ಆ ಸಸಿಗಳು ಬೇರು ಬಿಟ್ಟು, ಬೆಳೆಯುವುದನ್ನು ಕಂಡು ದೇವಕಿ ಅಮ್ಮ ಅವರಿಗೆ ಬಹಳ ಖುಷಿಯಾಯಿತು. ಅವರ ಪತಿ ವೃತ್ತಿಯಲ್ಲಿ ಶಿಕ್ಷಕ. ಅವರು ತಮ್ಮ ಪತ್ನಿಯ ಕೆಲಸಕ್ಕೆ ಬೆಂಬಲವಾಗಿ ನಿಂತರು. ಪತ್ನಿಗಾಗಿ ಬೇರೆ ಬೇರೆ ಜಾತಿಯ ಬೀಜಗಳು ಹಾಗೂ ಸಸಿಗಳನ್ನು ತಂದುಕೊಟ್ಟರು. ಅದೇ ರೀತಿ ದೇವಕಿ ಅಮ್ಮ ಅವರ ಸ್ನೇಹಿತರು, ಸಂಬಂಧಿಕರು ಕೂಡ ಸಸಿಗಳನ್ನು ತಂದುಕೊಟ್ಟರು. ಈ ಉದ್ಯಾನವು ಐದು ಎಕರೆ ವಿಸ್ತೀರ್ಣದ ಅರಣ್ಯವಾಗಿ ಬಹುಬೇಗ ಬೆಳೆಯಿತು. ತೇಗ, ಮಹಾಗನಿ, ಬೇರೆ ಬೇರೆ ಬಗೆಯ ಹಣ್ಣುಗಳು ಹಾಗೂ ಹೂವುಗಳ ಮರಗಿಡಗಳು ಅಲ್ಲಿ ಬೆಳೆದಿದ್ದವು.