮದುವೆಯಾದ ಬಳಿಕ ಫ್ಯಾಷನ್‌ ಲೋಕದಲ್ಲಿ ಮಹಿಳೆಯರಿಗೆ ಸ್ಥಾನ ಇಲ್ಲ. ಆ ಕ್ಷೇತ್ರದಲ್ಲಿ ಸಾಧನೆ ಮಾಡಲು ಸಾಧ್ಯವಿಲ್ಲ ಎಂದು ಹೇಳಿದವರು ಯಾರು?’ ಇದು ಪ್ರತಿಷ್ಠಿತ ಮಿಸೆಸ್‌ ಏಷ್ಯಾ ಇಂಟರ್‌ನ್ಯಾಷನಲ್‌ ಇಂಡಿಯಾ ಸ್ಪರ್ಧೆ ವಿಜೇತೆ ಶ್ವೇತಾ ತಿವಾರಿಯ ಖಾರವಾದ ಪ್ರಶ್ನೆ. 

ಒಂದು ಮಗುವಿನ ತಾಯಿಯಾಗಿರುವ ಶ್ವೇತಾ ಈ ಹಿಂದೆ ಫ್ಯಾಷನ್‌ ಲೋಕದ ತಥಾಕಥಿತಗಳನ್ನು ಮುರಿದು, ಅನೇಕ ಸೌಂದರ್ಯ ಸ್ಪರ್ಧೆಗಳಲ್ಲಿ ತಮ್ಮ ಛಾಪು ಮೂಡಿಸಿದ್ದಾರೆ. ಜೀವನ ಎಂಬುದು ಸವಾಲು, ಮದುವೆಯಾದ ಮೇಲೆ ಜವಾಬ್ದಾರಿ ಹೆಚ್ಚಾಗುತ್ತದೆ. ಆದರೆ ಮಹಿಳೆಯರು ತಮ್ಮ ಕನಸುಗಳನ್ನು ಬಚ್ಚಿಟ್ಟುಕೊಂಡು ಬದುಕಬಾರದು ಎಂದು ಹೇಳುತ್ತಾರೆ. 

ಬಾಲ್ಯದಿಂದಲೂ ಶ್ವೇತಾಗೆ ಬಟ್ಟೆ, ಆಭರಣ ಹಾಗೂ ಮೇಕಪ್‌ ಅಂದ್ರೆ ಭಾರಿ ಇಷ್ಟ. ಗ್ಲಾಮರ್‌ ಲೋಕ ಅವರನ್ನು ಆಗಲೇ ಸೆಳೆದಿತ್ತು. ಹೈದಾರಾಬಾದ್‌ನಲ್ಲಿ ಓದುತ್ತಿರುವಾಗ ಅವರು ಮಿಸ್‌ ಯುನಿವರ್ಸಿಟಿ ಸ್ಪರ್ಧೆಯಲ್ಲಿ ಪಾಲ್ಗೊಂಡರು. ಅಲ್ಲಿಂದ ಅವರ ಮಾಡೆಲಿಂಗ್‌ ಪಯಣ ಆರಂಭವಾಯಿತು. ಅದೇ ಮೊದಲ ಬಾರಿಗೆ ವೇದಿಕೆ ಮೇಲೆ ಬೆಕ್ಕಿನ ಹೆಜ್ಜೆ ಹಾಕಿದ ಅವರಿಗೆ ಮಿಸ್‌ ಯುನಿವರ್ಸಿಟಿ ಕಿರೀಟ ಸಿಕ್ಕಿತು. ಆಗ ಅವರ ವಯಸ್ಸು ಬರೀ 17. ಇದೇ ಘಟನೆ ಅವರನ್ನು ರೂಪದರ್ಶಿ ಆಗುವಂತೆ ಪ್ರೇರೇಪಿಸಿತಂತೆ.

