ಊಟ ಚೆನ್ನಾಗಿದೆ; ಆದ್ರೆ ಹೊಟ್ಟೆ ತುಂಬ್ತಿಲ್ಲ!

7
ಇಂದಿರಾ ಕ್ಯಾಂಟೀನ್‌ಗೆ ಒಂದು ವರ್ಷ: ಮಿತವಾದ ಹಿತಾಹಾರಕ್ಕೆ ಸೈ ಎಂದ ಜನಸಾಮಾನ್ಯ

ಊಟ ಚೆನ್ನಾಗಿದೆ; ಆದ್ರೆ ಹೊಟ್ಟೆ ತುಂಬ್ತಿಲ್ಲ!

Published:
Updated:
Deccan Herald

ಬೆಂಗಳೂರು: ‘ಇಲ್ಲಿ ನೀಡುವ ಊಟ ಚೆನ್ನಾಗಿದೆ. ಪ್ರಮಾಣ ಸ್ವಲ್ಪ ಜಾಸ್ತಿ ಆಗಬೇಕು’, ‘ಮಿತದರದಲ್ಲಿ ಆಹಾರ ಪೂರೈಕೆ ಒಳ್ಳೆಯ ಯೋಜನೆ. ರುಚಿಯಲ್ಲಿ ಸುಧಾರಣೆ ಆಗಬೇಕು’, ‘ಸಾಂಬಾರಿನಲ್ಲಿ ತರಕಾರಿ ಚೂರು ಇಲ್ಲ. ಏಕೆ ಹೀಗೆ?’, ‘ಕಾಫಿ, ಟೀ ಕೊಟ್ಟಿದ್ದರೆ ಉತ್ತಮವಿತ್ತು’, ‘ಬಿಸಿ ಬೇಳೆ ಬಾತ್‌ ರುಚಿ ಸಾಮಾನ್ಯ’, ‘ಚಟ್ನಿ ಚೆನ್ನಾಗಿಲ್ಲ...’ – ಇದು ಸುಧಾಮನಗರದ ಇಂದಿರಾ ಕ್ಯಾಂಟೀನ್‌ನ ಪುಸ್ತಕದಲ್ಲಿ ಗ್ರಾಹಕರು ಬರೆದಿಟ್ಟ ಪ್ರತಿಕ್ರಿಯೆ. ಬಹುಪಾಲು ಗ್ರಾಹಕರು ಬೆಲೆಗೆ ಹೋಲಿಸಿದರೆ ಗುಣಮಟ್ಟ ಪರವಾಗಿಲ್ಲ ಎಂದು ತಾವೇ ರಾಜಿಯಾಗಿದ್ದಾರೆ. ಇನ್ನು ಕೆಲವರು ಬೇಸರ ವ್ಯಕ್ತಪಡಿಸಿದ್ದಾರೆ. ಒಟ್ಟಾರೆ ಜನರಿಗೆ ಈ ಯೋಜನೆ ಬೇಕು. ಆದರೆ, ಸಾಕಷ್ಟು ಸುಧಾರಣೆಗೊಳ್ಳಬೇಕು ಎಂಬ ಭಾವನೆಯನ್ನು ಪುಸ್ತಕದಲ್ಲಿ ದಾಖಲಿಸಿದ್ದಾರೆ. 

ಬಹುತೇಕ ಇಂದಿರಾ ಕ್ಯಾಂಟೀನ್‌ಗಳಿಗೆ ಪ್ರತಿದಿನ ಸುಮಾರು 100ರಿಂದ 150 ಜನ ಬಂದು ಉಪಾಹಾರ ಸೇವಿಸುತ್ತಾರೆ. ಮೆಜೆಸ್ಟಿಕ್‌ ಮತ್ತು ಕೆ.ಆರ್‌.ಮಾರುಕಟ್ಟೆ ಪ್ರದೇಶದಲ್ಲಿ ಮಾತ್ರ ಈ ಪ್ರಮಾಣ ದುಪ್ಪಟ್ಟು ಇದೆ. 

ಜನ ಇಷ್ಟಪಟ್ಟದ್ದೇನು?
₹ 5ಕ್ಕೆ ನೀಡಲಾಗುವ ಉಪಾಹಾರ ಇಡೀ ಯೋಜನೆಯ ಪ್ಲಸ್‌ ಪಾಯಿಂಟ್‌. ₹ 5ರಿಂದ 10ಕ್ಕೆ ಹೊಟ್ಟೆ ತುಂಬುವಷ್ಟು ಪ್ರಮಾಣದ ಆಹಾರ ಕೊಡುತ್ತಿದ್ದಾರೆ. ಸ್ವಚ್ಛತೆ ಇದೆ. ಕಾರ್ಮಿಕರು ಸೌಜನ್ಯದಿಂದ ವರ್ತಿಸುತ್ತಾರೆ ಎಂಬ ಅಭಿಪ್ರಾಯವನ್ನು ಗೋವಿಂದರಾಜ ನಗರ, ಮನುವನ ಸಮೀಪದ ಇಂದಿರಾ ಕ್ಯಾಂಟೀನ್‌ ಗ್ರಾಹಕರು ವ್ಯಕ್ತಪಡಿಸಿದರು. 

