ಕೇರಳದ ಬಗ್ಗೆ ಯೋಗಿ ಆದಿತ್ಯನಾಥ್ ನೀಡಿರುವುದು ಅನುಚಿತ ಹೇಳಿಕೆ: ಪಿಣರಾಯಿ ವಿಜಯನ್

ವಿಧಾನಸಭೆಯಲ್ಲಿ ಮಾತನಾಡಿದ ಅವರು, ಮುಖ್ಯಮಂತ್ರಿಯೊಬ್ಬರು ಎರಡು ರಾಜ್ಯಗಳನ್ನು ಹೋಲಿಕೆ ಮಾಡುವುದು ಸೂಕ್ತವಲ್ಲ. ಅನೇಕ ಕ್ಷೇತ್ರಗಳಲ್ಲಿ ಕೇರಳವು ತುಂಬಾ ಮುಂದಿದೆ. ರಾಜ್ಯವು ಅಪ್ರತಿಮ ಬೆಳವಣಿಗೆ ಸಾಧಿಸಿದೆ ಎಂದು ಹೇಳಿದ್ದಾರೆ.

ಚುನಾವಣಾ ಪ್ರಚಾರ ವಿಡಿಯೊ ಸಂದೇಶದಲ್ಲಿ ಮತದಾರರನ್ನು ಉದ್ದೇಶಿಸಿ ಮಾತನಾಡಿದ್ದ ಯೋಗಿ ಆದಿತ್ಯನಾಥ್, ನೀವು ಮತದಾನದ ವೇಳೆ ತಪ್ಪು ಮಾಡಿದ್ದೇ ಆದಲ್ಲಿ ರಾಜ್ಯವು ಶೀಘ್ರದಲ್ಲೇ ಕಾಶ್ಮೀರ, ಬಂಗಾಳ ಹಾಗೂ ಕೇರಳದಂತಾಗಲಿದೆ ಎಂದು ಹೇಳಿದ್ದರು.

ಇದಕ್ಕೆ ಈ ಹಿಂದೆಯೇ ತಿರುಗೇಟು ನೀಡಿರುವ ಪಿಣರಾಯಿ ವಿಜಯನ್, ಉತ್ತರದ ರಾಜ್ಯಗಳು ಕೇರಳದಂತೆ ಅಭಿವೃದ್ಧಿ ಹೊಂದಿದರೆ ಜನರು ಶಾಂತಿಯಿಂದ ಮತ್ತು ಉತ್ತಮ ಜೀವನ ನಡೆಸಬಹುದು. ಉತ್ತರ ಪ್ರದೇಶವು ಕೇರಳದಂತೆ ಆದರೆ ಉತ್ತಮ ಶಿಕ್ಷಣ, ಆರೋಗ್ಯ ಸೇವೆ ದೊರೆಯಲಿದೆ. ಸಾಮಾಜಿಕ ಕಲ್ಯಾಣ, ಜನರ ಜೀವನ ಮಟ್ಟ ಸುಧಾರಣೆಯಾಗಲಿದೆ. ಧರ್ಮ ಮತ್ತು ಜಾತಿಯ ಹೆಸರಿನಲ್ಲಿ ಹತ್ಯೆಗಳು ನಡೆಯದ ಸಾಮರಸ್ಯದ ಸಮಾಜ ನಿರ್ಮಾಣವಾಗಲಿದೆ. ಇಂಥ ಸ್ಥಿತಿ ಉತ್ತರ ಪ್ರದೇಶದ ಜನರಿಗೆ ಬೇಕಾಗಿದೆ. ಇದು ಯೋಗಿ ಆದಿತ್ಯನಾಥ್ ಹೆದರಿಕೆಗೆ ಕಾರಣವಾಗಿದೆ ಎಂದು ಹೇಳಿದ್ದರು.