ನವದೆಹಲಿ: ಲಂಡನ್‌ನಲ್ಲಿ ಜೂನ್ 18ರಂದು ನಡೆಯಲಿರುವ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿಯ ಫೈನಲ್‌ ಪಂದ್ಯದಲ್ಲಿ ಭಾರತ– ಪಾಕಿಸ್ತಾನ ತಂಡಗಳ ಮುಖಾಮುಖಿಯಾಗಲಿವೆ.
ಈ ಪಂದ್ಯಕ್ಕೆ ₹ 2 ಸಾವಿರ ಕೋಟಿ ಬೆಟ್ಟಿಂಗ್‌ ನಡೆಯಲಿದೆ ಎಂದು ‘ಅಲ್‌ ಇಂಡಿಯನ್‌ ಗೇಮಿಂಗ್‌ ಫೆಡರೇಷನ್‌(ಎಐಜಿಎಫ್‌)’ ವಿಶ್ಲೇಷಿಸಿದೆ.
ಬೆಟ್ಟಿಂಗ್‌ ಬುಕ್ಕಿಗಳಿಗೆ ಭಾರತ ಹೆಚ್ಚು ಪ್ರಖ್ಯಾತಿ ಪಡೆದ ತಂಡವಾಗಿದೆ. ಈ ಪಂದ್ಯದಲ್ಲಿ ಭಾರತ ಗೆಲುವು ಸಾಧಿಸಿದರೆ ₹100 ಬೆಟ್ಟಿಂಗ್‌ ಕಟ್ಟಿದ ವ್ಯಕ್ತಿಗೆ ₹147 ಸಿಗಲಿದೆ. ಇದೇ ವೇಳೆ ಪಾಕ್‌ ಗೆದ್ದರೆ ₹ 300 ಗಳಿಸಲಿದ್ದಾರೆ ಎಂದು ವಿಶ್ಲೇಷಕರು ವಿವರಿಸಿದ್ದಾರೆ.
'ಒಂದು ವರ್ಷದಲ್ಲಿ ಭಾರತದ ಕ್ರಿಕೆಟ್‌ ತಂಡ ಆಡುವ ಎಲ್ಲ ಪಂದ್ಯಗಳ ಮೇಲೆ ಒಟ್ಟು ₹ 2 ಲಕ್ಷ ಕೋಟಿ ಬೆಟ್ಟಿಂಗ್‌ ಕಟ್ಟಲಾಗುತ್ತದೆ' ಎಂದು ಎಐಜಿಎಫ್‌ನ ಸಿಇಒ ರೋಲ್ಯಾಂಡ್ ಲ್ಯಾಂಡರ್ಸ್ ತಿಳಿಸಿದ್ದಾರೆ.
'ಚಾಂಪಿಯನ್ಸ್‌ ಟ್ರೋಫಿ ಕ್ರಿಕೆಟ್‌ ಟೂರ್ನಿಯಲ್ಲಿ ಇದೇ ಮೊದಲ ಬಾರಿಗೆ ಭಾರತ– ಪಾಕಿಸ್ತಾನ ತಂಡಗಳು ಫೈನಲ್‌ ಪ್ರವೇಶಿಸಿದ್ದು, ಈ ಬಾರಿ ಹೆಚ್ಚು ಬೆಟ್ಟಿಂಗ್‌ ನಡೆಯಲಿದೆ' ಎಂದು ವಿಶ್ಲೇಷಿಸಿದ್ದಾರೆ.