ಬಳಿಕ ಇವರ ಜೀವನಕ್ಕೆ ದೊಡ್ಡ ತಿರುವು ನೀಡಿದ್ದು ‘ಮಿಸ್‌ ಆಂಧ್ರಪ್ರದೇಶ’ ಪಟ್ಟ ಗೆದ್ದಾಗ. ಈ ಪಟ್ಟ ಗೆದ್ದಾಗ ಮಾಡೆಲಿಂಗ್‌ ಲೋಕದಲ್ಲಿ ನಾನು ಮಿಂಚಬೇಕು, ಸಾಮಾಜಿಕ ಯೋಜನೆಗಳಲ್ಲಿ ನಾನು ತೊಡಗಿಸಿಕೊಳ್ಳಬೇಕು ಎಂಬ ಆಸೆ ಹುಟ್ಟಿತು. ಆದರೆ 20 ವಯಸ್ಸು ತುಂಬುದರೊಳಗೆ ಮದುವೆಯಾಯಿತು. ಹೊಸ ಸಂಬಂಧ, ಹೊಸ ಜವಾಬ್ದಾರಿ ಹಾಗೂ ಹೊಸ ಸವಾಲು. ಆಗ ಸ್ವಲ್ಪ ಸಮಯ ಫ್ಯಾಷನ್‌ ಲೋಕದಿಂದ ದೂರವುಳಿದಿದ್ದರು. 

‘ಆ ಸಮಯದಲ್ಲಿ ನನಗೆ ಹೊಸ ಕುಟುಂಬಕ್ಕೆ ಹೊಂದಾಣಿಕೆಯಾಗುವುದು ಮುಖ್ಯವಾಗಿತ್ತು. ಹಾಗಾಗಿ ಕೆರಿಯರ್‌ ಅನ್ನು ಹಿಂದೆ ತಳ್ಳಿದ್ದೆ. ಮದುವೆಯಾದ ಬಳಿಕ ಖಾಸಗಿ ಹಾಗೂ ವೃತ್ತಿಪರ ಬದುಕಿನಲ್ಲಿ ಕೆಲವೊಂದು ಬದಲಾವಣೆಗಳನ್ನು ಮಾಡಿಕೊಳ್ಳಲೇಬೇಕು. ಇದು ಸ್ವಲ್ಪ ಕಷ್ಟವಾದರೂ ಅಸಾಧ್ಯವೇನಲ್ಲ. ಮಿಸೆಸ್‌ ರಾಯಪುರ್ ಆಡಿಶನ್‌ಗೆ ನಡೆಯುತ್ತಿದ್ದಾಗ ನಾನು ನನ್ನ ಕನಸುಗಳನ್ನು ವಾಪಸ್‌ ಕಟ್ಟಿಕೊಳ್ಳಬೇಕು, ಎಲ್ಲಾ ಮಹಿಳೆಯರಿಗೆ ಮಾದರಿಯಾಗಬೇಕು ಎಂದು ಅನಿಸಿತು. ಇದಕ್ಕೆ ಪತಿ ಹಾಗೂ ಮನೆಯವರು ಪ್ರೋತ್ಸಾಹ ನೀಡಿದರು’ ಎಂದು ಎರಡನೇ ಬಾರಿ ಮಾಡೆಲಿಂಗ್‌ ಕ್ಷೇತ್ರಕ್ಕೆ  ಧುಮುಕಿದ್ದನ್ನು ಬಣ್ಣಿಸುತ್ತಾರೆ. 

ಶ್ವೇತಾ ಒಂದು ಮಗುವಿನ ತಾಯಿ. ಎರಡನೇ ಬಾರಿ ಫ್ಯಾಷನ್‌ ಲೋಕಕ್ಕೆ ಕಾಲಿಟ್ಟಾಗ ಅವರ ಮಗು ಇನ್ನೂ ಸಣ್ಣದು. ಆಗ ಮನೆ, ಮಗು ಹಾಗೂ ಕನಸು ಮೂರನ್ನೂ ಸಂಭಾಳಿಸಬೇಕಿತ್ತು. ‘ಆದರೆ ಇವೆಲ್ಲವೂ ನನಗೇ ಸವಾಲು ಎಂದು ಅನಿಸಲೇ ಇಲ್ಲ. ಮಗು ಸಣ್ಣದಿದ್ದಾಗ ನನಗೆ ಸ್ವಲ್ಪ ಕಷ್ಟ ಆಯಿತು ನಿಜ. ಆದರೆ ನಾನು ಪ್ರಯಾಣ ಮಾಡುವ ಸಂದರ್ಭದಲ್ಲಿ ಪತಿ ಮಗುವಿನ ಜವಾಬ್ದಾರಿ ನೋಡಿಕೊಂಡರು. ಮನೆ ಹಾಗೂ ಕೆಲಸದ ನಡುವೆ ಸಮತೋಲನ ಮಾಡಲೇಬೇಕಿತ್ತು. ಒಂದಕ್ಕೋಸ್ಕರ ಮತ್ತೊಂದು ನಾನು ಯಾವತ್ತೂ ನಿರ್ಲಕ್ಷ್ಯ ಮಾಡಲಿಲ್ಲ’ ಎಂದು ಸಮಾಧಾನ ತಾಳುತ್ತಾರೆ. 

