ಮೇಯರ್‌ ಚುನಾವಣೆಗೆ ಮುಹೂರ್ತ: 28ರಂದು ಮತದಾನ

6

ಮೇಯರ್‌ ಚುನಾವಣೆಗೆ ಮುಹೂರ್ತ: 28ರಂದು ಮತದಾನ

Published:
Updated:

ಬೆಂಗಳೂರು: ಮೇಯರ್‌ ಸಂಪತ್‌ ರಾಜ್‌ ಅವರ ಅಧಿಕಾರದ ಅವಧಿ ಈ ತಿಂಗಳಲ್ಲಿ ಕೊನೆಗೊಳ್ಳಲಿದೆ. ಮೇಯರ್‌ ಹಾಗೂ ಉಪಮೇಯರ್‌ ಆಯ್ಕೆಗೆ ಇದೇ 28ರಂದು ಚುನಾವಣೆ ನಡೆಯಲಿದೆ.

ಮೇಯರ್‌ ಚುನಾವಣೆಯಲ್ಲಿ 198 ಪಾಲಿಕೆ ಸದಸ್ಯರ ಜೊತೆಗೆ, ಬೆಂಗಳೂರಿನಲ್ಲಿ ಮತದಾರರ ಪಟ್ಟಿಯಲ್ಲಿ ಹೆಸರು ಹೊಂದಿರುವ ಲೋಕಸಭಾ ಸದಸ್ಯರು, ರಾಜ್ಯಸಭಾ ಸದಸ್ಯರು, ವಿಧಾನಸಭಾ ಸದಸ್ಯರು, ವಿಧಾನ ಪರಿಷತ್‌ ಸದಸ್ಯರೂ ಮತದಾನದ ಹಕ್ಕನ್ನು ಹೊಂದಿರುತ್ತಾರೆ. ಈ ಬಾರಿ ಪಾಲಿಕೆ ಸದಸ್ಯರಲ್ಲದ 61 ಮಂದಿಯ ಹೆಸರು ಮತದಾರರ ಪಟ್ಟಿಯಲ್ಲಿದೆ. 

2016ರ ಮೇಯರ್‌ ಚುನಾವಣೆ ಸಂದರ್ಭದಲ್ಲಿ ಬೆಂಗಳೂರು ನಗರದ ನಿವಾಸಿಗಳಲ್ಲದ ಕೆಲವು ವಿಧಾನ ಪರಿಷತ್‌ ಸದಸ್ಯರು ಚುನಾವಣಾ ಆಯೋಗಕ್ಕೆ ತಪ್ಪು ಮಾಹಿತಿ ನೀಡಿ ಮತದಾನದ ಹಕ್ಕು ಪಡೆದಿದ್ದರು. ಈ ಬಗ್ಗೆ ಚುನಾವಣಾ ಆಯೋಗಕ್ಕೆ ಪಾಲಿಕೆ ವಿರೋಧ ಪಕ್ಷದ ನಾಯಕ ಪದ್ಮನಾಭ ರೆಡ್ಡಿ ದೂರು ಸಲ್ಲಿಸಿದ್ದರು. ಈ ಸಂಬಂಧ ಪಾಲಿಕೆ ಆಯುಕ್ತ ಮಂಜುನಾಥ ಪ್ರಸಾದ್‌ 2017ರ ಆಗಸ್ಟ್‌ನಲ್ಲಿ ಆಯೋಗಕ್ಕೆ ವರದಿ ಸಲ್ಲಿಸಿದ್ದರು.

