ಸೈನಿಕರ ಜತೆ ಮೋದಿ ದೀಪಾವಳಿ

ಮೋದಿ ಅವರು ಗುರುವಾರ ಬೆಳಗ್ಗೆ ಗುರೆಜ್‌ಗೆ ಬಂದರು. ಈ ಭೇಟಿಯನ್ನು ಮೊದಲೇ ಘೋಷಿಸಲಾಗಿರಲಿಲ್ಲ. ಗುರೆಜ್‌ ಕಣಿವೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಗಡಿ ಭದ್ರತಾ ಪಡೆ (ಬಿಎಸ್‌ಎಫ್‌) ಮತ್ತು ಸೇನೆಯ ಯೋಧರ ಜತೆ ಅವರು ಎರಡು ತಾಸು ಕಳೆದರು. ಗುರೆಜ್‌ ಕಣಿವೆಯು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದ ಸಮೀಪದಲ್ಲಿಯೇ ಇದೆ. ಭಾರತದೊಳಕ್ಕೆ ನುಸುಳುವ ಉಗ್ರರ ಜತೆ ಇಲ್ಲಿ ಕಳೆದ 27 ವರ್ಷಗಳಿಂದ ನಿರಂತರ ಗುಂಡಿನ ಚಕಮಕಿ ನಡೆಯುತ್ತಲೇ ಇದೆ.

ಯೋಧರಿಗೆ ಸಿಹಿ ಹಂಚಿ, ಪ್ರಧಾನಿ ಶುಭಾಶಯ ಹೇಳಿದರು.  ‘ಎಲ್ಲರ ಹಾಗೆ ನಾನು ಕೂಡ ಕುಟುಂಬದ ಜತೆಗೆ ದೀಪಾವಳಿ ಆಚರಿಸಲು ಬಯಸುತ್ತೇನೆ. ಹಾಗಾಗಿ ಕುಟುಂಬ ಎಂದು ನಾನು ಪರಿಗಣಿಸುವ ಯೋಧರ ಬಳಿಗೆ ಬಂದಿದ್ದೇನೆ’ ಎಂದು ಹೇಳಿದರು. ಯೋಧರ ಜತೆ ಸಮಯ ಕಳೆಯುವುದರಿಂದ ತಮಗೆ ಹೊಸ ಚೈತನ್ಯ ದೊರೆಯುತ್ತದೆ ಎಂದರು.