ಕಂಡಕಂಡಲ್ಲಿ ಕಸ ಹಾಕಿದರೆ ₹500 ದಂಡ: ಜಿ. ಪರಮೇಶ್ವರ

7

ಕಂಡಕಂಡಲ್ಲಿ ಕಸ ಹಾಕಿದರೆ ₹500 ದಂಡ: ಜಿ. ಪರಮೇಶ್ವರ

Published:
Updated:

ಬೆಂಗಳೂರು: ನಗರದಲ್ಲಿರುವ ಕಸದ ಸಮಸ್ಯೆಯನ್ನು ಗಂಭೀರವಾಗಿ ಸ್ವೀಕರಿಸಿದ್ದು, ಕಂಡಕಂಡಲ್ಲಿ ಕಸ ಎಸೆದವರಿಗೆ ವಿಧಿಸುತ್ತಿದ್ದ ₹100 ದಂಡವನ್ನು ₹500 ಹೆಚ್ಚಿಸಿ, ಕಠಿಣ ನಿಯಮಗಳನ್ನು ಪಾಲಿಸಲಾಗುವುದು ಎಂದು ನಗರಾಭಿವೃದ್ಧಿ ಸಚಿವ ಡಾ.ಜಿ.‌ ಪರಮೇಶ್ವರ ಹೇಳಿದರು.

ಮಲ್ಲೇಶ್ವರ ಬಿಬಿಎಂಪಿ ಕಚೇರಿಯಲ್ಲಿ ಕಸ ವಿಲೇವಾರಿ ಸಂಬಂಧ ಕರೆದಿದ್ದ ಅಧಿಕಾರಿಗಳ ಸಭೆ ಬಳಿಕ‌ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಕೆಲವರು ಅನಧಿಕೃತವಾಗಿ ಕಂಡಕಂಡಲ್ಲಿ‌ ಕಸ‌ ಎಸೆಯುತ್ತಿರುವುದರಿಂದ ಕಸದ ಬ್ಲಾಕ್ ಸ್ಪಾಟ್‌ಗಳು ತಲೆ ಎತ್ತುತ್ತಿವೆ. ಹೀಗಾಗಿ ಅಂಥವರಿಗೆ ಕಠಿಣ ದಂಡ ಹಾಕಲು‌ ಈಗಿರುವ ಮೊತ್ತವನ್ನು ₹500ಕ್ಕೆ ಹೆಚ್ಚಿಸುವಂತೆ ಪ್ರಸ್ತಾವನೆಯನ್ನು ಸರಕಾರಕ್ಕೆ ಕಳುಹಿಸಿದ್ದು, ಶೀಘ್ರವೇ ಒಪ್ಪಿಗೆ ನೀಡಲಾಗುವುದು. ಬ್ಲಾಕ್‌ಸ್ಪಾಟ್‌ಗಳಲ್ಲಿ‌ ಕಸ ಹಾಕುವವರ‌ ಮೇಲೆ ನಿಗಾವಹಿಸಿ, ದಂಡ ಹಾಕಲು ಪ್ರತಿ ವಾರ್ಡ್‌ಗಳಿಗೆ ನಿವೃತ್ತ ಯೋಧರೊಬ್ಬರನ್ನು ನೇಮಿಸಲು ಕೂಡ ನಿರ್ಧರಿಸಿದ್ದೇವೆ ಎಂದರು.

ನಗರದಲ್ಲಿ ಕಸದ ಸಮಸ್ಯೆ ತೀವ್ರವಾಗುತ್ತಿದ್ದು, ನ್ಯಾಯಾಲಯ ಈ ಬಗ್ಗೆ ನಿರ್ದೇಶನ ನೀಡಿದೆ. ಆದೇಶವನ್ನು ನಾನು ಸ್ವಾಗತಿಸುತ್ತೇನೆ ಎಂದರು.