ಆರ್‌.ಬಿ.ತಿಮ್ಮಾಪುರ, ಅಲ್ಲಂ ವೀರಭದ್ರಪ್ಪ, ಎನ್‌.ಅಪ್ಪಾಜಿ ಗೌಡ, ರಘು ಆಚಾರ್‌, ಎನ್‌.ಎಸ್‌.ಬೋಸರಾಜು, ಸಿ.ಆರ್‌.ಮನೋಹರ್‌, ಎಸ್‌.ರವಿ, ಹಾಗೂ ಎಂ.ಡಿ.ಲಕ್ಷ್ಮೀನಾರಾಯಣ ಅವರು ಬೆಂಗಳೂರಿನ ನಿವಾಸಿಗಳು ಎಂದು ಮಾಹಿತಿ ನೀಡಿದ್ದರು. ಆದರೆ ಇವರೆಲ್ಲರ ಮೂಲ ವಿಳಾಸ ಬೇರೆ. ಉದಾಹರಣೆಗೆ, ತಿಮ್ಮಾಪೂರ್‌ ಅವರ ಮೂಲವಿಳಾಸ ಬಾಗಲಕೋಟೆ. ಆದರೆ, ಬೆಂಗಳೂರು ನಗರದ ಮತದಾರರ ಪಟ್ಟಿಯಲ್ಲೂ ಅವರ ಹೆಸರು ಇತ್ತು. ವೀರಭದ್ರಪ್ಪ ಅವರು ಬಳ್ಳಾರಿಯವರು.

ಅಚ್ಚರಿಯೆಂದರೆ ಎಂಟು ವಿಧಾನ ಪರಿಷತ್‌ ಸದಸ್ಯರ ಪೈಕಿ ಕೆಲವರು ವಿಧಾನಮಂಡಲ ಅಧಿವೇಶನಕ್ಕೆ ಹಾಗೂ ಸಭೆಗಳಿಗೆ ಹಾಜರಾಗಲು ಅವರ ಊರಿನಿಂದ ಪ್ರಯಾಣಿಸಿದ ಬಗ್ಗೆ ಪ್ರಯಾಣ ವೆಚ್ಚವನ್ನೂ ಸರ್ಕಾರದಿಂದ ಪಡೆದುಕೊಂಡಿದ್ದರು. ಇದರ ವೆಚ್ಚವೇ ₹37 ಲಕ್ಷಗಳಷ್ಟಾಗಿತ್ತು. 

ನಗರದ ನಿವಾಸಿಗಳಲ್ಲದವರಿಗೂ ಮತದಾನಕ್ಕೆ ಅವಕಾಶ ಕಲ್ಪಿಸಲಾಗಿದೆ ಎಂದು ಆರೋಪಿಸಿ ಬಿಜೆಪಿ ಸದಸ್ಯರು 2017ರಲ್ಲಿ ಮೇಯರ್‌ ಚುನಾವಣೆಯ ಮತದಾನ ಪ್ರಕ್ರಿಯೆಯನ್ನು ಬಹಿಷ್ಕರಿಸಿದ್ದರು.

ರಘು ಆಚಾರ್‌ ಹಾಗೂ ಸಿ.ಆರ್‌.ಮನೋಹರ್‌ ಅವರ ಹೆಸರು ಈ ಬಾರಿಯೂ ಮತದಾರರ ಪಟ್ಟಿಯಲ್ಲಿದೆ. ಉಳಿದ ಐವರ ಹೆಸರುಗಳು ಪಟ್ಟಿಯಿಂದ ತೆಗೆಯಲಾಗಿದೆ.

‘ಚುನಾವಣೆಯಲ್ಲಿ ಗೆಲ್ಲುವ ಏಕೈಕ ಉದ್ದೇಶದಿಂದ ತಪ್ಪು ಮಾಹಿತಿ ನೀಡಿದವರ ವಿರುದ್ಧ ಕಾನೂನು ಸಮರ ನಡೆಸುತ್ತೇನೆ. ನಮ್ಮ ಪಕ್ಷದ ಮುಖಂಡರು ಒಪ್ಪಿಗೆ ನೀಡಿದರೆ ನಾನು ಈ ಬಗ್ಗೆ ನ್ಯಾಯಾಲಯದಲ್ಲಿ ದಾವೆ ಹೂಡುತ್ತೇನೆ’ ಎಂದು ಪದ್ಮನಾಭ ರೆಡ್ಡಿ ತಿಳಿಸಿದರು.

