ನವದೆಹಲಿ: ಲೀನಾ ಮಣಿಮೇಕಲೈ ಅವರು ನಿರ್ಮಿಸಿರುವ ‘ಕಾಳಿ’ ಸಿನಿಮಾಗೆ ನೀಡಿರುವ ತಡೆಯಾಜ್ಞೆಯನ್ನು ಪ್ರಶ್ನಿಸಿ ಸಲ್ಲಿಸಿದ್ದ ಅರ್ಜಿ ಸಂಬಂಧ ದೆಹಲಿ ನ್ಯಾಯಾಲಯವು ಲೀನಾ ಅವರಿಗೆ ಮತ್ತೊಮ್ಮೆ ಸಮನ್ಸ್ ಜಾರಿ ಮಾಡಿದೆ.
ಆದೇಶ ಕೊಡುವ ಮೊದಲು ಲೀನಾ ಅವರ ವಾದವನ್ನು ಕೇಳಬೇಕು ಎಂದು ನ್ಯಾಯಾಲಯ ಹೇಳಿದೆ. ಈ ಹಿಂದೆ ನ್ಯಾಯಾಲಯವು ಆಗಸ್ಟ್ 6ರಂದು ಲೀನಾ ಅವರಿಗೆ ಸಮನ್ಸ್ ನೀಡಿತ್ತು.
‘ಲೀನಾ ಹಾಗೂ ಟೂರಿಂಗ್‌ ಟಾಕೀಸ್‌ ಮೀಡಿಯಾ ವರ್ಕ್ಸ್‌ ಪ್ರೈ.ಲಿ ಅವರಿಗೆ ಈ ಹಿಂದೆ ನೀಡಿದ್ದ ಸಮನ್ಸ್ ತಲುಪಿಲ್ಲ. ಆದ್ದರಿಂದ ವಾಟ್ಸ್‌ಆ್ಯಪ್‌, ಇ–ಮೇಲ್‌ ಮೂಲಕ ಹೊಸ ಸಮನ್ಸ್ ನೀಡಬೇಕು’ ಎಂದು ಹೆಚ್ಚುವರಿ ಹಿರಿಯ ಸಿವಿಲ್‌ ನ್ಯಾಯಾಧೀಶ ಅಭಿಷೇಕ್‌ ಕುಮಾರ್‌ ಅವರು ನಿರ್ದೇಶಿಸಿದರು. ಅರ್ಜಿಯ ವಿಚಾರಣೆಯನ್ನು ನವೆಂಬರ್‌ 1ಕ್ಕೆ ಮುಂದೂಡಿತು.