 ಕಸ ವಿಲೇವಾರಿಗೆ ಸಂಬಂಧಿಸಿದ ಮಾಹಿತಿ
*ನಗರದಲ್ಲಿ 29 ಲಕ್ಷ ಮನೆಗಳಿವೆ. ಇದರಲ್ಲಿ 5 ಲಕ್ಷ ಕಮರ್ಷಿಯಲ್ ಇದೆ. ರೆಸಿಡೆನ್ಸಿ‌ಯಿಂದ ಒಟ್ಟು 4,200 ಹಾಗೂ ಹೋಟೆಲ್‌, ಕಲ್ಯಾಣ ಮಂಟಪ ಸೇರಿದಂತೆ ಪ್ರತಿದಿನ 5,700 ಟನ್ ಕಸ ಉತ್ಪಾದನೆಯಾಗುತ್ತಿದೆ.

* ಕಸ ನಿರ್ವಹಣೆಗೆ 4,213 ಆಟೊ ಟಿಪ್ಪರ್‌ಗಳು ಮನೆಮನೆಗೆ ತೆರಳಿ ಕಸ ಸಂಗ್ರಹಿಸಲಿದೆ. 566 ಕಾಂಪ್ಯಾಕ್ಟರ್ಸ್ ವಾಹನ, 8 ಮೆಕ್ಯಾನಿಕಲ್ ಸ್ವೀಪರ್ಸ್ ವಾಹನಗಳಿದ್ದು, 18,500 ಪೌರ ಕಾರ್ಮಿಕರಿದ್ದಾರೆ.

* ಕಸ ನಿರ್ವಹಣೆಗೆ ಈಗಿರುವ ಕಾಂಪ್ಯಾಕ್ಟರ್‌ ವಾಹನಗಳಿಗೆ ಜಿಪಿಎಸ್‌ ಅಳವಡಿಸಲಾಗಿದೆ. ಆಟೊ ಟಿಪ್ಪರ್‌ಗಳಿಗೂ ಜಿಪಿಎಸ್‌ ಅಳವಡಿಸುವ ಚಿಂತನೆ ಇದೆ.

* ವಾಹನ ಖರೀದಿಗೆ ಹೊಸದಾಗಿ ಟೆಂಡರ್ ಕರೆಯುವ ಸಂದರ್ಭದಲ್ಲಿ ಟಿಪ್ಪರ್ ಹಾಗೂ ಕಾಂಪ್ಯಾಕ್ಟರ್‌ಗಳನ್ನು ಗುತ್ತುಗೆದಾರರೇ ನಿರ್ವಹಿಸುವ ಅಂಶವನ್ನು ಅಳವಡಿಸಲಾಗುವುದು ಎಂದರು.

* ಪ್ರಸ್ತುತ ಎಂಟು ಮೆಕ್ಯಾನಿಕಲ್ ಸ್ವೀಪರ್ಸ್‌ ಮಷಿನ್‌ಗಳಿದ್ದು, ಹೊಸದಾಗಿ ಈ ವಾಹನ ಖರೀದಿಗೆ ಟೆಂಡರ್ ಕರೆಯಲಾಗುವುದು.

* ಈಗಿರುವ ಬೆಲ್ಲಳ್ಳಿ ಕ್ವಾರಿ ಮೂರು ತಿಂಗಳಲ್ಲಿ ಪೂರ್ಣಗೊಂಡು ಮುಚ್ಚಲಾಗುತ್ತದೆ. ಇದಕ್ಕೆ ಪರ್ಯಾಯವಾಗಿ
ದೊಡ್ಡಬಳ್ಳಾಪುರದಲ್ಲಿರುವ ಟೆರಾಫಾರ್ಮಾನನ್ನು ಆಧುನೀಕರಿಸಿ ಪ್ರಾರಂಭಿಸಲಾಗುವುದು. ಇದರ ಜೊತೆಗೆ
ಉಲ್ಲಳ್ಳಿ, ಮಾರೇನಹಳ್ಳಿ, ಬಾಗಲೂರು ಕ್ವಾರಿಯ ಪರ್ಯಾಯ ವ್ಯವಸ್ಥೆ ಮಾಡಲು ಚರ್ಚಿಸಲಾಗಿದೆ ಎಂದರು.