ಈ ಪ್ರದೇಶದ ಸುತ್ತಮುತ್ತ ಸಾಕಷ್ಟು ದರ್ಶಿನಿ, ಹೋಟೆಲ್‌ಗಳಿದ್ದರೂ ಇಂದಿರಾ ಕ್ಯಾಂಟೀನ್‌ ಬೇಡಿಕೆ ಕುಸಿದಿಲ್ಲ. ವಿದ್ಯಾರ್ಥಿಗಳು, ಕಾರ್ಮಿಕರು, ಪಿಜಿಗಳಲ್ಲಿರುವ ಒಂಟಿ ಜೀವಿಗಳು ಇವರ ಕಾಯಂ ಗಿರಾಕಿಗಳು. 

ಬೇಡಿಕೆಯೇನು?
‘ಉಪಾಹಾರದ ವೈವಿಧ್ಯತೆಯನ್ನು ಹೆಚ್ಚಿಸಬೇಕು. ಒಂದೇ ಬಗೆಯ ತಿಂಡಿ (ಉದಾ: ಇಡ್ಲಿ ಸಾಂಬಾರ್‌ ಇದ್ದರೆ ಅದೊಂದೇ ಬಗೆ, ಚಿತ್ರಾನ್ನ, ಪುಳಿಯೋಗರೆ ಇದ್ದರೆ ಬೇರೆ ತಿಂಡಿ ಇರುವುದಿಲ್ಲ.) ಇರುವುದರಿಂದ ಬೇರೆ ಆಯ್ಕೆಗೆ ಅವಕಾಶವಿಲ್ಲ. ಕೆಲವೊಮ್ಮೆ ಅವು ರುಚಿಸುವುದೂ ಇಲ್ಲ. ಆದ್ದರಿಂದ ಕನಿಷ್ಠ ಎರಡು ಬಗೆಯ ತಿನಿಸುಗಳನ್ನಾದರೂ ನೀಡಬೇಕು’ ಎಂದು ಕೋರಿದರು ಗ್ರಾಹಕ ಕಿರಣ್‌.

‘₹ 5ಕ್ಕೆ ತಿಂಡಿ ತಿಂದು ಟೀ, ಕಾಫಿ ಕುಡಿಯಲು ಬೇರೆಡೆ ಹೋಗಬೇಕು. ಅದಕ್ಕಾಗಿ ₹ 10 ವ್ಯಯವಾಗುತ್ತದೆ. ಇಲ್ಲಿಯೇ ಟೀ, ಕಾಫಿ ಸಿಗುವಂತಾಗಬೇಕು’ ಎಂದರು ಗ್ರಾಹಕ ರವೀಶ್‌. ಇಡೀ ದಿನ ಕ್ಯಾಂಟೀನ್‌ ತೆರೆದಿಡಬೇಕು ಎಂದೂ ಅವರು ಕೋರಿದರು.

ಮೊದಲು ಕ್ಯಾಂಟೀನ್‌ಗಳಲ್ಲಿ ತಟ್ಟೆ, ಚಮಚ ಕಳ್ಳತನ ನಡೆಯುತ್ತಿತ್ತು. ಈಗ ಚಮಚ ಕೊಡುವುದನ್ನೇ ಸ್ಥಗಿತಗೊಳಿಸಲಾಗಿದೆ. 

ಮೆನು ಏನೇನು?
ಇಡ್ಲಿ- ಚಟ್ನಿ, ಪುಳಿಯೋಗರೆ, ಚಿತ್ರಾನ್ನ, ಖಾರಾಬಾತ್, ಪೊಂಗಲ್, ವಾಂಗೀಬಾತ್ ಮಾಡಲಾಗುತ್ತದೆ. ಊಟಕ್ಕೆ ಎರಡು ಆಯ್ಕೆ ಇರುತ್ತದೆ. ಅನ್ನ, ಸಾಂಬಾರು, ಮೊಸರನ್ನ, ಚಟ್ನಿ ಅಥವಾ ಬಿಸಿಬೇಳೆಬಾತ್, ಟೊಮೆಟೊ ಬಾತ್, ವಾಂಗೀಬಾತ್.

ಸಾಂಬಾರಿನಲ್ಲಿ ಸತ್ತ ಇಲಿ: ಪಾಲಿಕೆ ಸದಸ್ಯೆ ಪತಿ ವಿರುದ್ಧ ದೂರು 
ಗಾಯತ್ರಿ ನಗರ ವಾರ್ಡ್‌ನ ದೇವಯ್ಯ ಪಾರ್ಕ್‌ ಬಳಿಯಿರುವ ಇಂದಿರಾ ಕ್ಯಾಂಟೀನ್‌ನಿಂದ ಪೌರ ಕಾರ್ಮಿಕರಿಗೆ ಸರಬರಾಜು ಮಾಡುತ್ತಿದ್ದ ಊಟದ ಸಾಂಬಾರು ಪಾತ್ರೆಯಲ್ಲಿ ನಾಲ್ಕು ದಿನಗಳ ಹಿಂದೆ ಸತ್ತ ಇಲಿ ಪತ್ತೆಯಾದ ಪ್ರಕರಣದ ತನಿಖೆ ಮುಂದುವರಿದಿದೆ. 

ಆಹಾರ ಪೂರೈಸುವ ಚೆಫ್‌ಟಾಕ್‌ ಸಂಸ್ಥೆಯ ಕ್ಯಾಂಟೀನ್‌ ವ್ಯವಸ್ಥಾಪಕ ಬಾಲಮುರುಗನ್‌ ಅವರು ವಾರ್ಡ್‌ – 76ರ ಸದಸ್ಯೆ ಚಂದ್ರಕಲಾ ಅವರ ಪತಿ ಗಿರೀಶ್‌ ಲಕ್ಕಣ್ಣ ಶಂಕೆ ವ್ಯಕ್ತಪಡಿಸಿ ಮತ್ತು ಇನ್ನೊಬ್ಬ ಅಪರಿಚಿತರ ವಿರುದ್ಧ ಆರೋಪಿಸಿ ಸುಬ್ರಹ್ಮಣ್ಯನಗರ ಠಾಣೆಗೆ ದೂರು ನೀಡಿದ್ದಾರೆ. 

‘ಗಿರೀಶ್‌ ಲಕ್ಕಣ್ಣ ಅವರು ಪದೇ ಪದೇ ಕರೆ ಮಾಡಿ ತಮ್ಮ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕರನ್ನು ಭೇಟಿಯಾಗಲು ಹೇಳು ಎಂದು ಒತ್ತಾಯಿಸುತ್ತಿದ್ದರು. ನಮ್ಮ ಸಂಸ್ಥೆಗೆ ಕೆಟ್ಟ ಹೆಸರು ತರುವ ಉದ್ದೇಶದಿಂದ ಈ ಕೃತ್ಯ ಎಸಗಿರುವ ಬಗ್ಗೆ ಅನುಮಾನವಿದೆ’ ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ಹೇಳಿದ್ದಾರೆ. 

ಈ ಬಗ್ಗೆ ಪ್ರತಿಕ್ರಿಯಿಸಿದ ಗಿರೀಶ್‌, ‘ಈ ಆರೋಪಗಳು ಸತ್ಯಕ್ಕೆ ದೂರವಾದವು. ಪ್ರಕರಣದ ತನಿಖೆಗೆ ಪೊಲೀಸರಿಗೆ ಎಲ್ಲ ಸಹಕಾರ ಕೊಡುತ್ತೇನೆ. ಚೆಫ್‌ಟಾಕ್‌ ಸಂಸ್ಥೆಯವರಿಗೆ ಕರೆ ಮಾಡಿದ್ದು ನಿಜ. ಅದರಲ್ಲಿ ಯಾವುದೇ ದುರುದ್ದೇಶ ಇರಲಿಲ್ಲ’ ಎಂದು ಅವರು ತಿಳಿಸಿದರು.

‘ಪೌರ ಕಾರ್ಮಿಕರಿಗೆ ಇದುವರೆಗೆ ಇಸ್ಕಾನ್‌ನಿಂದ ಆಹಾರ ಸರಬರಾಜು ಮಾಡಲಾಗುತ್ತಿತ್ತು. ಆಹಾರದ ಗುಣಮಟ್ಟ, ರುಚಿಯ ಬಗ್ಗೆ ಅವರ ಮುಖ್ಯಸ್ಥರೊಂದಿಗೂ ಸಾಕಷ್ಟು ಬಾರಿ ಚರ್ಚಿಸಿದ್ದೆ. ಏಕಾಏಕಿ ಅದನ್ನು ಬದಲಾಯಿಸಿ ಇಂದಿರಾ ಕ್ಯಾಂಟೀನ್‌ಗೆ ವಹಿಸಲಾಯಿತು. ಪಾಲಿಕೆ ಸದಸ್ಯರಿಗೆ ತಿಳಿಸದೇ ಏಕೆ ಈ ಬದಲಾವಣೆ ಎಂದು ಪ್ರಶ್ನಿಸಿದ್ದೆ. ಈ ಬಗ್ಗೆ ನಮಗೇನೂ ಗೊತ್ತಿಲ್ಲ. ನಮ್ಮ ವ್ಯವಸ್ಥಾಪಕ ನಿರ್ದೇಶಕರನ್ನು ಕೇಳಿ ಎಂದು ಸಿಬ್ಬಂದಿ ಉತ್ತರಿಸಿದರು. ಸರಿ ಅವರನ್ನೇ ಬರಹೇಳಿ ಎಂದು ಹೇಳಿದ್ದೆ. ಇದರ ಹೊರತಾಗಿ ಬೇರೇನೂ ನಡೆದಿಲ್ಲ’ ಎಂದು ಗಿರೀಶ್‌ ಹೇಳಿದರು. 

ಈ ನಡುವೆ ಇಲಿ‌ಯ ಮೃತದೇಹ ಪತ್ತೆಯಾದ ಸಾಂಬಾರು ಮಾದರಿಯ ಪ್ರಯೋಗಾಲಯ ಪರೀಕ್ಷೆಯ ವರದಿ ಬಂದಿದೆ. ಆಹಾರದಲ್ಲಿ ಯಾವುದೇ ವಿಷಕಾರಿ ಅಂಶ ಪತ್ತೆಯಾಗಿಲ್ಲ ಎಂದು ಮಾದರಿ ಪರೀಕ್ಷಿಸಿದ ಸ್ನೇಹ ಟೆಸ್ಟ್‌ ಹೌಸ್‌ ಸಂಸ್ಥೆ ತಿಳಿಸಿದೆ. 

ಕಾಫಿ, ಚಹಾ; 10 ದಿನಗಳಲ್ಲಿ ನಿರ್ಧಾರ
ಕ್ಯಾಂಟೀನ್‌ಗಳಲ್ಲಿ ಕಾಫಿ, ಚಹಾ ವಿತರಿಸುವ ಬಗ್ಗೆ ಇನ್ನು 10 ದಿನಗಳಲ್ಲಿ ನಿರ್ಧಾರ ಕೈಗೊಳ್ಳಲಾಗುವುದು. ರಾಗಿ ಮುದ್ದೆ ತಯಾರಿಸುವ ಯಂತ್ರದ ಕಾರ್ಯಕ್ಷಮತೆ ಬಗ್ಗೆ ಪರಿಶೀಲನೆ ನಡೆಯುತ್ತಿದೆ. ಅದು ಸಮರ್ಪಕವಾಗಿದ್ದಲ್ಲಿ ಮುದ್ದೆ ವಿತರಣೆಯನ್ನೂ ಆರಂಭಿಸಲಾಗುವುದು. ಒಟ್ಟಿನಲ್ಲಿ ಕ್ಯಾಂಟೀನ್‌ ವ್ಯವಸ್ಥೆ ಅತ್ಯಂತ ಪಾರದರ್ಶಕವಾಗಿ ನಡೆಯುತ್ತಿದೆ. ಜನರ ಪ್ರತಿಕ್ರಿಯೆಯೂ ಚೆನ್ನಾಗಿದೆ. ಗುಣಮಟ್ಟ, ಆಹಾರ ಸರಬರಾಜು ವ್ಯವಸ್ಥೆಯಲ್ಲಿ ಎಲ್ಲಾದರೂ ಲೋಪ ಕಂಡುಬಂದರೆ ಗುತ್ತಿಗೆದಾರರಿಗೆ ದಂಡ ವಿಧಿಸುತ್ತೇವೆ. ಆಹಾರ ತಯಾರಿಕೆಯಿಂದ ಹಿಡಿದು ವಿತರಣೆವರೆಗೆ ಎಲ್ಲ ಹಂತದಲ್ಲೂ ಅಧಿಕಾರಿಗಳ ಕಣ್ಗಾವಲು ಇರುತ್ತದೆ. 
 –ವೆಂಕಟೇಶ್‌ ಜಂಟಿ ಆಯುಕ್ತ ಬಿಬಿಎಂಪಿ (ಹಣಕಾಸು)

 

ಬರಹ ಇಷ್ಟವಾಯಿತೆ?

  • 9

    Happy
  • 3

    Amused
  • 0

    Sad
  • 0

    Frustrated
  • 1

    Angry

Comments:

0 comments

Write the first review for this !