ಚೆನ್ನೈ: ಪ್ರಬಲವಾದ ಸೇನಾ ಬಾಂಧವ್ಯ ಸಾಧಿಸುವ ನಿಟ್ಟಿನಲ್ಲಿ ಅಮೆರಿಕ, ಜಪಾನ್ ಮತ್ತು ಭಾರತ ಸೋಮವಾರ ‘ತ್ರಿಕೋನ ಮಲಬಾರ್ ನೌಕಾ ಸಮರಾಭ್ಯಾಸ– 2017’ ಆರಂಭಿಸಿವೆ.
ಬಂಗಾಳ ಕೊಲ್ಲಿಯಲ್ಲಿ ನಡೆಯುವ ಈ ತ್ರಿಪಕ್ಷೀಯ ಸಮರಾಭ್ಯಾಸದಲ್ಲಿ ಅಮೆರಿಕದ ಏಳು, ಜಪಾನ್ನ ಎರಡು ನೌಕೆಗಳ ಜೊತೆಗೆ ಭಾರತದ ‘ಐಎನ್ಎಸ್ ಜಲಾಶ್ವ’ ಮತ್ತು ‘ಐಎನ್ಎಸ್ ವಿಕ್ರಮಾದಿತ್ಯ’ ಪಾಲ್ಗೊಳ್ಳಲಿವೆ ಎಂದು ಪತ್ರಿಕಾ ಪ್ರಕಟಣೆ ತಿಳಿಸಿದೆ.
ಸಮುದ್ರ ಮತ್ತು ಸಮುದ್ರ ದಂಡೆಯಲ್ಲಿ ನಡೆಯುವ ಈ ಸಮರಾಭ್ಯಾಸದಲ್ಲಿ ವೈದ್ಯಕೀಯ ಕಾರ್ಯಾಚರಣೆ, ವಿಪತ್ತು ನಿಯಂತ್ರಣ, ಸ್ಫೋಟಕ ಸಾಧನ ವಿಲೇವಾರಿ, ಹೆಲಿಕಾಪ್ಟರ್ ಕಾರ್ಯಾಚರಣೆ ಮತ್ತು ಜಲಾಂತರ್ಗಾಮಿ ಯುದ್ಧ ನಿಗ್ರಹ ಕಾರ್ಯಾಚರಣೆಗಳ ಅಭ್ಯಾಸ ಮಾಡಲಾಗುತ್ತದೆ.
‘ಇಂಡೊ– ಏಷ್ಯಾ ಪೆಸಿಫಿಕ್ ಕಾರ್ಯಾಚರಣೆಯ ಸದಸ್ಯರಾದ ಈ ಮೂರು ರಾಷ್ಟ್ರಗಳ ನೌಕಾ ಪಡೆಗಳ ನಡುವೆ ಪಾಲುದಾರಿಕೆಯಲ್ಲಿ ಕೆಲಸ ಮಾಡುವ ಹೊಂದಾಣಿಕೆ ಇದೆ. ವೈಯಕ್ತಿಕ ಬಾಂಧವ್ಯ ಬೆಳೆಸುವುದು ಈ ಸಮರಾಭ್ಯಾಸದ ಆಶಯ’ ಎಂದು ಪ್ರಕಟಣೆಯಲ್ಲಿ ಹೇಳಲಾಗಿದೆ.
ಸಿಕ್ಕಿಂ ಪ್ರದೇಶದಲ್ಲಿ ಭಾರತ ಮತ್ತು ಚೀನಾ ನಡುವೆ ಬಿಕ್ಕಟ್ಟು ಉದ್ಭವಿಸಿರುವ ಮತ್ತು ದಕ್ಷಿಣ ಚೀನಾ ಸಮುದ್ರ ಪ್ರದೇಶದಲ್ಲಿ ತನ್ನ ನೌಕಾ ಬಲವನ್ನು ಹೆಚ್ಚಿಸಿಕೊಳ್ಳಲು ಚೀನಾ ಯತ್ನಿಸುತ್ತಿರುವ ನಡುವೆಯೇ ಈ ತ್ರಿಪಕ್ಷೀಯ ಸಮರಾಭ್ಯಾಸ ನಡೆಯುತ್ತಿದೆ.