‘ಜೈರಾಮ್‌ ರಮೇಶ್‌  ಅವರ ಕ್ಷೇತ್ರ ಚಿಕ್ಕಮಗಳೂರು. ವಿ.ಎಸ್‌.ಉಗ್ರಪ್ಪ ಅವರದು ತುಮಕೂರು ಹಾಗೂ ಸಿ.ಆರ್‌.ಮನೋಹರ್‌ ಅವರದು ಕೋಲಾರ. ಆದರೂ, ಬೆಂಗಳೂರಿನಲ್ಲಿ ಮತ ಚಲಾಯಿಸಲು ಅವರಿಗೆ ಆತ್ಮಸಾಕ್ಷಿ ಹೇಗೆ ಒಪ್ಪುತ್ತದೆ’ ಎಂದು ರೆಡ್ಡಿ ಪ್ರಶ್ನಿಸಿದರು.

ಅಭ್ಯರ್ಥಿ ಆಯ್ಕೆ ಕಗ್ಗಂಟು
ಮೇಯರ್‌ ಸ್ಥಾನವು ಈ ಬಾರಿ ಸಾಮಾನ್ಯ ವರ್ಗದ ಮಹಿಳೆಗೆ ಮೀಸಲು. ಕಾಂಗ್ರೆಸ್‌ ಮೂವರು ಪಾಲಿಕೆ ಸದಸ್ಯರು ಈ ಹುದ್ದೆಯ ಪ್ರಬಲ ಆಕಾಂಕ್ಷಿಗಳು. ಶಾಂತಿನಗರ ವಾರ್ಡ್‌ ಸದಸ್ಯೆ ಪಿ.ಸೌಮ್ಯಾ, ಜಯನಗರ ವಾರ್ಡ್‌ನ (153) ಸದಸ್ಯೆ ಗಂಗಾಂಬಿಕೆ ಹಾಗೂ  ಲಿಂಗರಾಜಪುರ ವಾರ್ಡ್‌ನ ಸದಸ್ಯೆ ಲಾವಣ್ಯ ಗಣೇಶ್‌ ರೆಡ್ಡಿ  ಈಗಾಗಲೇ ವರಿಷ್ಠರ ಮೇಲೆ ಒತ್ತಡ ಹೇರುವ ತಂತ್ರ ಅನುಸರಿಸುತ್ತಿದ್ದಾರೆ.  ‘ಮೇಯರ್ ಆಯ್ಕೆ ವಿಚಾರದಲ್ಲಿ ಪಕ್ಷದ ಎಲ್ಲ ಕಾರ್ಪೊರೇಟರ್‌ಗಳ ಜೊತೆ ಚರ್ಚಿಸಿ ನಿರ್ಧಾರ ಕೈಗೊಳ್ಳುತ್ತೇವೆ’ ಎಂದು ಬೆಂಗಳೂರು ಅಭಿವೃದ್ಧಿ ಸಚಿವ ಜಿ.ಪರಮೇಶ್ವರ ಹೇಳಿದರು. ಮೇಯರ್‌ ಪಟ್ಟವನ್ನು ತಮಗೆ ಬಿಟ್ಟುಕೊಡಬೇಕು ಎಂದು ಜೆಡಿಎಸ್‌ ಕೂಡಾ ಪಟ್ಟು ಹಿಡಿದಿದೆ. ಪಾಲಿಕೆಯಲ್ಲಿ ಜೆಡಿಎಸ್‌ ನಾಯಕಿ ನೇತ್ರಾ ನಾರಾಯಣ್‌ ಹಾಗೂ ಸದಸ್ಯೆ ಪಿ. ಹೇಮಲತಾ ಅವರೂ ಈ ಹುದ್ದೆ ಮೇಲೆ ಕಣ್ಣಿಟ್ಟಿದ್ದಾರೆ.

ಯಾರಿಗೆಲ್ಲ ಇದೆ ಮತದಾನದ ಹಕ್ಕು
5 – ಲೋಕಸಭಾ ಸದಸ್ಯರು
9 –ರಾಜ್ಯಸಭಾ ಸದಸ್ಯರು
19 –ವಿಧಾನ ಪರಿಷತ್‌ ಸದಸ್ಯರು
28 – ವಿಧಾನಸಭಾ ಸದಸ್ಯರು
198 –ಪಾಲಿಕೆ ಸದಸ್ಯರಿಗೆ

ಬರಹ ಇಷ್ಟವಾಯಿತೆ?

  • 2

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !