1955ರ ಅಚ್ಚ ಕನ್ನಡದಲ್ಲಿ ಶಾಲಾ ಪ್ರಮಾಣ ಪತ್ರ ಲಭ್ಯ
ಬೆಳಗಾವಿ: ಬೆಳಗಾವಿಯಲ್ಲಿ ಕನ್ನಡ ಭಾಷೆಯ ಬಳಕೆ ಹಲವಾರು ವರ್ಷಗಳಿಂದ ಇದೆ ಎನ್ನುವುದಕ್ಕೆ ದಾಖಲೆಗಳನ್ನು ಸಂಗ್ರಹಿಸುತ್ತಿರುವ ರಾಜ್ಯ ವಕೀಲರ ಸಾಹಿತ್ಯ ಪರಿಷತ್ತಿಗೆ, 1955ರ ಜೂನ್‌ 3 ರಲ್ಲಿ ಕನ್ನಡ ಭಾಷೆಯಲ್ಲಿ ನೀಡಲಾಗಿದ್ದ ಶಾಲೆ ಬಿಟ್ಟ ಪ್ರಮಾಣ ಪತ್ರವು (ಎಲ್‌.ಸಿ) ದೊರೆತಿದೆ.
ಬೆಳಗಾವಿಯವರೇ ಆದ ಚಂದ್ರಪ್ಪ ಶಂಕರೆಪ್ಪ ಕುಪಾಟಿ ಅವರು 7ನೇ ತರಗತಿಯನ್ನು ಇಲ್ಲಿನ ಖಾಸಬಾಗದಲ್ಲಿರುವ 3ನೇ ಸಂಖ್ಯೆಯ ಶಾಲೆಯಲ್ಲಿ ವ್ಯಾಸಂಗ ಮಾಡಿದ್ದರು. ತೇರ್ಗಡೆಯಾದ ನಂತರ 1955ರ ಮೇ 31ರಂದು 3 ಸಂಖ್ಯೆಯ ಶಾಲೆಯನ್ನು ಬಿಟ್ಟಿದ್ದರು.
ಇದಕ್ಕೆ ಸಂಬಂಧಿಸಿದಂತೆ ಜೂನ್‌ 3 ರಂದು ಶಾಲೆ ಬಿಟ್ಟ ಪ್ರಮಾಣ ಪತ್ರವನ್ನು ಕನ್ನಡದಲ್ಲಿಯೇ ಶಾಲೆಯವರು ನೀಡಿದ್ದು ವಿಶೇಷವಾಗಿದೆ. ಚಂದ್ರಪ್ಪ ಅವರ ಅಣ್ಣನ ಮಗನಾದ ಶ್ರೀಶೈಲ ಬಸವಣ್ಣೆಪ್ಪ ಕುಪಾಟಿ ಅವರು ಪರಿಷತ್ತಿಗೆ ಈ ದಾಖಲೆಯನ್ನು ತಲುಪಿಸಿದ್ದಾರೆ.
ಬೆಳಗಾವಿ ಗಡಿ ವಿವಾದದ ಪ್ರಕರಣವನ್ನು ಇತ್ಯರ್ಥಪಡಿಸುವಂತೆ ಮಹಾರಾಷ್ಟ್ರ ಸರ್ಕಾರ ಸುಪ್ರೀಂ ಕೋರ್ಟ್‌ಗೆ ಮೊರೆ ಹೋಗಿರುವುದರಿಂದ ಕನ್ನಡ ಭಾಷೆಯಲ್ಲಿರುವ ದಾಖಲೆಗಳನ್ನು ಸಂಗ್ರಹಿಸಲು ವಕೀಲರ ಪರಿಷತ್‌ ಮುಂದಾಗಿರುವುದನ್ನು ಸ್ಮರಿಸಬಹುದು.
ಬ್ರಿಟಿಷರ ಆಡಳಿತದಲ್ಲಿಯೇ ಕನ್ನಡ ಶಾಲೆ: ದೇಶ ಸ್ವಾತಂತ್ರ್ಯಗೊಳ್ಳುವ ಪೂರ್ವದಲ್ಲಿ 1838ರ ವೇಳೆಯಲ್ಲಿ ಬ್ರಿಟಿಷರು ಖಾಸಬಾಗದಲ್ಲಿ ಕನ್ನಡ ಶಾಲೆ ನಂಬರ್‌ 1 ಆರಂಭಿಸಿದ್ದರು. ಇದಾದ ನಂತರ 1882ರಲ್ಲಿ ಕನ್ನಡ ಶಾಲೆ ನಂಬರ್‌ 3 ತೆರೆದಿದ್ದರು. ಇವೆಲ್ಲ ಅಂಶಗಳನ್ನು ಗಮನಿಸಿದರೆ 180 ವರ್ಷಗಳ ಹಿಂದೆಯೇ ಈ ಭಾಗದಲ್ಲಿ ಕನ್ನಡ ಭಾಷೆ ಆಡಳಿತ ಭಾಷೆಯಾಗಿತ್ತು ಎಂದು ಶ್ರೀಶೈಲ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ರಾಜ್ಯಗಳ ಪುನರ್‌ವಿಂಗಡಣೆಗೂ ಮೊದಲೇ ಚಂದ್ರಪ್ಪ ಅವರಿಗೆ ನೀಡಲಾದ ಶಾಲೆ ಬಿಟ್ಟ ಪ್ರಮಾಣ ಪತ್ರದಲ್ಲಿ ಬಳಸಿರುವ ಭಾಷೆಯು ಅಚ್ಚ ಕನ್ನಡ ಭಾಷೆಯಾಗಿದೆ. ಕೈಬರಹ ಹಾಗೂ ಅಂಕಿ– ಅಂಶಗಳು ಸ್ಪಷ್ಟವಾಗಿವೆ.
ಅಪರೂಪದ ಈ ಕನ್ನಡ ಪ್ರಮಾಣ ಪತ್ರದ ಮೇಲೆ ಆಗಿನ ತರಗತಿಯ ಶಿಕ್ಷಕರು ಹಾಗೂ ಮುಖ್ಯೋಪಾಧ್ಯಾಯರು ತಮ್ಮ ರುಜುಗಳನ್ನು ಕನ್ನಡದಲ್ಲಿಯೇ ಮಾಡಿರುವುದು ವಿಶೇಷ ಸಂಗತಿಯಾಗಿದೆ.
ಗಡಿ ವಿವಾದಕ್ಕೆ ಸಂಬಂಧಿಸಿದಂತೆ ದಾಖಲೆಗಳನ್ನು ಕ್ರೋಡೀಕರಿಸುತ್ತಿರುವ ಗಡಿ ರಕ್ಷಣಾ ಆಯೋಗಕ್ಕೆ ಈ ದಾಖಲೆಯನ್ನು ನೀಡುವಂತೆ ಶ್ರೀಶೈಲ ಅವರು ರಾಜ್ಯ ವಕೀಲರ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕದ ಅಧ್ಯಕ್ಷ ರವೀಂದ್ರ ತೋಟಿಗೇರ, ಉಪಾಧ್ಯಕ್ಷ ಸುಧೀರ ನಿರ್ವಾಣಿ, ಕುಮಾರ ಸರವದೆ, ಪ್ರಧಾನ ಕಾರ್ಯದರ್ಶಿಗಳಾದ ಶಿವಾನಂದ ಈರಣಗೌಡ್ರ ಹಾಗೂ ಜಂಟಿ ಕಾರ್ಯದರ್ಶಿಗಳಾದ ಪ್ರಕಾಶ ಚನ್ನಾಳ ಅವರಿಗೆ ಹಸ್ತಾಂತರಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.