ನವದೆಹಲಿ: ಹಣ ಅಕ್ರಮ ವರ್ಗಾವಣೆ ಪ್ರಕರಣದ ತನಿಖೆ ನಡೆಸುತ್ತಿರುವ ಜಾರಿ ನಿರ್ದೇಶನಾಲಯದ (ಇ.ಡಿ) ಅಧಿಕಾರಿಗಳು ಐಆರ್‌ಇಒ ರಿಯಲ್‌ ಎಸ್ಟೇಟ್‌ ಸಮೂಹಕ್ಕೆ ಸೇರಿದ ₹1,317 ಕೋಟಿಗೂ ಅಧಿಕ ಮೌಲ್ಯದ ಸ್ವತ್ತುಗಳನ್ನು ಭಾನುವಾರ ಮುಟ್ಟುಗೋಲು ಹಾಕಿದ್ದಾರೆ.
‘ಹಣ ಅಕ್ರಮ ವರ್ಗಾವಣೆ ಪ್ರಕರಣದಲ್ಲಿ ಐಆರ್‌ಇಒ ಸಮೂಹದ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಉಪಾಧ್ಯಕ್ಷ ಲಲಿತ್‌ ಗೋಯಲ್‌ ಹಾಗೂ ಸಮೂಹದ ಇತರರ ಪಾತ್ರ ಇದ್ದು, ಈ ದಿಸೆಯಲ್ಲೂ ತನಿಖೆ ನಡೆಸಲಾಗುತ್ತಿದೆ’ ಎಂದು ಇ.ಡಿ ಹೇಳಿದೆ.
‘ಸಮೂಹಕ್ಕೆ ಸೇರಿದ ಜಮೀನು, ವಾಣಿಜ್ಯ ಉದ್ದೇಶದ ಜಾಗ, ಫ್ಲಾಟ್‌ಗಳು, ಮನೆಗಳೂ ಹಾಗೂ ಬ್ಯಾಂಕ್‌ ಖಾತೆಗಳನ್ನು ಜಪ್ತಿ ಮಾಡಲಾಗಿದೆ. ಈ ಸಮೂಹದ ವಿರುದ್ಧ ಗುರುಗ್ರಾಮ, ಪಂಚಕುಲ, ಲುಧಿಯಾನ ಮತ್ತು ದೆಹಲಿಯ ವಿವಿಧ ಪೊಲೀಸ್‌ ಠಾಣೆಗಳಲ್ಲಿ ಕನಿಷ್ಠ 30 ಎಫ್‌ಐಆರ್‌ಗಳು ದಾಖಲಾಗಿದ್ದವು’ ಎಂದು ಇ.ಡಿ ಪ್ರಕಟಣೆ ತಿಳಿಸಿದೆ.