* ಕಸದಿಂದ ವಿದ್ಯುತ್ ಉತ್ಪಾದಿಸುವ ಯೋಜನೆಯನ್ನು ಬಿಬಿಎಂಪಿಯಿಂದ‌ ಆರು ತಿಂಗಳೊಳಗೆ ಪ್ರಾರಂಭಿಸಲು ಸೂಚಿಸಿದ್ದೇನೆ. ಬಿಡದಿ ಬಳಿ ಬೆಸ್ಕಾಂ ವತಿಯಿಂದ ತೆರೆಯುತ್ತಿರುವ ವಿದ್ಯುತ್ ಉತ್ಪಾದನಾ ಕೇಂದ್ರ ಕೆಲವೇ ದಿನಗಳಲ್ಲಿ ತೆರೆಯಲಿದೆ.

* ಪ್ರತಿ ಬಿಬಿಎಂಪಿ ವಲಯದಲ್ಲಿ ಕಸ ನಿರ್ವಹಣೆಗೆಂದೇ ಸಹಾಯಕ ಇಂಜಿನಿಯರ್‌ಗಳನ್ನು ನೇಮಕ ಮಾಡಲಾಗುವುದು. ಪ್ರತಿ ವಿಧಾನಸಭಾ ಕ್ಷೇತ್ರದಲ್ಲಿ ಹಿರಿಯ ಆರೋಗ್ಯಾಧಿಕಾರಿಗಳನ್ನು ನೇಮಿಸಿ‌ ಇದರ ಜವಾಬ್ದಾರಿ ನೀಡಲಾಗಿದೆ.

* ಗುತ್ತಿಗೆ ಮೇಲೆ ನೇಮಿಸಿರುವ ಈಗಿರುವ ಆರೋಗ್ಯಾಧಿಕಾರಿಗಳು ಹಾಗೂ ದಫೇದಾರ್‌ಗಳನ್ನು ಮುಂದುವರೆಸಲಾಗುತ್ತದೆ.

ನಗರದಲ್ಲಿ ವಾಯು ಮಾಲಿನ್ಯ ನಿಯಂತ್ರಿಸಿ, ಟ್ರಾಫಿಕ್ ಸಮಸ್ಯೆಗೆ ಪರಿಹಾರ ಕಂಡು ಕೊಳ್ಳಬೇಕಿದೆ ಎಂದರು.

ಎರಡು ವರ್ಷ ಹೊಸ ವಾಹನಗಳ‌ ನೋಂದಣಿಯನ್ನು ನಿಲ್ಲಿಸುವುದು, ಎಲೆಕ್ಟ್ರಿಕ್ ಬಸ್‌ಗಳನ್ನು ರಸ್ತೆಗಿಳಿಸುವುದು ಸೇರಿ ಹಲವು ವಿಚಾರಗಳನ್ನು ಚರ್ಚಿಸಲಾಗುವುದು. ನೋಂದಣಿ ನಿಲ್ಲಿಸುವುದು ಕೇವಲ ಯೋಚನೆಯಷ್ಟೆ. ಇದನ್ನೇ ಜಾರಿ ಮಾಡಲು ಹೊರಟಿಲ್ಲ.‌ ದೆಹಲಿಯಲ್ಲಿ ಈಗಾಗಲೇ ಮಾಲಿನ್ಯ ಮಿತಿ ಮೀರಿದ್ದು, ಆ ಪರಿಸ್ಥಿತಿ ಬೆಂಗಳೂರಿಗೆ ಬರುವ ಮುನ್ನ ಎಚ್ಚೆತ್ತು ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಹೇಳಿದರು.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 1

    Frustrated
  • 2

    Angry

Comments:

0 comments

Write the first review for this !