‘ಮಗುವಾದ ನಂತರ ಕೆಲ ಮಹಿಳೆಯರು ದೇಹದ ಆಕಾರ ಹಾಗೂ ದಪ್ಪ ಆಗಿರುವ ಕಾರಣಕ್ಕೆ ಖಿನ್ನತೆಗೆ ಒಳಗಾಗುತ್ತಾರೆ. ಆದರೆ ತಾಯ್ತನ ಎಂಬುದು ಮಧುರ ಅನುಭವ. ಇದು ಮಹಿಳೆಯ ಮತ್ತೊಂದು ವ್ಯಕ್ತಿತ್ವವನ್ನು ತಿಳಿಸುತ್ತದೆ. ಹಾರ್ಮೋನು ಬದಲಾವಣೆ ಆಗುತ್ತಿರುವುದರಿಂದ ಭಾವನೆಗಳು ಬದಲಾಗುತ್ತದೆ. ತೂಕವೂ ಹೆಚ್ಚಾಗುತ್ತದೆ. ಮಗುವಾದ ನಂತರ ನನ್ನ ತೂಕವೂ ಜಾಸ್ತಿಯಾಯಿತು. ಆದರೆ ವ್ಯಾಯಾಮ ಹಾಗೂ ಸರಿಯಾದ ಡಯೆಟ್‌ನಿಂದ ವಾಪಸ್‌ ನನ್ನ ಆಕಾರವನ್ನು ಪಡೆದೆ. ಜೀವನದ ಒಂದು ಹಂತ ಅಷ್ಟೇ. ಜೀವನದ ಅಂತ್ಯವಲ್ಲ’ ಎಂದು ವಿಶ್ವಾಸದಿಂದ ನುಡಿಯುತ್ತಾರೆ. 

‘ಈಗ ಎಲ್ಲಾ ಕ್ಷೇತ್ರಗಳಲ್ಲೂ ವಿವಾಹಿತ ಮಹಿಳೆಯರು ಎತ್ತರದ ಸ್ಥಾನದಲ್ಲಿದ್ದಾರೆ. ಇದರಿಂದ ಫ್ಯಾಷನ್‌ ಲೋಕವೂ ಹೊಸತಲ್ಲ. ಗ್ಲಾಮರ್‌ ಜಗತ್ತಿನಲ್ಲಿ ವಿವಾಹಿತ ಮಹಿಳೆಯರನ್ನು ನೋಡುವ ದೃಷ್ಟಿಕೋನ ನಿಧಾನವಾಗಿ ಬದಲಾಗುತ್ತಿದೆ. ಫ್ಯಾಷನ್‌ ಕ್ಷೇತ್ರವನ್ನು ನೀವು ಹಾಗೂ ನಿಮ್ಮ ಸುತ್ತಮುತ್ತಲಿನವರು ಹೇಗೆ ನೋಡ್ತಾರೆ ಎಂಬುದು ನಿಮಗೆ ಮುಂದುವರಿಯಲು ನೆರವಾಗುತ್ತದೆ. ಆದರೆ ನಮ್ಮ ಕನಸುಗಳನ್ನು ನಾವು ಬಿಟ್ಟುಕೊಡಲೇಬಾರದು. ಜೀವನದ ಯಾವ ಹಂತದಲ್ಲಿದ್ದೀರಿ? ಎಂಬುದು ಮುಖ್ಯವಲ್ಲ, ನಿಮ್ಮ ಗುರಿಯಿಂದ ಕುಟುಂಬ ಹಾಗೂ ಸಮಾಜಕ್ಕೆ ಸಕಾರಾತ್ಮಕ ಬದಲಾವಣೆ ತರುವುದು ಮುಖ್ಯ’ ಎಂಬುದು ಶ್ವೇತಾ ಮನದಾಳದ ಮಾತು.

ಬರಹ ಇಷ್ಟವಾಯಿತೆ?

  • 1

    Happy
  • 1

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !