ಟರ್ಕಿಷ್ ಭಾಷೆಯಲ್ಲಿ ‘ಪಮುಕ್ಕಲೆ’ ಅಂದರೆ ‘ಹತ್ತಿಯ ಕೋಟೆ’ ಎಂದರ್ಥ. ಟರ್ಕಿ ದೇಶದ ನೈಋತ್ಯದಲ್ಲಿರುವ ಡೆನಿಜ್ಲಿ ಪ್ರಾಂತ್ಯದಲ್ಲಿ ಪಮುಕ್ಕಲೆ ಇದೆ. ಈ ನೈಸರ್ಗಿಕ ತಾಣ ನೋಡಲು ಅಕ್ಷರಶಃ ಹತ್ತಿಯ ಕೋಟೆಯಂತೆಯೇ ಕಾಣುತ್ತದೆ.
ಇಲ್ಲಿನ ಬಿಸಿನೀರು ಬುಗ್ಗೆಗಳು ನೂರಾರು ವರ್ಷಗಳಿಂದ ಹರಿಯುತ್ತಾ ತಮ್ಮೊಂದಿಗೆ ತಂದ ಸುಣ್ಣಗಲ್ಲುಗಳಿಂದ ಹಲವಾರು ಕಾರ್ಬೊನೇಟ್ ಖನಿಜಗಳ ತೊಟ್ಟಿಗಳನ್ನು ನಿರ್ಮಿಸಿವೆ. ಈ ತೊಟ್ಟಿಗಳಲ್ಲಿ ಸ್ನಾನ ಮಾಡಲು ಕ್ರಿಸ್ತ ಪೂರ್ವ 2ನೇ ಶತಮಾನದಿಂದಲೂ ಜನರು ಬರುತ್ತಿದ್ದಾರೆ. ಈ ಖನಿಜಯುಕ್ತ ನೀರಿನಲ್ಲಿ ಗ್ರೀಕ್, ರೋಮನ್ನರೂ ಮಿಂದಿದ್ದರು.
ಚೀನಾ, ಇರಾನ್, ಅಮೇರಿಕಾ, ಆಫ್ಘಾನಿಸ್ತಾನ ಮುಂತಾದೆಡೆಯೂ ಬಿಸಿನೀರಿನ ಬುಗ್ಗೆಗಳಿವೆ. ಆದರೆ, ಆ ಬುಗ್ಗೆಗಳನ್ನು ಇಷ್ಟೊಂದು ಸುಂದರವಾಗಿ ಪ್ರಕೃತಿ ರೂಪಿಸಿಲ್ಲ. ಟರ್ಕಿಯಲ್ಲಿ ಹವಾಮಾನವೂ ಉತ್ತಮವಾಗಿರುವ ಕಾರಣ ವರ್ಷಪೂರ್ತಿ ಪ್ರವಾಸಿಗರು ಆಗಮಿಸುತ್ತಾರೆ.