ಮುಂಬೈ : ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕವು ಮಂಗಳವಾರದ ವಹಿವಾಟಿನಲ್ಲಿ 78 ಅಂಶಗಳ ಚೇತರಿಕೆ ಕಂಡಿದೆ.
ದೇಶಿ ಸಾಂಸ್ಥಿಕ ಹಣಕಾಸು ಸಂಸ್ಥೆಗಳ ನಿರಂತರ ಖರೀದಿ ಕಾರಣಕ್ಕೆ ಸೂಚ್ಯಂಕವು ಎರಡು ತಿಂಗಳ ಗರಿಷ್ಠ ಮಟ್ಟಕ್ಕೆ 31, 924 ಅಂಶಗಳಿಗೆ ತಲುಪಿದೆ. ಈ ಹಿಂದಿನ ಎರಡು ವಹಿವಾಟು ದಿನಗಳಲ್ಲಿ ಸೂಚ್ಯಂಕವು 254 ಅಂಶಗಳ ಏರಿಕೆ ದಾಖಲಿಸಿದೆ.
ರಾಷ್ಟ್ರೀಯ ಷೇರುಪೇಟೆ ‘ನಿಫ್ಟಿ’ ಕೂಡ 28 ಅಂಶಗಳ ಏರಿಕೆ ದಾಖಲಿಸಿ 10 ಸಾವಿರ ಅಂಶಗಳ ಗಡಿ (10,034) ದಾಟಿದೆ. ಸೆಪ್ಟೆಂಬರ್ 21ರ ನಂತರ ಮೊದಲ ಬಾರಿಗೆ ‘ನಿಫ್ಟಿ’ ಈ ಮಟ್ಟಕ್ಕೆ ತಲುಪಿದೆ. ದ್ವಿತೀಯ ತ್ರೈಮಾಸಿಕದ ಹಣಕಾಸು ಸಾಧನೆಯ ಫಲಿತಾಂಶಗಳು ಸದ್ಯದಲ್ಲೇ ಪ್ರಕಟಗೊಳ್ಳಲಿವೆ. ಷೇರುಗಳ ಖರೀದಿಗೆ ಚಿಲ್ಲರೆ ಹೂಡಿಕೆದಾರರು ಮುಂದಾಗಲಿದ್ದಾರೆ. ಏಷ್ಯಾದ ಷೇರು ಮಾರುಕಟ್ಟೆಗಳಲ್ಲಿ ಸ್ಥಿರ ವಹಿವಾಟು ನಡೆಯುತ್ತಿರುವುದರಿಂದ ಷೇರುಪೇಟೆಗಳು ಸತತ ಮೂರನೇ ವಹಿವಾಟಿನ ದಿನವೂ ಏರಿಕೆ ದಾಖಲಿಸಿವೆ.
ಐ.ಟಿ, ವಿದ್ಯುತ್, ಆರೋಗ್ಯ ರಕ್ಷಣೆ, ಭಾರಿ ಯಂತ್ರೋಪಕರಣ, ತೈಲ ಮತ್ತು ನೈಸರ್ಗಿಕ ಅನಿಲ, ಬ್ಯಾಂಕ್ ಮತ್ತು ವಾಹನ ಉದ್ದಿಮೆ ಷೇರುಗಳು ಲಾಭ ಬಾಚಿಕೊಂಡವು.